NGUMBUO YA MAWAWASO 10 - Bibilia Kui Mdedie fo Kimochi

Mose aambiase mawawaso ikumi

¹ Kiidima Mndumii-Ruwa kanjiwia, “Pacha maṟaṟo hawi ha maho cha halya ha kuwooka, na isanduku lya mbau yehasuṟuma. Ncho na koko kunu huye fumvuhu,

² na inyi njechiṟehia madedo halya hawemaṟehie alya maṟaṟonyi halya kulehafunja numa nohawike isandukunyi.”

³ Kyasia, ngasungusia isanduku lya mbau tsa mshita na maṟaṟo hawi ha maho cha halya ha kuwoka, ngashiira na mawoko ngado nasho fumvuhu.

⁴ Mndumii-Ruwa kaṟehiaho madedo halya halya ha kuwooka: mawawaso ikumi sa alemuinenga mandi alededa nanyo kuwuka kulya modonyi kiheri kya kisanzio Numa Mndumii-Ruwa kanjiinengia maṟaṟoho.

⁵ Ngahaluka, ngasoka njiwuka kulya fumvuhu, na chandu Mndumii-Ruwa alenjitutuma njilewika maṟaṟo halya isandukunyi lilya njilelisungusia; naho hakeri kiidi kya isandukulyo, chandu Mndumii-Ruwa alenjitutuma.”

⁶ Waisraeli waleira kyaṟo wokia maṟungu ha mṟinga ha wandu wa Yaakani tane Mosera. Aroni kapfiiaho, kaṟiko. Elieseri ai mana oke, kawada wukohanyi handu ha ndeye.

⁷ Kuwokiaho, wakachumia tane Gudgoda, na kuwoka Gudgoda tane Yotbatha, handu kuwode shimeda shifoi sha mṟinga.

⁸ Kiherikyo Mndumii-Ruwa nalesambuṟa wandu wa kishari kya Lewi wawe wekudika isanduku lya mkundana lya Mndumii-Ruwa, wamṟundie cha wakohanyi na iwikia wandu mboṟa kui rina lyake mṟasa inu kudi.

⁹ Nkyo kimaduma kishari kya wandu wa Lewi wawode kioṟa kya teri iya orukenyi handu hamu na wana wa mayawopfo; kindo waleambia nyi wuindi wowa wakohanyi wa Mndumii-Ruwa chando Mndumii-Ruwa, Ruwa onu aleteṟia.

¹⁰ Njilekaa kulya fumvuhu mkonu makumi haana, kio na mfiri, cha lilya mawokioonyi. Mndumii-Ruwa nalenjiichose kamba lya kawi na injiidikia nalamurumatse.

¹¹ Numa kanjiwia, “Kure noengeṟe ihenda na kyaṟo kyapfo kochiteteṟa wandu kundu waidime iida na ichilia oruka lulya njileliia nyamu waku wanu ke njechiwainenga.”

Kindo Ruwa akundi

¹² “Wulalule, lanye Waisraeli, nkiki Mndumii-Ruwa, Ruwa onu, akundi konu, sile nyi iindia Mndumii-Ruwa, Ruwa onu, iosha njia tsake tsose, imkunda, iṟundia Mndumii-Ruwa, Ruwa onu, na ngoo yose, na mrima fopfo fose,

¹³ na iindia mawawaso na mndumbuye ya Mndumii-Ruwa njikeri imuinengia inu, kui kipfa kya kiira kyanu?

¹⁴ Ambuya, ruwehu tane ruwehu tsa ruwehu nyi masaa ha Mndumii-Ruwa, Ruwa onu, wuyana na isho shose shiipfo.

¹⁵ Kingise Mndumii-Ruwa nawekundi wandeanu necha kamusambuṟa nyo muiluwa lyawo handu ha wandu wengi wose, cha inu.

¹⁶ Ko ikyo, dinenyi njonyi tsa kitaṟe kya mrimayo yanu, mlawese watimbiri.

¹⁷ Kyamba Mndumii-Ruwa, Ruwa onu, nyio Ruwa o maruwa na Mndumii o wandumii. O nyi Ruwa mnene na menyipfinya, naoweshie; ekekundiapfo, manya ekeambia kitsutsumopfo.

¹⁸ Nekewutia mngweda na mkusu kya sumhana; kingise nakundi mhenu na imnenga kelya na nguo.

¹⁹ Kyasia, kundenyi wahenu kyamba nanyo daa muwei wahenu orukenyi lo Misri.

²⁰ Adapfumenyi Mndumii-Ruwa, Ruwa onu, mṟundienyi; itumanenyi nao na ilya nyamu kui rina lyake.

²¹ O nyi kiṟumi kyanu; nyio Ruwa onu sa alemuwutia mbonyitsi tsing'anyi na tsiṟihishie muletsiwona kui meso hanu nyo muwenyi.

²² Kiheri waku wanu walehenda Misri, waweshikie wandu makumi mfungade tupu, kyaindi wulalu Mndumii-Ruwa, Ruwa onu, amemupfumbutsa mukafo cha nyenyeri tsa ruwehu.”