NEHEMIA 6 - Bibilia Kui Mdedie fo Kimochi

Kyama kewaha Nehemia

¹ Kyasia Sanbalati, Tobia, Geshemu, Mwarabu na wakituwa walya wadu wekiicho ke lulememarisa iwika omombo lulya na iichuṟa manya iya yose (indi luwememarisa iwika mongo ya mongo iya ing'anyipfo).

² Sanbalati hamu na Geshemu wakanjidumia wechihamba, “Lukaoyane mṟinyi fukeri rendewelenyi ya Ono.” Kyaindi nyi wawekusirie injiwutia kindo kiwicho.

³ Nalyo na inyi ngamdumia ndumi njechihamba, “Ambuya nyi njiwode iṟunda ling'anyi mnu njechiidima icha naipfopfo, kyamba ngacha na ipfo iṟundali nyi lechihoṟoka.”

⁴ Kyaindi wakaengeṟa injidumia makamba cha haana wechinjiwia kindo na ikyo na inyi ngawehaluo kudo chando njilewahaluo kuwoka.

⁵ Kamba lya katanu, Sanbalati kanjidumia mṟundi oke na paruo mawokonyi hake.

⁶ Baruo iya iwenjiṟehiye kudi, “Ambuya nyi kimanyikie kiidi kya mkambo ya wandu, na Geshemu nyi ai mṟingishi o mbonyitso, ke iyo na Wayuda nyi mukundi ikuashuo; nkyo kitewe muitambahana iwika omombo na iyo nyi ukundi iwa mangi chando mbonyi tsi tsikeri ihambo.

⁷ Kiṟingishio kya mahiyo hapfo nyi ulewika wakohanyi ipfo Yerusalemu wechionguo kyapfo wechihamba, ‘Ambuya nyi kuwode mangi o Yuda! Ambuya mbonyi tsi nyi tsihenda ishikia mangi Artashasta. Kipfa kya ikyo nyi kiwaṟi iyo na inyi lukoyane kundu luidime ideda kya mbonyitsi.’”

⁸ Kyaindi inyi ngamdumia ndumi ngambia, “Kuwode mbonyi cha itsopfo kyamba mbonyitso nyi iyo kumonyi ukeri itsihamba itsiwuta mdonyifopfo kumonyi.

⁹ Kyamba nyi walewuta wado wechikusaṟa ke nyi lochiowuo naso lulolome lulechiṟundase iṟunda lyi. Nalyo ngaterewa Mndumii-Ruwa njechihamba, ‘Hoi Mndumii unjiwanze.’”

¹⁰ Kiheri njilehenda kanyi ko Shemaya, mana o Delaya mana o Mehetabeli msa alawewode momu fowuka ipfo kanyi nalyo kanjiwia, “Kennde luhende ikoyana kulya mba ya Ruwa lukushingiepfo kyamba kio ki nyi wakundi icha ikuwaha.”

¹¹ Na inyi ngakuwesa mrimenyi foko, “Ngesa mndu cha inyi na kinjiwaṟi idicha? Ngesa mndu cha inyi na kiwaṟi idichia mba ya Ruwa kundu njikae na moo? Ambuya njechiida na hekalunyi manya le pfo.”

¹² Nalyo ngawuta ho imanya ke nyi awei mhuṟe nyi Tobia na Sanbalati kundu waonguo mawicho hako chi Ruwa alemdumapfo.

¹³ Kii kidi nyi aweimhuṟe kundu nanjioweshe kundu njihende ideko. Ngamemaa ideko wawuteho mweke fo nyamaṟa rina lyako na isotsa kiṟumi kyako.

¹⁴ Nalyo ngaterewa Mndumii-Ruwa njechihamba, “Hoi Mndumii keambuyawo shindo Tobia na Sanbalati walewuta, uwe ambuya mwikimbi ulya o kika hamu na waikimbi wengi wose wawekundi injiowesha.”

Iṟunda lyamarisika

¹⁵ Kyasia omombo lulya lukamarisika iwiko mkonu fo makumi hawi na katanu (25) meri fo Eluli, na iṟundali lyose nyi lilemarisikia ko mfiri makumi hatanu na iwi (52).

¹⁶ Kyasia wakituwa wadu kiidi kya mkambo wa ipfo mṟasenyi wekiwona ke iṟunda lyi nyi lilemarisika, wakaowuo na iwodo nyi sonu ing'anyi, kyamba nyi walewuta ho imanya ke iṟunda li nyi lilemarisika kui pfinya tsa Mndumii-Ruwa odu.

¹⁷ Kiheriki kyose wanene wa Wayuda nyi wawekeṟehiana na Tobia.

¹⁸ Wayuda wengi nyi waweoshanyi nao kipfa kya kyasa wawewikianyi kyamba nawei mii o mana o Shekania mana o Ara. Kingise mana oke Yehohanani nyi awealikie mana o Meshulamu, mana o Berekia.

¹⁹ Iwa nyi wawekenjiongoya mbonyi njicha tsa Tobia na imdaya mbonyi tsako nao kawamonjiṟehia paruo tsenjiowesha.