NEHEMIA 8 - Bibilia Kui Mdedie fo Kimochi

Ezra asomia wandu wuwawaso

¹ Nalyo wandu wose wakadamia handu hamu ko mrima fumu alya osehu lo Mongo fo Mṟinga, nahong'u wakawia Ezra ulya awei mṟehi naende kitapu kilya kya mawawaso ha Mose halya Mndumii-Ruwa aweinengie Waisraeli.

² Kyasia Ezra ulya awei mkohanyi kaende kitapu kilya kya mawawaso oshangunyi lo mamingi fulya fo wandu fuwewode womi na waka na ulya oose echiidima iadanyia na imanya mawawaso ho. Iki nyi kilewutika mfiri fo kuwoka fo meri fo mfungade.

³ Kyasiang'u Ezra kasomia wandu wose womi na waka na ichu oose aidima imanya mawawaso ho osehu lo Mongo fo Mṟinga, kuwokia ngamenyi itane mfiri na wandu wose wakaadanyia ko wuhidi mawawaso halya ha Mose.

⁴ Nao Ezra mkohanyi kahoṟoka mimbaṟanyi waleisungusia ko iṟundalyo na ora loke lo kulyo wawehoṟokiho Matithia, Shema, Anaya, Uria, Hilkia na Maasia; na ora loke lo kumoso wawehoṟokiho; Pedaya, Mishaeli, Malkia, Hashumu, Hashibadama, Zekaria na Meshulamu.

⁵ Ezra kahoṟoka alya mimbaṟenyi oshangunyi lo wandu wose, nawo wakamwadanyia ko wuhodi wung'anyi. Kyasia Ezra kekipfunguo kitapu kilya kya mawawaso mamingi fulya fo wandu fukahoṟoka.

⁶ Ezra kaṟumisha Mndumii-Ruwa ai mnene na wandu wose wakaidikya Ameni! Ameni! Wakawehoṟuo mawoko hawo huye, na iharamisha shamu shawo mṟasa wanda wechiindia Mndumii-Ruwa.

⁷ Kyasia kukawekaapfo Walewi waletarama wandu waidime imanya necha mawawaso, nawo nyi Yeshua, Bani, Sherebia, Yamini, Akubu, Shabetai, Hodia, Maasea, Kelita, Azaria, Yozabadi, Hanani na Pelaya nawo nyi waleṟunda wadi wandu wo wakerioo handu wawehoṟoki.

⁸ Kyasia wakasoma necha mawawaso ho ha Mndumii-Ruwa na ihatahambaluo na wandu walya wakahamanya necha.

⁹ Naalyo wandu wo wekiicho mawawaso ho ha Mndumii-Ruwa, wakakoṟo mṟimenyi yawo wakafihiṟa. Nehemia ichu awei mnene owo na Ezra awei mkohanyi na mṟehi, hamu na Walewi walya wawekeri ilosha wandu wakawia wandu walya wose, “Mkonu fu nyi fui mwele ko Mndumii-Ruwa, Ruwa onu, koikyo manya mulawone mochifihiṟa ma isokio nyi fowa.”

¹⁰ Hendenyi kanyi konu musungusie mfuho fung'anyi, mukulie shindo shinoru, muwekunyoya na mvinyo sa mcha, kyaindi ambuyenyi muwekumbuo iinenga walya walawode kishikie, kyamba mkonufo nyi fukeri mwele ko Mndumii-Ruwa odu manya mulawone mochisumukia kyamba sia yo Mndumii-Ruwa amwinenga nyi yo pfinya yanu.

¹¹ Kyasia Walewi wakalembalemba wandu wechiwawia, “Ketsienying'u kya mkonu fu nyi fukeri mwele, manya mamlasokio nyi fowa!”

¹² Nalyo wandu wose wakakuwuya na kanyi wakakulia na ikunyoya wai wachihie, wakawehawia walya walawode shelya, kyamba nyi walemanya shilya shose waleongoyo.

¹³ Ili lya ngama wanene wa shishari handu hamu na wakohanyi na Walewi wakacha na ko Ezra mkohanyi na mṟehi kundu wakuloshe mawawaso.

¹⁴ Nahong'u wakautaho imanya ke nyi kikiṟehie ipfo kitapunyi kya mawawaso ke Mndumii-Ruwa nyi awewawasie Mose kechihamba nyi kiwaṟi wandu wo wakae matengonyi mkonu fo mnene fo meri fo mfungade.

¹⁵ Kyasia wakahenda ionguo mṟinyi yawo na ipfo Yerusalemu wechihamba, “Hendenyi mtsudu muendepfo maṟamba ha mitende, na mitende ha ngeṟenyi, na ha mashidi hengi kundu muhende iwika shitengo chandu kii kiṟehiye.”

¹⁶ Kyasia wandu wakahenda iende maṟamba, wakawika shitengo hafui na mba tsawo, parasenyi ya hekalu, na alya osehu lo mongo fo mṟinga na kiwanjenyi kya mongo fo Efraimu.

¹⁷ Wandu wose walewuya wawuka wusingenyi wakasungusia matengo wakakaapfo. Iki kikawa nyi lya kuwoka wandu wakaa matengonyi wokia Yeshua mana o Nuni awei na moo. Wandu wakachihiyo mnu nakamu.

¹⁸ Orio mkonu Ezra kasomia wandu kitapu kya mawawaso ha Mndumii. Wakakaa mfuhonyi ko mfiri mfungade. Kyasia mkonu fo nyanya wakawika kisanzio king'anyi kemarisia mkonu mnene chandu wawei wawawase.