NEHEMIA 5 - Bibilia Kui Mdedie fo Kimochi

Wakiwa wawonyio

¹ Kyasia wandu womi na waka wakawoka inunuwia wana wa wamaawo Wayuda.

² Kukakaapfo wehamba, “Luinengo ngano lulye kyamba so na wana wadu wa kiumi na wakika nyi lufoi.”

³ Kukakaapfo wengi waweihamba, “Ambuya nyi lulerekia madema hadu, msabibu yadu na mba tsadu kundu luinengo shelya kipfa kya njaa.”

⁴ Kukawekaapfo wawekeri inunuwa wechihamba, “Nyi luleakuo fesa tsetaa kodi ya mangi kipfa kya madema na Ngano yadu.

⁵ Kekusaṟewo, mbihu yadu nyi ifananyi na mbihu ya wana wa wama wadu, na wana wadu nyi wawefananyi na wana wawo da, kyaindi lomemaa ihaluo wana wadu masinga. Wana wadu wa kika nyi masinga wulalu. Kuwode chandu lochiidima iwihiṟa kindo ki numa pfo, kyamba madema hadu na msabibu yadu ilemmaa idao nyi wandu wengi ko pfinya.”

⁶ Shinunuwo shi shawo shikanjisuiṟa mnu nakamu.

⁷ Ikyi kikanjiinenga njikusaṟe chandu njewika. Ngawoka iloyana na wanene wa wandu ngawawia, “Nyi mukeri iwonyia wana wa wama wanu.”

⁸ Lingise ngawawia, “Ambuyenyi pfinya i lowode nyi luleidima italaa wana wa wama wadu wawei wakumbe ko mkambo ya wandu, ili nyo nyi mukeri ikumbase wana wa wama wanu naso luhende iwatalaase.” Nalyo wakawa ndiṟi kulakae manya mndu alehaluo kindo.

⁹ “Nalyo ngawawia kindo ki mukeri iwuta kikicha manya le pfo. A ngesa chi kiwewaṟi luindie Mndumii-Ruwa kundu luhende iima wandu wa mkambo wawei wakituwa wadu walalusaluche?

¹⁰ Ambuya inyi njimonyi na wana wa wama wako na waṟundi wako, nyi luwekeakuya wandu ngano na fesa ma lulawawese kiira kyose.

¹¹ Wulalu wawihiṟienyi madema hawo, madema ha msabibu, madema ha mizeituni, handu hamu na mba tsawo na kiira kya fesa na ngano, mvinyo, na mafuda ya shilya shose mulewatosa.”

¹² Nahong'u wakahaluo wechihamba ambuya nyi lochiwawihiṟia, manya lochiwawesa kindo kyosepfo, nyi luhenda iwuta chandu aleluwawasa. “Nalyo ngalaha wakohanyi wache na oshangunyi, ngawalaha wanene wose oshangunyi lo wakohanyi walye nyamu ke nyi wechiawutsia kyasa kyo walewika.”

¹³ Nalyo ngakutakuta mambo tsa nguwo yako ngawawia, oriomndu alechiawutsia kyasa ki, Mndumii-Ruwa na mkute kute ado echimbuta ipfo kanyi koke na iṟudenyi lyake, nakae amkutekute alawode kindo kyose. Nalyo mamiingi fulya fo wandu wakaidikia, “Amenyi,” wakaṟumisha Mndumii-Ruwa wakahenda wakawuta chando walewika kyasa.

Mkao fo Nehemia

¹⁴ Kuwokia kiheri njilesambuṟo njiwe mchili o oruka lo Yuda, kuwokia maka fo makumi hawi (20) itane maka fo makumi haṟaṟu na iwi (32) ya wumangi wo mangi Artashasta inyi na wana wa wama wako lulelya shelya shiwaṟi wanenepfo.

¹⁵ Wanene walenjisongoya wawei mhanda mlemeri ko wandu kyamba nyi wawekewawesa shelya na mvinyo, wakawewawesa wawatae fesa tsilemeri tsiwode shekeli makumi haana (40) tsa fesa. Waṟundi wawo wakawewonyia wandu. Kya indi inyi njilewuta njidopfo, kyamba nyi njiweowoye Mndumii-Ruwa.

¹⁶ Kindo njilepfuṟukanyia nyi iwika wuhya omombo lu koikyo njilewona mwanya fo ipfula demapfo. Lya ngoseṟa waṟundi wako wose nyi waleṟunda iṟunda ko macha hang'anyi.

¹⁷ Ngoseṟa ya ishi, orio mkonu nyi njiwekehutsa wandu ihana limu na makumi hatanu (150), kiidi kyawo nyi Wayuda, na wanene, handu hamu na wahenu walelucheya wawuka ko wamkambo wawei mṟasenyi naso.

¹⁸ Kundu wandu wa waidime ihuda nyi njiwekeshinjio ipung'a limu na suwa tsiṟandaṟu handu hamu na nguku. Orio mfiri fo ikumi nyi njiwekewuta shisoṟo shifoi sha mvinyo. Kyamba wandu wa nyi wawekudikie mhanda mlemeri mnu njilewawesa ngoseṟa ya ishi pfo.

¹⁹ Hoi Mndumii-Ruwa oko ke kumbuowo wusumhanyi wako njilewutia wandu wa.