NGUMBUO YA MAWAWASO 19 - Bibilia Kui Mdedie fo Kimochi

Mṟi yedichia

¹ Mndumii-Ruwa, Ruwa onu kamemaa irumatsa wanduwo wa orukalo lowo Mndumii-Ruwa, Ruwa onu, aimuinenga, mkameichilia na ikaa mmbenyi tsawo,

² mochisahuo mṟi iṟaṟu ipfo orukenyi Mndumii-Ruwa, Ruwa onu, echimuinenga, muluchilie.

³ Mochisungusia njomongo na ihawa njora tsiṟaṟu orukalo Mndumii-Ruwa, Ruwa onu echimuinenga mukaepfo kundu orio mowaaha mndu alakusirie ko ndenga naidime idichiapfo.

⁴ “Mndu kui ndenga njiwicho kawaaha odoe alakusirie, msa ipfo mawokioonyi walawewode kituwa,

⁵ luhambe, cha mndu ekehenda na odoe ngeṟenyi imanya ngu, nao kiheri aimanya ikidi, isoka likawuka kulya munyinyi foke, likawaaha ulya ungi, mnducho neidima idichia mṟinyi fumuho kiidi kya iya iṟaṟu, kakia kiheri kya moo foke fose.

⁶ Ko koya mṟi nyi fumu tupu wuleshe wokoya mṟifo wuwelea mnu, icho ai manomae, motaa kiṟache kui nyashi ing'anyi neidima immbingia, na imbada na imbaaha icho awaaha alawekusiṟie manya chandu iwo weanduya wawi walamemwanduya kya opfu, kipfa walawewode kituwa ipfo mawookionyi.

⁷ Ko ikyo inyi ngamuikimba sambuṟenyi mṟi iṟaṟu.

⁸ “Kingise kokoya Mndumii-Ruwa, Ruwa onu alandaṟa mṟasa ya oruka lonu, chandu alewia waku wanu, nao kamuinenga oruka lose aleteṟia wakuwo wanu

⁹ kokoya moindia necha iwada mawawasoha hose nji muinengia inu kudi, mukakunda Mndumii-Ruwa, Ruwa onu, na iosha mfiri yose njia tsake, mochiengeṟa mṟi ingi iṟaṟu ngoseṟa ya iya iṟaṟu,

¹⁰ kundu mndu alawode mti nalache iwoohio orukenyi lonu sa Mndumii-Ruwa, Ruwa onu echimuinenga luwe lonu, na ikyo kilamuendie deko lya wuwahi.

¹¹ “Kyaindi kokoya mndu awode kituwa na odoe, kamṟinjawia kampufukia na imbaaha, numa kadichia mṟinyi fumuho fo mṟi yo,

¹² wameku wa mṟifo wechiduma wandu wameendepfo wamdambikie ko icho motaa kiṟache kepusuo samu, kundu nawoho.

¹³ Mulamsaṟie, mochitoromisha wuwicho wo wuwaahi wo mndu alawode mti kunu ko Waisraeli, kundu muidime ikaa na ofoṟo.”

Mṟasa ya kuwoka

¹⁴ “Mulasembeṟe iho ang'u ikuṟuo isale lya mṟasa na wamṟasa wanu; mṟasa ilewiko nyi waku wokia kacha ipfo orukenyi Mndumii-Ruwa onu aimuinenga mulaepfo.”

Waṟingishi

¹⁵ “Wuṟingishi wo mndu umu wushikie ianduya mndu kya deko lyake awutie lya mbaṟi yosepfo, liwe nyi lya wuwaahi ang'u sile aiweso. Nyi wuṟingishi wo wandu wawi ang'u waṟaṟu nyiwo wukundikie.

¹⁶ Ko koya mṟingishi mmbicho kacha ikumba mndu oose kya deko lyose liliwe,

¹⁷ o na icho akumbo dekolyo wechihenda oshangunyi lo Mndumii-Ruwa, oshangunyi lo wakohanyi na wedumbuo mondu wai kambenyi kiherikyo;

¹⁸ wendumbuo mondu wechiṟisa ko wuaria mondufo na kokoya mṟingishi naṟingishia wongo kakumba odoe kya wongo,

¹⁹ kyasia, mochimbutia chando awekusirie iwutia odoe. Nyi wudo mochitoromisha wuwicho kiidi kyanu.

²⁰ Na wandu wengi wakaicho wechiowuo, na wuwicho wo mbaṟiyo wochikaa wuwonekese kiidi kyanupfo.

²¹ Mulawasaṟie wandu wa mbaṟi ii. Kiṟache kechitao nyi kiṟache kingi: moo kui moo, riso kui riso, iheho kui iheho, kuwoko kui kuwoko na kudende kui kudende.”