NGUMBUO YA MAWAWASO 2 - Bibilia Kui Mdedie fo Kimochi

Maka wawei kulya nuka

¹ Numa, lukahaluka, lukachumia kulya nuka lukaida njia ya ipalyipalyinyi lya Shamu, chandu Mndumii-Ruwa alenjiwia; lukaṟahaṟaha kufui na fumvu lya Seiri kiheri kileshe.

² Numa Mndumii-Ruwa kanjiwia,

³ moṟahaṟaha kishikie kunu orukenyi lo mafumvu; wulalu halukenyi muhende kya mtsudu.

⁴ Mui kufui muide orukenyi lo mafumvu ha Seiri, oruka lo wana wa mayanu luwa lya Esau. Wo wechimuowuo, kyaindi kuṟisenyi,

⁵ mulakapane nawo cha kipfa njechimuinenga manya kipeṟengu kya oruka lowopfo. Njechimuinenga manya kipeṟengu kya otifopfo. Orukalo lo mafumvu ha Seiri njileinenga luwa lya Esau luwe lowo.

⁶ Mkakunda kelya ang'u mṟinga kowo kimuwaṟi ihuṟa.

⁷ Kyasia, kumbuonyi chandu Mndumii-Ruwa, Ruwa onu alemuwikia ona ko orio kindo mlekiṟunda. Nalemuringa mandi muweiṟahaṟaha kunu nuka ii ing'anyi idi. Nawei handu hamu nanyo maka ii yose makumi haana mulewuṟa kindo kyosepfo.

⁸ Ko ikyo lulechumia kyaṟo kyadu lukaida wana wa wama wadu luwa lya Esau wawekekaa Seiri, lukakushowa-se njia iya ya pichinyi na njora tsa mṟi ya Elati na Esion-geberi. Numa lukahaluka lukaosha njia yeida nuka ya Moabu.

⁹ Mndumii-Ruwa kanjiwia, “Manya kulawinyishe wandu wa Moabu, ma kulakapane nawo kipfa njechimuinenga ohawi lose lo oruka lowopfo.”

¹⁰ Ili kuwooka orukalo lo Ari luwewodo nyi wandu wafoi wawode pfinya waleshe cha Waanaki.

¹¹ Wanduwa walelaho nyi Warefai, kyaindi Wamoabu walewalaha nyi Waemi.

¹² Wahori-daa ipfo mawookionyi walekaa kulya Seiri, kyaindi luwa lya Esau likawafunapfo na iwarumatsa, nawo wakakaapfo handu ha Wahori. Waisraeli na wudo walewuta kulya orukenyi waleinengo nyi Mndumii-Ruwa luwe lowo).

¹³ Mndumii-Ruwa kaluwia: “Kurenying'u wulalu muambade kimeda kya Zeredi.” Kyasia lukaambada kimeda kya Zeredi.

¹⁴ Kulesia maka makumi haṟaṟu na nyanya (38) wokia lulewuka Kadesh-barnea mṟasa mandi luleambada kimeda kya Zeredi. Kiheri kyo wandu wose wawewode maka yehenda shidenyi wawemearisika chandu Mndumii-Ruwa awehambie.

¹⁵ Mndumii-Ruwa amonyi nyio alewarumatsa ipfo mfiṟihenyi, wakasia wose.

¹⁶ Kyasia, wanduwo wose wawewode maka yehenda shidenyi wekipfa wose

¹⁷ Mndumii-Ruwa nalenjiwia,

¹⁸ “Inu kudi mochiambada mṟasa fo Moabu mochiida orukenyi lo Ari.

¹⁹ Mochishika orukenyi lo Waamoni. Mlawakisekise manya mula kapane nawo cha kipfa njechimuinenga manya kioṟa kya teri kya luwa lya Amonyi kiwe kyanupfo. Ote! Wo nyi luwa lya Loti, na njilewainenga orukalo luwe lowo.”

²⁰ (Orukalo luwemanyikiese ke nlo Warefai. Warefai wawekekaapfo ili kacha; Waamonyi walewalaha nyi Wazamzumi.

²¹ Wawei wafoi, wawode pfinya, waleshe cha Waanaki. Kyaindi Mndumii-Ruwa kawarumatsa kiheri Waamoni waleshikapfo, Waamoni wakaduo orukalo wakakaapfo.

²² Mndumii-Ruwa nalewuta chandu alewutia luwa lya Esau, Waedomu wekekaa orukenyi lo Seiri. Nalerumatsa Wahori kiheri Waedomu waleshikapfo, wakawada orukalo wakakaapfo tane inu.

²³ Waavi waweipfo wawokia kuwoka; kulya mṟinyi yawo ya wambaṟa ya Mediteranea tane Gaza. Wakaftori wawuka kiṟingiti kya Kaptori wakawamarisa, wakawada orukalo handu hawo).

²⁴ Numa, Mndumii-Ruwa kaluwia, “Wokenyi kyaṟo. Ambadenyi pichi lya Arnoni. Inyi ngawika Sihoni mangi ya Waamori wa Heshboni na oruka loke mawokonyi hanu. Mkapenyi na iwooka ichilia oruka loke.

²⁵ Inu njiwooka iinenga wandu wose wa wuyana wuowu na fowa kipfa kyanu; wechiicho mbonyi tsanu nawo wakangaṟike wadedeme.”

Waisraeli wawinga mangi Sihoni

²⁶ “Nahong'u, ngaduma wandu kuwuka nuka ya Kedemoti wahende ko mangi Sihoni o Heshboni warie ndumii ya ofoṟo wechihamba,

²⁷ ‘Luinenge momu lukuidie kunu orukenyi lopfo. Lochikuidia njienyi luhendelimu ko limu lulechiembeṟukia kulyo ma kumoso.

²⁸ Kelya kyadu lochihuṟa ipfo kopfo handu hamu na mṟinga fonyo. Kindo luikuterewa tupu nyi momu fokuidia ko madende orukenyi lopfo,

²⁹ luambade meda fo Yordani luide na orukenyi, ilo Mndumii-Ruwa, Ruwa odu ailuinenga. Luwa lya Esau wekeka Seiri na Wamoabu wa Ari waleluinenga momu fokuidia njorukenyi tsawo!’

³⁰ “Kyaindi Sihoni, mangi ya Heshboni, nalaluinenge momu fokuidia orukenyi loke. Mndumii-Ruwa, Ruwa onu kamnenga mdo muumu na orikiki lo mrimenyi, kundu lumbinge na iduo oruka loke ilu luichiliapfo mṟasa inu.

³¹ “Numa Mndumii-Ruwa kanjiwia, “Ambuya, ngawooka iwika mangi Sihoni na oruka loke mawokonyi hanu; wokenyi iduo oruka loke muluchilie.

³² Naho Sihoni kakure na wandu wake wose ikapana naso kufui na mṟi fo Yahasa.

³³ Mndumii-Ruwa, Ruwa onu, kamwende lukammbinga o na wana wake na wandu wake wose.

³⁴ Lukaowada na inyamaṟa mṟi yake yose, lukowaaha womi na waka na wana; lulade mndu ma umu ai na moo.

³⁵ Shindo shadu luleduo nyi shuma tupu na masaa hose lulekoya mṟinyi.

³⁶ Kuwokia Aroeri, mṟi fui mbai ya pichi lya Arnoni na mṟi fui kunu pichiny mṟasa Gileadi, kuwewode mṟi ma fumu fuwemwikare lukalemo ifuwadapfo. Mndumii-Ruwa nalewika shose mawokonyi hadu.

³⁷ Kyaindi lulesembeṟia oruka lo Waamonipfo ang'u wambaṟa ya meda fo Yabokipfo manya mṟinyi ya oruka lo mafumvunyi manya ora lungi lose sa Mndumii-Ruwa Ruwa odu aleluimapfo.