NGUMBUO YA MAWAWASO 12 - Bibilia Kui Mdedie fo Kimochi

Handu ha kyaanya ha miindie

¹ Iha nyi mawawaso na wuikimbi shimuwaṟi iwuta ipfo orukenyi Mndumii-Ruwa, Ruwa o waku wanu amuinenga, mukaepfo mafiri hose ha moo yanu iya wuyanenyi.

² Nyamaṟenyi nakamu orio handu hose wandu wekeindia maruwa hawo ha wongo kokoya nyi mafumvuhu maleshe, wanda ya mashidi, shitoṟomosohu ang'u ngeṟenyi.

³ Funjienyi kuleshe rasion tsawo na ifunja ngo tsawo. Rumatsenyi ko modo mfanano yawo na Ashera, manyamanya sanamu tsawo tsepacha, iangatsia kuleshe rina lyawo na handu hawo.

⁴ “Manya mulaindie Mndumii-Ruwa, Ruwa onu chandu wo wekeindia ruwa lyawo.

⁵ Indi mochihenda handu Mndumii-Ruwa, Ruwa onu echisambuṟa ipfo shisharinyi shose iiṟicha rina lyake na hawe handu hake hekaa; ipfo mpfo kundu mochihenda;

⁶ napfo kundo mochiduo shidaso shanu na shemaya modonyi na mwano yanu ya mbaṟi tsose, mwano ya kiteṟio, shenengo sha nnga, ya wana wawee, mahache ha mmbe na machondi hanu,

⁷ mochiliiapfo shelya oshangunyi lo Mndumii-Ruwa, Ruwa onu na mochichihio nyo handu hamu na wandu wa kanyi konu kipfa kya mbora mochisumbo nyi Mndumii-Ruwa, Ruwa onu.

⁸ “Mulawute chandu lokewuta wulalu, orio mndu chandu akunda o amonyi;

⁹ kipfa kya ili mulameida na handu hesia moo na kioṟenyi Mndumii-Ruwa, Ruwa onu aimuinenga.

¹⁰ Kyaindi ili mochiambada meda fo Yordani na isamia ipfo orukenyi Mndumii-Ruwa, Ruwa onu aimuinenga mukaepfo, ili echimuinenga handu hesia moo; mulakisokiso nyi wakituwa wanu wose wechimutengetia, kundu mukae na kipuo,

¹¹ kyasiang'u handu Mndumii-Ruwa, Ruwa onu echisambuṟa helahia rina lyake, nyi hondu mochiduo isho shose njilemuwawasa: shidaso shanu shekoṟa, na mwano yanu, mwano yanu na shiinengo shanu mochishiende, mwano yanu, na shiasa shanu mochiwika sheinenga Mndumii-Ruwa.

¹² Mpfondu mochichihio oshangunyi lo Mndumii-Ruwa, Ruwa onu, nyo na wana wanu wa kika na wa kisoṟo, waṟundi wanu na shisinga shanu, na Walewi wekekaa kiidi kyanu; kipfa walawode kioṟa kiidi kyanu.

¹³ Kuṟisenyi necha mulawutie shidaso shanu shemaya modonyi handu ho hose mokukundia;

¹⁴ sile nyi handu Mndumii-Ruwa echisambuṟa kiidi kya kishari kimuho kya shishari shanu, oo nyi hondo mochiwutia shidaso shanu shekoṟa na nahondu mochiwutia mbonyi tsingi tsose njilemuwawasa mushiwute.”

¹⁵ “Kyaindi muwode momu foshinjia shuma shanu handuho hose mokunda ipfo kanyi konu cha mboṟa muleinengo nyi Mndumii-Ruwa Ruwa onu, chandu mochisaṟio nyi Mndumii-Ruwa. Wandu wose waheṟemtsu ang'u waterefukie weidima ikuliia chandu mokelya nyama ya sumbuda na sariha.

¹⁶ Kyaindi mulanyo samu yasho; pusuyenyi samuyo wanda cha mṟinga.

¹⁷ Mulaliie shindoshi ipfo kundo mokekaa: mwano yanu ya mso, mvinyo fonu ang'u mafuda hanu, mashao ha kuwooka ha mmbe tsanu ang'u machondi hanu ang'u mwano yanu ya kyasa ang'u shidaso shanu sha nnga ang'u shiinengo shingi shose.

¹⁸ Indi mochishiliia oshangunyi lo Mndumii-Ruwa, Ruwa onu, handu Mndumii-Ruwa, Ruwa onu echisambuṟa. Mochishilya nyo na wana wanu wa kika na wa kisoṟo waṟundi wanu na shisinga shanu, na Walewi wekekaa mṟinyi yanu.

¹⁹ Ṟingishienyi daa ke mochihadima Walewi kiheri kyose wechikaa ipfo orukenyi lonupfo.”

²⁰ “Ili Mndumii-Ruwa, Ruwa onu echilandaṟa oruka lonu chandu aleteṟia, nanyo kokoya mohamba, “Lochilya nyama, kyamba mukundi nyama, moidima ikuliia kiheokyo kyose mokunda.

²¹ Kyasia handu Mndumii-Ruwa, Ruwa onu, echisambuṟa na wikeho rina lyake, moidima ishinjiaho mmbe ang'u ichondi ilyo lyose Mndumii-Ruwa alemusumba, chando njimuwawasa na moidima ilya kiheo mokunda kya nyamayo, kokoya mui ipfo mṟinyi yanu.

²² Mochilya nyamayo chandu mokelya sumbuda na sariha. Mndu oose neidima ilya, ai mheṟemtsu.

²³ Indi ṟingishienyi ke mokenyo samupfo; kyamba samu nyi moo; ko ikyo, mlalye moo handu hamu na nyama.

²⁴ Mlalye samuyo indi pusuyenyi wanda cha mṟinga.

²⁵ Mulalye samu, nanyo mochihuyo handu hamu na luwa lyanu, kyamba mochiwamowuta mecha oshangunyi lo Mndumii-Ruwa.

²⁶ Shindo shiheṟemtsu mochishilekia na mwano yanu ya kyasa mshiduo handu Mndumii-Ruwa echisambuṟa.

²⁷ Nyihondo mochiduo shidaso shemaya modonyi, nyama na samu, rasionyi lya Mndumii-Ruwa onu; samu ya indolyo mochiiolya rasionyi lya Mndumii-Ruwa, Ruwa onu, kyaindi muwode momu folya nyamayo.

²⁸ Kuṟisenyi muindie madedoha ngamuwawasia, kundu muidime ihuyo nyo handu hamu na luwa lyanu numa yanu mlungana, kyamba mochiwa mowuta hai mecha na ha wusumhanyi oshangunyi lo Mndumii-Ruwa, Ruwa onu.”

Wuikimbi kya iindia mfanano

²⁹ “Mndumii-Ruwa, Ruwa onu, kamemarisa ifunyia kuleshe mkamboyo ingi oshangunyi lonu, iwo muihenda iwafuna, iwawuta ipfo orukenyi na ikaapfo,

³⁰ kuṟisenyi mulakuwike mdehonyi iosha chandu wekeindia maruwa hawo. Mulakuwinyishe imanya maruwa hawo, mochihamba, “Mkamboii wekeindia wada maruwa hawo? Kundu naso luwaindie ludo.

³¹ Mulaindie mudo Mndumii-Ruwa, Ruwa onu, cha kipfa orio kindo kipfulutsie Mndumii-Ruwa nyashi waleshihaluo maruwa hawo; tane wakoṟa wana wawo wa kika na wa kisoṟo modonyi, wechidasia maruwa hawo.

³² Orio kindo ngamuwawasa, kuṟisenyi mushiwute; mulaengeṟeho kindo manya mulawuteho kindo.”