NEHEMIA 9 - Bibilia Kui Mdedie fo Kimochi

Wandu watocha njonyamaṟo tsawo

¹ Nalyo mkonu fo makumi hawi na kaana (24) fo meri fo mfungade, Waisraeli wakakoyana, wakakuotoya wechiṟaa makunyia na ikushia mafu mdonyi yawo wechiloṟa mtochie.

² Mandiho wana wa Israeli nyi walekaa haleshe na wandu wa mkambo ingi wahoṟoki wakatocha njonyamaṟo tsawo na tsilya tsa waku wawo.

³ Ambuya nyi walehoṟoka handu ha saa tsiṟaṟu wechisomio mawawaso ha Mndumi- Ruwa, na handu ha saa tsiṟaṟu wakatochia Mndumii-Ruwa owo njonyamaṟo tsawo na iindia Mndumii-Ruwa owo.

⁴ Nalyo kukakaaho handu hehoṟokia ha Walewi, wakahoṟoka Yeshua, Bani, Kadmieli, Shebania, Buni, Sherabia, Bani na Kenani, nawo wakaterewa Mndumii-Ruwa, Ruwa owo ko ṟu ling'anyi.

⁵ Nalyo Walewi; Yeshua, Kadmieli, Bani, Hashabea, Sherebia, Hodia, Shebania na Pitahia wakawia wandu wadi:- Hoṟokenyi muṟumishe Mndumii-Ruwa, Ruwa onu; Mṟumishenyi mlungana na mlungana, wandu waṟumishe rina lyapfo linene, nalyo liwode kiṟumi kota mboṟa na kiṟumi kyose.

Kiterewo kya mtochie

⁶ Nalyo Ezra katerewa kiterewoki: Hoi Mndumii nyi iyo kumonyi ukeri Mndumii-Ruwa, nyi iyo kumonyi ulewika ruwehu na mbahanyi tsake tsose, wuyana na isho shose shikeripfo, mapalipali na isho shose shikeripfo, nyi iyo ushiinengie moo, na mbahanyi yoose ya ruwehu nyi ikeri ikuṟumisha iyo.

⁷ Iyo Mndumii-Ruwa, Ruwa ulesambuṟa Abramu, kowemmbuta kulya Uri lo Wakaldayo na imnenga rina Abrahamu.

⁸ Kowembona ke nyi awei mhendeli oshangunyi lopfo, kowembikia kyasa ke nyi ochiinenga oshari loke oruka lu lo Wakaanani, Wahiti, Waamori, Waperizi, Wayebusi na Wagirgashi. Naiyo koweawutsia kyasa ki kyapfo, kyamba nyi ukeri mhendeli.

⁹ Kowewona shituro sha waku wadu kiheri wawekeri orukenyi lo Misri, kikashika kiheri walekufihiṟia kulya ipalyipalyinyi lya Shamu, kowewaadanyia.

¹⁰ Nalyo kowuta maṟiho na shichano huye ya Farao, waṟundi wake wose na wandu wose wa Misri, nyi kipfa ili uweichi chandu waletuura waku wadu. Kowekuwonyia kiṟumi ki kikeripfo itane inu.

¹¹ Ambuya nyi uleletsana ipalyipalyi makidi hawi o oshangunyi lowo, nawo wakakuidia makidi hawi hahadutsu. Kyaindi kowihitsa Wamisri walya walewaosha, cha ili okumba iho mṟingenyi fufoi.

¹² Kowesongoya mfiri na ngo ya ipuchi, na kio kowasongoya na ngo ya modo, ikawalimikia hando wekuidia.

¹³ Kowededa nawo wuka fumvunyi lya Sinai, handu ulewasokia. Kowainenga mawawaso mecha na mapfundo mecha.

¹⁴ Kowewaloshase iindia mkonu fo Sabato, na owokonyi lo mṟundi opfo Mose kowainenga mawawaso hapfo.

¹⁵ Mandi walewodo nyi njaa, kowaihutsa ko kelya kiwukie ruwehu. Kiheri waleangaa, kowarutsa mṟinga fuwukie ihohu lya iṟaṟa. Kowewawia wawade oruka lulya ulewawikia kyasa.

¹⁶ Kyaindi wo na waku wadu wakawada ngoo njiumu, wakaleha iosha mawawaso hopfo.

¹⁷ Wakaleha iosha; walakikumbuo ṟiho uletsiwuta kiidi kyawo. Wakawada mrima njiumu, nalyo wakasambuṟa mṟundi mowawihiṟa wusingenyi kulya Misri. Kyaindi iyo nyi Mndumii-Ruwa okehoṟia, uwode isaṟia na ikunda, manya ulekewado nyi nyashi owinyi. Isaṟia lyapfo nyi ling'anyi; ulakunde iwawihitsa.

¹⁸ Wakasungusia ihache lya sahabu, nawo wakahamba, “Ichu nyio Ruwa alewawuta kulya Misri.” Nyi wudo walekupfulutsa nyashi Hoi Mndumii.

¹⁹ Na iyo kui isaṟia lyapfo ling'anyi ulewawihitsa kulya nukapfo, manya kulewuta ipuchi lilya liwekewashikia mfiri na ngo iya ya modo iwekewasongoya ili kio uleiwuta hopfo.

²⁰ Ambuya kui ikunda lyapfo kowaloṟa kilya ki wawaṟi iwuta, kowewaihutsa ko mana, na iwarutsa mṟinga fonyo.

²¹ Ambuya ko maka makumi haana (40), walekaa kulya nuka ya msanga, nyi ulewainenga orio kindo kyose kiwewawaṟi, nguo tsawo tsilekuopfo, manya madende hawo haleshimba-pfo.

²² Lingise, kowainenga iwinga wamangi wa mkambo ya wandu, wa njoruka tsilya tsiwekeri mṟasenyi nawo. Wakawinga oruka lo Heshiboni, luwelusongoye nyi mangi Sihoni, na oruka lo Bashani luwei lusongoye nyi mangi Ogu.

²³ Ambuya nyi ulefeeṟa wana wawo cha nyenyeri tsa ruwehu, kowaende na orukenyi lulya ulewikia kyasa waku wawo.

²⁴ Kyasia wakawinga oruka lulya lo Kaanani, kowinga wandu walya wawekeri kiidi kya oruka lu, Koweinenga wandu wapfo pfinya yewuta chandu wakunda, na wandu wo hamu na wamangi wawo.

²⁵ Ambuya wandu wapfo nyi walewada mṟi iwode njomombo, iwode wusuṟi wung'anyi, mba njicha tsiweichuo shindo shifoi, maṟungu ha mṟinga haweimasume, madema ha msabibu ha wafuda ha msinepfu, handu hamu na mashidi hengi hawewode ndunda tsifoi, koikyo nyi walelya, isho shose wakaihuda na inuo. Wakachihio mnu kipfa kya wucha wopfo.

²⁶ Kyaindi wandu wa walekuhendelia-pfo, wakakuleha, wakaweleha mawawso hapfo, wakawewaha waikimbi walya walewaikimba ikuhalukia, nawo wakawuta mawicho hang'anyi mnu.

²⁷ Kipfa kya ikyo kawada wakaoloka mawokonyi ha wakituwa wawo, nawo wakawalisa wukiwa kiheri waletuuro wakakufihiṟia kundu uwasaṟie, na iyo kowewaadanyia ukeri ipfo ruwehu. Ko isaṟia lyapfo kowewadikia waṟundi wawaashuo mawokonyi ha wakituwa wawo.

²⁸ Kiheri ofoṟo lulewuya, wakawekunyamaṟia se, na iyo kowewada wakituwa wakawawinga. Indise kiheri waledumbuya na ikuterewa uwaashuose, kowewaadanyiase ukeri ipfo ruwehu; Iyo ku isaṟia lyapfo ling'anyi mnu, kowewakiṟa kafoi.

²⁹ Kowaikimba waindie mawawaso hapfo. Kya indi kipfa kya mrima yawo injiumu, walaikunde iindia wuwawaso wopfo, kyamba ichu moindia wuwawaso wopfo nyi sa echikaa na moo. Nawo ko orikiki lowo, walakunde iicho ang'u iwa wahendeli.

³⁰ Ambuya ko maka ifoi, nyi ulewaikimba ko wuhoo, koweduma waikimbi wapfo wawaikimbe, kyaindi wandu wapfo walakunde iwaadanyia. Koikyo na iyo kowewada, wakawingo nyi wandu wa mkambo ingi.

³¹ Manya kudo, kipfa kya isaṟia lyapfo ling'anyi, ulekunda iwawihitsa na iwaṟahanyitsa-pfo, kyamba iyo nyi Ruwa uwode isaṟia na wuhoo.

³² Hoi Ruwa, Ruwa odu, iyo nyi ui mnene, nyi uoweshiye, nyi ui mwampfinya, iyo nyi okeringa mkundana fopfo, na shiasa shapfo kuwokia kiheri wamangi wa Ashuru wawelutuura, mṟasa inu nyi lui kituurionyi, mangi tsadu, wanene wadu, wakohanyi wadu na waikimbi wadu, waku wadu na wandu wadu wose, nyi waletuuro.

³³ Ambuya chandu ulelukapa nyi kisumhanyi, cha kipfa iyo nyi ui mhendeli, kyaindi so luwei wewuta wunyamaṟi.

³⁴ Wamangi wadu, wanene wadu, wakohanyi wadu na waku wadu, waleosha wuwawaso wopfo-pfo, manya walesaṟa na iadanyia chando ulewaloshapfo.

³⁵ Waleidima ikuṟundia kiidi kya wumangi wo wopfo, manya chando walechihio kiidi kya shindo shifoi shicha ulewainenga, kiidi kya oruka lulya lucha ulewainenga, waleidima ida mawuto halya hawo machichopfo.

³⁶ Ambuya wulalu nyi lui masinga, kiidi kya oruka uleluinenga, oruka sa lulucha lukeri uluinenga shelya.

³⁷ Kipfa kya wunyamaṟi wodu, wusuṟi wose wo oruka lu nyi wudao nyi wamangi, walya ulewawika huye yadu, wakaweluwutia chandu wakunda, na shuma shadu, wakawekuwutia chandu wakunda, so lukadeo fowenyi ing'anyi.

Wandu wawika mkundano

³⁸ Kipfa kya shindo shi shose shilewutika, so Waisraeli nyi lowika mkundana ko maṟeho na wanene wadu, Walewi, na Wakohanyi wadu waṟingishie ho kui maṟeho.