Biblia Todo Logo
Bìoball air-loidhne

- Sanasan -

NGUMBUO YA MAWAWASO 18 - Bibilia Kui Mdedie fo Kimochi


Ohawi lo Wakohanyi na Walewi

1 “Wakohanyi Walewi, kishari kyose kya Lewi walawade ohawi manya kyoṟa ko Waisraeli. Wechilya ohawi lo mwano ya Mndumii-Ruwa.

2 Manya walawade kyoṟa ko wana wa mayawo; Mndumii-Ruwa nyio kyoṟa kyawo chando aleteṟia.”

3 “Na iki kechiwa wusumhanyi wo Wakuhanyi kuwuka ko wandu wailekia mwano iwe nyi mmbe ang'u machondi; wechiinenga mkohanyi kudende ko kusonguo, mahundu na maula.

4 Mochiwainenga ohawi lo kuwooka shilimu shanu sha mso, mvinyo, mafuda hanu na mberi tsa kuwooka tsa machondi hanu.

5 Kiidi kya shishari shanu shose, Mndumii-Ruwa nalesambuṟa kishari kya Lewi kimṟundie cha Wakohanyi mlungana.

6 “Kokoya Mlewi oose akunda o amonyi iwuka mṟinyi fungi fose fo Waisraeli ihenda alya handu Mndumii-Ruwa asambuṟie,

7 nechiidima iwutiaho mṟumo kui rina lya Mndumii-Ruwa, Ruwa oke, chandu Walewi walya wengi wekeṟunda oshangunyi lo Mndumii-Ruwa.

8 Wechiinengo kiheo kyawo kihianyi kya kelya, manya kokoya chando wawode ohawi lo shindo wana wa mayawo wakumba.”


Wuikimbi kya mbuka njihenu

9 “Ili mochishika ipfo orukenyi Mndumii-Ruwa, Ruwa onu aimuinenga, mulaoshe mchumie njiwicho ya mkamboyo iipfo.

10 Kulakae mndu oose awuta mana oke o kisoṟo ang'u o kika kidaso ke koṟa, ang'u nawe kidaso ke koṟa modonyi manya ilasha, manya motangalatuo, manya ihenda ndashenyi,

11 manya wasawi manya moloha, manya wakundi iwesa mbonyi ko wandu wapfie, ang'u waṟumu na waṟufu wawicho.

12 Kyamba mowuta mbonyi cha itsi nyi kisukiṟie Mndumii-Ruwa; na kipfa kya mbonyi cha itsi Mndumii-Ruwa atsisuo, Ruwa onu nekefuna wandu wa mbaṟi ii oshangunyi lonu.

13 Muwe wandu waawukie oshangunyi lo Mndumii-Ruwa, Ruwa onu.”


Kyasa kya iinengo mwikimbi

14 “Mkambo ii ya wandu mokekaa orukenyi lowo wekeosha wahanga wawicho, walasha; kyaindi Mndumii-Ruwa, Ruwa onu, echimuinenga momu fowuta mudopfo.

15 “Mndumii-Ruwa, Ruwa onu, nechimusambuṟia mwikimbi ai cha inyi kuwuka kiidi kyanu nyo muwenyi, nanyo mochimwindia.

16 Ikyo nkyo muleterewa Mndumii-Ruwa, Ruwa onu, kulya Horebu mkonu fulya mulekusanza, mukahamba, ‘Lulaichose ṟu lya Mndumii-Ruwa, Ruwa odu, manya lulawonese modofu fung'anyi, lulashike ipfa.’

17 Nao Mndumii-Ruwa kanjiwia, ‘Na kyalohi wahamba.

18 Njechiwasambuṟia mwikimbi cha iyo kuwuka kiidi kya wana wa mayawo; njechiwika madedo hako dumbunyi lyake, nao nechimuwia shose njechimuwawasia.

19 Icho oose elechiadanyia madedo mwikimbicho echihamba kui rina lyako inyi, nyi Inyi njimonyi njechimkapa.

20 Kyaindi mwikimbicho oose echihamba kui rina lya maruwa hengi, ang'u sa echihamba idedo kui rina lyako na kokoya inyi njilamdumie nahambe, mwikimbicho na napfe.’

21 Kyaindi nyo moidima ihamba, ‘Lochimanya luda idedo sa Mndumii-Ruwa alalihambie?

22 Kokoya mwikimbi ahamba kindo e wai nyi kui rina lya Mndumii-Ruwa, na kindokyo kilawutike ang'u kilawe kya lohi; kindokyo ki kihambe nyi Mndumii-Ruwapfo; nyi mwikimbi akuhambia kui wutondo woke, nanyo mulaowesho nyi kindokyo.’”

Kimochi Bible © Bible Society of Tanzania, 2016.

Bible Society of Tanzania
Lean sinn:



Sanasan