NGUMBUO YA MAWAWASO 21 - Bibilia Kui Mdedie fo Kimochi

Mbonyi tsa wuwahi wulamemanyika

¹ “Mndu kakoyo ambaahie ngeṟenyi ipfo orukenyi Mndumii-Ruwa, Ruwa onu, aimuinenga, nanyo muichi nyiu alembaahapfo,

² wameku na wandu wanu wedumbuo mondu wechicha watiichie wuleshe wo wokia handu mnying'afo fui tane mṟinyi fo afui.

³ Numa, wameku wa mṟifo fui afui ngoseṟa na mnying'afo wechiduo ihache lilalemeṟunde iṟunda lyo lyose manya lilalemedeme.

⁴ Nawo wasotsie ihachelyo pichinyi kimedenyi kya mṟinga fulekeumia, pichilyo nokoe lilekedemo ang'u iwaayo, mpfo kundu mochifunjia ihachelyo nzingo.

⁵ Kiwaṟi Wakohanyi wa kishari kya Lewi nokoe wakeriho. Mndumii-Ruwa, Ruwa onu, nalewasambuṟa wamṟundie na iwikia wandu mboṟa kui rina lyake. Wo daa wawode pfinya ko orio kindo na wungarama.

⁶ Ili ihachelyo lyechi funjo nzingo, wameku wose wa mṟifo fui kufui na handu mnducho alewaahio wechisamba mawoko hawo na mṟinga, wasambie huya ihachelyo,

⁷ wechihamba, ‘Luwode mti kya opfulupfo, manya luichi mndu alembaahapfo.

⁸ Hoi Mndumii-Ruwa, kehooṟia wanduwa wapfo, Waisraeli kulewatalaa, kulawonyie wandu wapfo Waisraeli mti fo wuwahi wo mndu alawode mti, kewahooṟie dekoli.’

⁹ Kudo samuyo ilepusuka yechiwase tewe konupfo, cha kipfa momewuta shilya Mndumii-Ruwa alemuwia muwute.

¹⁰ “Mukahenda shidenyi ikapana kya waka wawaende shidenyi na wakituwa wanu, nao Mndumii-Ruwa kamuinenga wuwinzi mukaende wapfungo wa shidenyi,

¹¹ kokoya umu onu awonapfo mndumka mcha, kamlanga kakunda imwaalika,

¹² kyasia iyo mndumsoṟo uwaṟi mduo kanyi, nomwode njui tsa mdonyi foke na iweha njaa tsake,

¹³ na iilacha nguo tsake tsa kipfungonyi. Nechikaa merifumu kechikapia ndee na mae kilio. Numa nochiidima imwalika, nawe mka opfo na iyo nowe mii oke.

¹⁴ Ko koya lyefurumia kulamchihie kyake, nochimda nakuhendie kundu akunda; ochimkumba nowone pesapfo, manya ochimbutiase cha isingapfo cha kipfa kulemelaa nao cha mndu na mka.”

Kyoṟa kya mana mbee

¹⁵ “Ko koya mndumsoṟo mliwe nawode waka wawi nao nakundi umu kota ungi. Na wakawo wamemfeea wana wa kisoṟo, na mana mmbe kafeo nyi mka ulya asuikie,

¹⁶ kukashikia mkonu foinenga wanawo wake kyoṟa, msoṟocho awode momu manyale fowutia mana o mka amkundi cha ili nyi mana oke mmbepfo; handu ha mana ulya o mka asuikiepfo na nyio ai mana mmbee.

¹⁷ Kimbaṟi naidikie mana ulya mmbee, mana o mka ulya asuikie; namnenge ohawi loke shienga shiwi sha masaa hake.”

Itoromesho lya mana alawode wuindi

¹⁸ “Kokoya mndu awode mana mlang'a na alekeicho kindo, elekeindia wafee wake ma ili waimtoromisha,

¹⁹ kyasia, wafee wa manachu wechumduo alya mongo fo mba wekekaa na imduo ko wameku wa mṟifo wekekaa alya kichuminyi.

²⁰ Wafeewo wawie wameku wa mṟifo: Manachu odu namlang'a na elekeadanyia kindo, akundi iluicho kindo luimloshapfo, namkuwu na nyi mnanzi.”

²¹ O wandu wa mṟifo wechimkumbia manacho maho mṟasa napfe. Nyi wudo mochitoromesha wuwichowo kiidi kyanu. Orio mndu kiidi kya Waisraeli nechiicho kindoki na nechiowuo.”

Mawawaso maata

²² “Ko koya mndu awuta deko limbaṟi iwooho na kawooho kuiimaso ikidihu,

²³ mnying'a foke fuladeo kidihu kio taṟaṟaa indi mochimṟika mfiri na ifo ifo. Kyamba mndu amaso kidihu namsese nyi Mndumii-Ruwa, nanyo mochiteṟefutsa oruka lonu muleinengo nyi Mndumii-Ruwa, Ruwa onu, luwe lonu.”