NGUMBUO YA MAWAWASO 13 - Bibilia Kui Mdedie fo Kimochi

¹ “Kukakure mwikimbi kiidi kyanu ang'u mlasha ekeambuya ndodo kamuloṟa kichano na ṟiho maata,

² numa idedo kichano ang'u ṟiho amuwia shikaawukia, nao kahamba, “Luoshe maruwa hengi, (maruwa sa mulalemehamanye) na iiṟundia,”

³ mulaadanyie madedo ha mwikimbicho ang'u mlashacho o ndodo, cha kipfa Mndumii-Ruwa, Ruwa onu, nekewaduma imuhesha kundu namanye kokoya mumkundi o Mndumii-Ruwa, Ruwa onu, na ngoo yanu yose na mrima yanu yose.

⁴ Mwoshenyi na iindia Mndumii-Ruwa, Ruwa onu, na iwada mawawaso hake hose na iindia ṟu lyake; mṟundienyi na ioshana nao.

⁵ Kyaindi mwikimbicho ang'u mlashacho o ndodo nechiwooho, kipfa kya ili alosha wandu ilekana na Mndumii-Ruwa, Ruwa onu, alemuwuta orukenyi lo Misri na imukiṟa kuwuka wusingenyi, kundu mude njia Mndumii-Ruwa, Ruwa onu alemuwawasia, nyi wudo mochitoromesha wuwicho kiidi kyanu.

⁶ Kokoya manomayo moonga wee limu, ang'u mana opfo, ang'u mana opfo o kika, ang'u mkaopfo umkundi mnu nakamu, ang'u mbuya yapfo ya mrima, kakutuusa ko kiṟika kechikuwia, “Nnde luindie maruwa hengi, sa iyo kumonyi manya waku wanu mulawaichi;

⁷ maruwa maata ha wandu wai kufui na iyo ang'u maruwa ha wandu wai kuleshe nanyo wokia ndumba ya oralu lo wuyana tane ndumba ingi,

⁸ kulakunde iṟungo manya imwadanyia manya imwichio wukiwa, manya imlekia, manya imsuṟuma;

⁹ indi nochimbaha, owoko lopfo kiwaṟi luwoke kiheri kembaha, numa wengi waitume daa.

¹⁰ Mkapenyi na maho mṟasa napfe! Kipfa naheṟia ikukuruya kuleshe na Mndumii-Ruwa, Ruwa opfo alekuwuta wusingenyi wo Misri.

¹¹ Kudo Waisraeli wose wechiicho na iowuo, na wechiwuta wuwicho wo mbaṟi ii ma indiipfo.

¹² “Mukamekaa ipfo mṟinyi sa Mndumii-Ruwa Ruwa onu, aimuinenga, kofia mochiicho

¹³ wandu waliwe wa mkahakaha kiidi kyanu wasoṟo wa mṟi wechihamba, ‘Nndenyi luhende iindia maruwa hengi, sa mulawehaichi,

¹⁴ kyasia mochiwesawesa na itiichia necha ko wuaria; na kokoya na lohi ke kindo kiwicho kiwutikie kiidi kyanu,

¹⁵ kimuwaṟi muwawaahe wandu wa mṟifo na oshu; mochifurumatsa na oshu nakamu na mmbe tsose daa.

¹⁶ Mochisanyia nzohoṟa tsa mṟifo tsose osehu mengenyi ya mṟi mutsikoṟe na modo tsose cha kidaso kekoṟa kya Mndumii-Ruwa onu; mṟifo fochiwa cha fumsame mlungana, fochikaa fuwikosepfo.

¹⁷ Orio kindo kyameendo kikoṟo na modo mulakiduose, kundu Mndumii-Ruwa nahooṟe nyashi iya yake njiwawo, nawaloṟe osaṟio na wucha, namupfumbutse, mufo mnu nakamu chando aweteṟie waku wanu,

¹⁸ kokoya moindia ṟu lya Mndumii-Ruwa, Ruwa onu tupu mukaringa mawawaso hake hose njikeri imuinengia inu na iwuta kilya kisumhanyi oshangunyi lo Mndumii-Ruwa, Ruwa onu.’”