NGUMBUO YA MAWAWASO 16 - Bibilia Kui Mdedie fo Kimochi

Pasaka

¹ “Ichikenyi meri fo Abibu muwike Pasaka ya Mndumii-Ruwa, Ruwa onu kui wuindi. Cha kipfa kiidi kya merifo fo Abibu, Mndumii-Ruwa, Ruwa onu nalemuwuta kulya Misri kiheri kya kio.

² Mochilekia mwano fo Pasaka kuwuka shuma shanu sha machondi na mmbe mochiindia Mndumii-Ruwa handu Mndumii-Ruwa echisambuṟa nawikeho rina lyake.

³ Mulalye mwanofo na mkate intarang'ashe. Ko mfiri mfungade mochilya mkate ilantarang'ashe, nyi mkate ya mawukiwa-cha kipfa mulewuka Misri kui wuitiki; ko ikyo, kiheri kyose kya moo yanu mochikumbuo mkonu fulya mulewuka Misri.

⁴ Ko mfiri mfungade mndu oose kiidi kyanu nalaleṟie mtarang'asho kanyi koke; na nyama ya kilya kishinjo kyukanyi kya mfirifo fo kuwooka ilio yose kiokyo; ilatsuhaṟo mṟasa ili lya ngama ngamenyi.

⁵ Mulashinjie mwano fo Pasaka kiidi kya mṟi fose Mndumii-Ruwa echimuinenga;

⁶ indi shinjienyi alya handu Mndumii-Ruwa, Ruwa onu echisambuṟa iwikaho rina lyake, nyihondo mochishinjia kidaso kya Pasaka kyukanyi, ili mnengeṟi fuilokia, kiheri kilya kilya mulewuka Misri.

⁷ Nyamayo mochiikoṟa na iliia handu halya Mndumii-Ruwa, Ruwa onu echisambuṟa ili lya ngama ngamenyi mukure muwuye na mahemenyi hanu.

⁸ Mfiri iṟandaṟu mochilya mkate ilantarangashe; na mfiri fo mfungade kochikaapfo kisanzio king'anyi keindia Mndumii-Ruwa, na mkonufo mulaṟunde iṟunda lyose.”

Mkonu foana Mndumii-Ruwa shilimu

⁹ “Mochiitala mfungade, mfungade mochiwooka iitala wokia mowoka isambuo shilimu.

¹⁰ Numa muwike mkonu mnene fo shilimu iana Mndumii-Ruwa, Ruwa onu, mochilekia mwano kui mrima chandu Mndumii-Ruwa, Ruwa onu alemusumba

¹¹ Mochichihio oshangunyi lo Mndumii-Ruwa, Ruwa onu, nyo hamu na wana wanu na wana wanu wa kika, waṟundi wanu, Walewi, wahenu, wangoeda na wakusu wai hamu nanyo. Wutienyi ishi handu Mndumii-Ruwa Ruwa onu echisambuṟa iwikaho rina lyake.

¹² Mukumbuo ke muwei masinga kulya Misri; ko ikyo muambuye necha ihendelia mawawasoha.”

Mfiri mnene fo matengo

¹³ “Mukamemaa ihuo Ngano yanu yose na ikama msabibu yanu, wikenyi mfiri mnene fo matengo ko mfiri mfungade.

¹⁴ Mochisungusia mfuhofo, nyo na wana wanu wa kika na wa kisoṟo, waṟundi wanu, Walewi, Wahenu, Wangoeda na Wakusu wai ipfo mṟinyi yanu.

¹⁵ Mfiri mfungade mochiwikia Mndumii-Ruwa, Ruwa onu, mfuho handu Mndumii-Ruwa echisambuṟa; cha kipfa Mndumii-Ruwa, Ruwa onu nechiwikia shilimu shanu shose mboṟa na kiidi kya mbonyi tsanu tsose nanyo kya lohi mochichihio.

¹⁶ “Wasoṟo wose wa mkambo fonu wechicha oshangunyi lo Mndumii-Ruwa, Ruwa onu, makamba haṟaṟu orio maka, handu Mndumii-Ruwa, Ruwa onu echisambuṟa: kiheri kya mkonu mnene fo Pasaka, mkonu mnene fo sambuo na kiheri kya mkonu mnene fo matengo. Walache oshangunyi lo Mndumii-Ruwa na mawoko ha wulya.

¹⁷ Wose wechilekia mwano chandu wakuidima kihiyanyi na mboṟa Mndumii-Ruwa, Ruwa onu alemusumba.”

Sungusihu ya wukiilohi

¹⁸ “Mochisambuṟa wandu wedumbuo mondu na wasongoru kuwuka shisharinyi shanu ipfo mṟinyi yanu sa Mndumii-Ruwa, Ruwa onu echimuinenga, nawo wechidumbuo mondu ya wandu kisumhanyi.

¹⁹ Mulapfuluo kiilohi; mulawade ikundia, manya mulaambie kitsutsumo, kyamba itsutsuma lyekewaaha meso ha wandu wawode osaaṟe na ipfuluo mondu fo mndu o wusumhanyi.

²⁰ Wadenyi kiilohi tupu, kundu muidime iwada moo na ichilia orukalo Mndumii-Ruwa, Ruwa onu aimuinenga.

²¹ “Muladonge ikidilyo lyose liwe ngo ya ruwa lya wongo kufui na rasionyi, mochiwikia Mndumii-Ruwa, Ruwa onu.

²² Manya mulahoṟotse ngo sa Mndumii-Ruwa; Ruwa opfo aisuo.”