NGUMBUO YA MAWAWASO 1 - Bibilia Kui Mdedie fo Kimochi

Mawuto ha Moabu hahambose

¹ Kitapuki kiwode madedo Mose alewia wandu wose wa Israeli kiheri wawei kulya nuka ora lo ngamenyi lo meda fo Yordani. Wawei kulya pichinyi lya Yordani kufui na Sufu kiidi kya mṟifo Parani ora lumu na mṟifo Tofeli, Labani, Hazerothi na Dizahabu ora lungi,

² (nyi mchumie fo mfiri ikumi na fumu kuwuka fumvuhu lya Horebu tane Kadesh-barnea koida njia ya fumvuhu lya Seiri).

³ Mfiri fo kuwoka fo meri fo ikumi na fumu, maka fo makumi haana, wameuka Misri, Mose nalewia wandu orio kindo Mndumii-Ruwa alembawasa nawawie.

⁴ Nalewuta ado Mndumii-Ruwa amewinga Sihoni mangi ya Waamori awekekaa mṟinyi fo Heshboni, na mangi Ogu o Bashani awekekaa mṟinyi fo Ashtaroti na Ederi.

⁵ Mose nalewoka iongoya wandu mawawaso ha-Mndumii-Ruwa; mandi wawei mataya ya kawi ya Yordani. Kawawia kudi:

⁶ “Kiheri luwei fumvuhu lya Sinai, Mndumii-Ruwa, Ruwa odu naleluwia kudi: Momekaa kiheri kileshe kunu fumvuhu;

⁷ wulalu irenyi nzohoṟa tsanu muire kyaṟo. Hendenyi Orukenyi lo mafumvu ha Waamori na Wambaṟa ya oruka lo mṟasenyi kulya Araba, mafumvuhu na mapichinyi, ipfo Negebu na njora tsa wambaṟa ya ipalyipalyi; ee-daa hendenyi tane oruka lo Kaanani na lo Lebanoni tane kulya medenyi fung'anyi fo Eufrate.

⁸ Orukalo lose nyilo njilemuinenga inyi. Kyasia hendenyi iluikolonyia orukalo sa inyi Mndumii-Ruwa njileliia waku wanu nyamu Abrahamu, Isaki, Yakobo na luwa lyake ke njechiwainenga.”

Mose asambuṟa wedumbuo mondu

⁹ Mose kawia wandu, “Kiheri luwei kulya fumvuhu lya Sinai, inyi njilemuwia njidi, ‘Iṟunda lyemusongoyanyo lying'anyi mnu nakamu koko inyi njimonyi.

¹⁰ Mndumii-Ruwa, Ruwa onu, amemupfumbutsa; inu mofo cha nyenyeri tsa ruwehu.

¹¹ Mndumii-Ruwa, Ruwa o waku wanu, nakemupfumbutsa muengeṟeke ka kiku ngoseṟa ya chandu mushikie wulalu na namuwikie mboṟa chandu aleteṟia.

¹² Kyaindi inyi njimonyi njeidima njida ikudika mhandafo mlemeri fodeda mondu yanu?

¹³ Sambuṟenyi kuwuka orio kishari wandu wawode osaaṟe, oloho na wulaanyi kundu njiwasambuṟe wawe wasongoru wanu.’

¹⁴ “Nyo muleidikia, mukanjihaluo mudi; Kindokyo ohamba kiwode oloho!

¹⁵ Ko ikyo njileduo wasongoru walya wawode osaaṟe na wuṟango na wulaanyi sa mlenjisambuṟia kuwuka ipfo shisharinyi shanu, ngawatana wawe wasongoru wanu. Njilewatana wengi wesongoya matorito ha shidenyi ha wandu shiku na shiku, na wa wandu mahana na mahana, na wa wandu makumi hatanu hatanu, na wa wandu ikumi ikumi. Njilesambuṟa wanene wengi weringa orio kishari.

¹⁶ “Kiheri na ikyo njileinenga wedumbuo mondu wanu mawawasoha: Adanyienyi mondu ya wandu wanu. Wikenyi mdumbuye ya sungusihu kiidi kya shiloyano sha wandu wanu, na kiidi kya mapongano ha wahenu wai kiidi kyanu.

¹⁷ Mlakundie mnducho oose kiheri kedumbuo mondu; mochiwaadanyia kulaipfo ikundia, wang'anyi na watutu. Mulaowesho nyi fana ya mndu, cha kipfa kimuwaṟi iwika mndumbuye handu ha Ruwa. Kukokaapfo mondu sa fung'anyi fukamulemia ifudumbuo mochifunjiendie inyi na inyi njifuadanyie.

¹⁸ Kiheri na ikyo ikyo, njilemuwawasia mbonyi tsose tsimuwaṟi iwuta.”

Walokitala wadumo wawuka Kadeshi Barnea

¹⁹ “Kyasia, chandu Mndumii-Ruwa, Ruwa odu alelututuma, lulewooka kyaṟo kya kuwuka fumvunyi lya Horebu, lukaida kiidi kya nuka iya ing'anyi na ioweshie muiichi, lukaosha njia wohenda mafumvunyi ha Waamori. Loikishika Kadeshi-barnea,

²⁰ inyi njilemuwia: Wulalu moshika orukenyi lo mafumvu ha Waamori sa Mndumii-Ruwa, Ruwa odu, aleluinenga.

²¹ Ambuyenyi, Mndumii-Ruwa, Ruwa onu, amemuteseheṟia orukalu mesonyi hanu. Ailo! Idenyi napfo muluchilie chandu Mndumii-Ruwa, Ruwa o wameku wanu alewawia. Mulaowuo manya mulaneneuke.”

²² Lyefurumia nyo mose mulecha na koko mukanjiwia, “Ludume wandu wasonguo, watiichie orukalo, numa wache iluwia chandu lochiida napfo na mṟi lochiikoyapfo.

²³ Mbonyiyo ilenjichihia, ngasambuṟa wandu ikumi na wawi, mndu umu umu kuwuka orio kishari.

²⁴ Wanduwo walehenda kulya orukenyi lo mafumvu, wakashika pichinyi lya Eshkoli na ilitiichia.

²⁵ Kiheri walewuya, waleluendie ndunda maata tsa orukalo na iluwia ke orukalo Mndumii-Ruwa, Ruwa odu ailuinenga nyi lui lucha.

²⁶ “Kyaindi nyo mulekiosha iwawaso lya Mndumii-Ruwa, Ruwa onupfo; muleleha ihenda ipfo orukenyi.

²⁷ Mulenunuwia ipfo mahemenyi hanu mochihamba, “Mndumii-Ruwa nalusuo nkyo kimaduma aleluwuta kulya orukenyi lo Misri. Nawekundi iluwika mawokonyi ha Waamori waluarise.

²⁸ Nki ili lochihenda ipfo orukenyi lo kyasa lui wapfiie nyi mdo kui wuowu? Waleluwia ke wandu waipfo nyi wawode mkuura na waleshe kota. So, na mṟi yawo ing'anyi iwode njomombo njileshe tsishikie ruwehu. Kingise walewonapfo luwa lya Anaki!”

²⁹ “Kyaindi inyi njilemuwia ke Mulawado nyi wuowu ma iowuo wanduwo.”

³⁰ Mndumii-Ruwa, Ruwa onu, icho ekemusongoya, o amonyi nechikapana handu hanu chandu alewuta oshangunyi lonu kulya Misri na

³¹ kulya nuka mkawona chandu alemuira kiidi kya kyaṟokyo kyose kipuo; chandu ndeye o mndu ekeduo mana oke tane moshika iya.

³² Ma chandu njilehamba isho shose, nyo muleidikia Mndumii-Ruwa, Ruwa onupfo,

³³ icho alemusongoya njienyi na imuteseheṟia handu hewika mahema hanu. Kio kamusongoya kui modo na mfiri kui ipuchi, echimuloṟa njia.”

Mndumii-Ruwa akapa Waisraeli

³⁴ “Mndumii-Ruwa naleicho shinunuwo shanu, kasuo, kalya nyamu kechihamba;

³⁵ “Kuwode ma umu onu o kishariki kiwicho echiida na kulya orukenyi lucha njilewika kyasa keinenga waku wanupfo.

³⁶ Kalebi mana o Yefune nyio tupu echiwona orukalo; njechimnenga orukalo naide napfo luwe loke o amonyi na luwa lyake kipfa nalenjihendelia mnu nakamu.”

³⁷ Mndumii-Ruwa nalewenjisuuya inyi daa kipfa kyanu, kahamba, “Manya iyo Mose ochiida na ipfo orukenyipfo.

³⁸ Kyaindi mtarami opfo Yosua mana o Nuni, nechiida napfo. Kyasia, mbanze kipfa nyio echisongoya Waisraeli waikolonyie orukalo.

³⁹ Numa Mndumii-Ruwa kaluwia so lose, “Wanawo wanu watutu muiowuo ke wechiwa wapfungo wa shida wa wakituwa wanu, ee daa wananguwo walamemanya kicha na kiwicho, iwo nyiwo sa wechiida napfo, na inyi njechiwainenga orukalo luwe lowo.

⁴⁰ Kyaindi nyo, halukenyi muwuye na nuka woambuya Ipalyipalyi lya Shamu.”

⁴¹ Numa mkanjiwia, “Mose, so lulewutia Mndumii-Ruwa wunyamaṟi. Kyaindi wulalu lochikure luhende ikapana chandu Mndumii-Ruwa, Mndumii odu aleluwawasa, ‘Ko ikyo orio umu onu kakuṟeheṟa ikapana shidenyi;’ cha kipfa mulekusaṟa ke kiwewa kindo sa kiangu iwada orukalo lo mafumvu.”

⁴² Nao Mndumii-Ruwa kanjiwia, “Wia wanduwo walahende ikapana cha kipfa njikeri nawopfo; walahende, walashike iwingo nyi wakituwa wawo.

⁴³ Na inyi njilemuwia njido, kyaindi nyo mulaadanyie. Mukaleha iosha iwawaso lya Mndumii-Ruwa mulakusaṟe, mukaida na ipfo orukenyi lo mafumvu.

⁴⁴ Nahong'u Waamori wawekekaa handuho ha orukenyi lo mafumvu wakasoka wakamukapa ipfo Seiri tane Horma chandu njuki tsekerahanyitsa wandu.

⁴⁵ Nlyondi mulewuya, mkafihiṟia Mndumii-Ruwa kyaindi Mndumii-Ruwa nalamuadanyie ma nalamusaṟie.

⁴⁶ Kyasia mukakaa ipfo Kadeshi ko kiheri kileshe.”