NGUMBUO YA MAWAWASO 11 - Bibilia Kui Mdedie fo Kimochi

Wunene wo Mndumii-Ruwa

¹ “Kui kipfa kya ikyo, kundenyi Mndumii-Ruwa, Ruwa onu, na iwada wuhendeli woke mkonu yose na mawawaso hake, na mdumbuye yake.

² Kusaṟenyi ko wuaria, kya wana wanu sa walalewona manya imanya ngapo ya Mndumii-Ruwa, wuidimi woke na pfinya tsake,

³ shichano shake na ṟiho tsake aleshiwutia kulya Misri ko mangi Farao o Misri na oruka loke lose;

⁴ aleshiwutia matorito ha Misri, frasi tsawo na magari hawo ha shida, chando alesoṟowitsia itoritolyo ipalyipalyinyi lya Shamu, na chando Mndumii-Ruwa alelikombetsa mṟasa inu kudi.

⁵ Kumbuonyi daa chando Mndumii-Ruwa alemuwutia kulya nuka kiheri mulawemeshike iya,

⁶ mbonyi alewutia Dathani na Abiramu, wana wa Eliabu, mana o Reubeni; chando wanda iledauka ikawameṟa na wa mba tsawo, mahema hawo, shuma na waṟundi wawo wose.

⁷ Kyamba meso hanu halewona mawuto ho hang'anyi hose Mndumii-Ruwa alehawuta.”

Mboṟa tsa oruka lo kyasa

⁸ “Indienyi mawawasoha hose njimuinengia inu. Kundu muidime iida na ipfo orukenyi kundu muihenda na iluchilia,

⁹ muidime ikaa na moo mleshe ipfo orukenyi luichuo maruwa na wuki, oruka Mndumii-Ruwa aleteṟia iinenga waku wanu na luwa lyawo lyose.

¹⁰ Cha kipfa orukalo muihenda ikaa chi kimu na lulya lo Misri kundu mulewukapfo, kundu mulewaaya shilimu, mukanosa na mṟinga fo mfongo cha madema ha mboha;

¹¹ kyaindi orukalo muihenda ikaa, nyi oruka lo mafumvu na mapichi, oruka lokekapa mṟinga fo mvuo iwuka ruwehu,

¹² oruka sa Mndumii-Ruwa, Ruwa onu ekeluringa; nekeluambuya kiheri kyose wokia mawookionyi ha maka tane masiiyonyi ha maka.

¹³ “Kyasiang'u, mukaindia mawawasoha njikeri imuinenga inu, mukakunda Mndumii-Ruwa, Ruwa onu, mukamṟundia na ngoo yanu yose, na mrima fonu fose,

¹⁴ O nechidika mvuo ipfo orukenyi lonu kiheri kyayo, mvuo ya kisie na mvuo ya fuli, nanyo mochisambuo shilimu shanu, mvinyo fonu na mafuda hanu.

¹⁵ Nechioṟisha maṟa mademenyi ha mmbe tsanu, nanyo mochilya muihude.

¹⁶ Kuṟisenying'u, mrima yanu ilalembo, mula haluke, muṟundie maruwa hengi na ihaindia,

¹⁷ nyashi ya Mndumii-Ruwa ilashike icha huyanu, kapfunga ngina mvuo ilache na oruka lulaoṟishe shilimu shalo, numa mkaarisika owinyi iya orukenyi lucha sa Mndumii-Ruwa aimuinenga.

¹⁸ “Wikenyi madedoha hako ngoonyi tsanu na mrimenyi yanu. Hapfungenyi mawokonyi hanu hawe kichano na ihaṟaa ipfo kyamunyi.

¹⁹ “Loshenyi wana wanu madedoha mochikapa sumu mudamie ipfo kanyi konu, kiheri muichumia kiheri mulee na ikure.

²⁰ Haṟehienyi huya shiwangowango sha mba tsanu, na mongo yanyu;

²¹ kundu nyo na wana wanu muidime iwada moo mleshe ipfo orukenyi Mndumii-Ruwa, Ruwa onu, alelya nyamu ke nechiinenga waku wanu mfiri yose ya iya wuyanenyi.

²² “Mukaindia necha iawutsia mawawaso hose njilemwinenga: ikunda Mndumii-Ruwa, Ruwa onu, iosha njia tsake tsose na ioshana nao,

²³ Mndumii-Ruwa nechifuna mkamboyo ya wandu yose oshangunyi lonu, nanyo mochiwada oruka lui lo mkambo ing'anyi na iwode pfinya kota nyo.

²⁴ Orio handu mochichuma na madende hanu kochiwa konu; oruka lonu lochiwokia nuka ora lo nuka, tane mafumvu ha Lebanoni ora lo mtsudu, na kuwokia meda fo Eufrate ora lo ngamenyi, tane ipalyipalyi lya Mediteraniani ora lo kyukanyi.

²⁵ Kuipfo mndu icho oose echiidima ihoṟotsana na iyopfo. Orio handu mohenda ipfo orukenyi, Mndumii-Ruwa, Ruwa onu nechikangaṟitsa wandu wamuowuo, chandu aleteṟia.

²⁶ “Ambuyenyi, inu tichi ngamuwikia oshangunyi lonu mboṟa na oseso:

²⁷ Mboṟa kokoya moindia mawawaso ha Mndumii-Ruwa, Ruwa onu, iha njimuinengia inu tichi;

²⁸ na oseso kokoya mulaindia mawawasoha ha Mndumii-Ruwa, Ruwa onu mukada njia njikeri imuwawasia, mukaindia maruwa hengi sa manya mulahaichi.

²⁹ Ili Mndumii-Ruwa echimushitsa ipfo orukenyi kundu muihenda ikaapfo, mochionguo mboṟa kuwuka fumvuhu lya Gerizimu, na oseso kuwuka fumvuhu lya Ebali.

³⁰ (Mafumvuha hai mataya ya meda fo Yordani, ora lo kyukanyi lo mtandara ihendie maolokienyi ha mnengeṟi, orukenyi lo Wakaanani wai Araba iambuyanyi na Gilgali).

³¹ Kimuwaṟi iambada meda fo Yordani muide napfo ipfo orukenyi kundu Mndumii-Ruwa, Ruwa onu aimuinenga. Kyasia ili mochiida napfo na ikaapfo,

³² ambuyenyi necha ke moawutsia mawawasoha hose na wuikimbiwu njimuinengya inu.”