NEHEMIA 4 - Bibilia Kui Mdedie fo Kimochi

Nehemia awinga wakituwa wake

¹ Kyasia Sanbalati kekiicho ke nyi lowoka iwika ko wuhya omombo lulya nyi alesuo mnu kawoka ilusalucha,

² oshangunyi lo mbuya tsake na mbahanyi tsa Wasamaria kahamba, “Nyi kiki Wayuda wa wafafa wakeriwuta? A ngesa nyi wechiidima iwika se mṟi fu ko wuhya? A wecheidima iwuta shidaso ngesa? Ngesa nyi wechiidima imarisa iṟunda lyi ko mfiri fumu? A ngesa wechiidima isanyiase maho ho hakuumbiṟie ipfo mawiwenyi kundu halekoṟio haweidimase iwika mba.”

³ Nawudo Tobia, Mwamori nyi awehoṟoki afui nao kaweiria ṟu kahamba, “Nyi kiki wakeriwika? Kokoya ipara lyadoya huye ya omombolo lowo nyi lochioloka.”

⁴ Kyasia ngaterewa Mndumii-Ruwa ngahamba, “Hoi Mndumii keambuya wo chandu wakeri ilutaluo, kewatae shitaluo sho shawo huyawo, kochiwaleka wadao wusingenyi oruka luhenu.

⁵ Manya ulawahoṟie wuwicho wo wowo wunyamaṟi wowo kyamba nyi wakusuiṟa iyo oshangunyi lo walya wakeri iwika mbai i.”

⁶ Kyasia lukaengeṟa iwika omombo lulya itane makidi hawi halo, kyamba wandu walya wawekeri iwika nyi wawewode mrima fo ṟunda.

⁷ Kyasia Sanbalati, Tobia, Waarabu, Waamoni na Washidoni wekiicho ke iṟunda lyesungusia omombo tsilya tsa Yerusalemu nyi tsihenda necha na kulyando kuwewundukie komeachikio necha, wakasuo mnu.

⁸ Wakawika kyama handu hamu kyecha ikapa Yerusalemu kundu luṟahanyike.

⁹ Kyasia ko ora lodu lukaterewa Mndumii-Ruwa, lukawewika waringi weluringa kio na mfiri waidime ilimbana nawo.

¹⁰ Wayuda nawo wakawoka inunuwa wechihamba, “Ambuya iwa weṟunda pfinya tsawo nyi tsahenda tsechitutia, napfo nyi kutsuhae mbosha ifoi yekudika. Luidima se iwika omombo lo pfo.”

¹¹ Nawo wakituwa wadu wakahamba, “Ambuya wechiidima imanya ma iluwonapfo mṟasa ili lochishika kiidi kyawo luwawahe na ifuṟunja iṟundalyo lyawo.”

¹² Kyasia Wayuda walya wawekekaa kiidi kya wakituwa wo wadu wechiicho madedoho wakacha ilututuma kafoi wechihamba, “Ambuya nyi wechimuchea wuka njora tsose wakekaa wache ilukapa.”

¹³ Kyasia wanda ya njomombo tsilya tsilamemarisikie na numa ya omombo alya hando kulawemeshikio ngawikapfo wandusumhana na shishari shawo weringa wawode njoshu, mapfumu na uda.

¹⁴ Kyasia kiheri njilewona ke wandu nyi walewado nyi wuowu naalyo ngawia wanene wo wa wandu namashehe na wandu wengi wose, “Manya mlaowuo manya kitutu. Kumbuonyi ke Mndumii nyi ang'anyi nao nyi aoweshie, koikyo kapanenyi kipfa kya wana wa maeanu, na wana wanu wa kika, waka wanu na mba tsanu.”

¹⁵ Kyasia wakituwa wadu wekimanya ke nyi lulemanya kyama kilya kyawo, wakawemanya ke Mndumii-Ruwa nyi alefurunja kyama kilya kyawo, nalyo so lukawuya kulya omombonyi lochiengeṟa iṟunda orio mndu na iṟunda lyake.

¹⁶ Kyasia kuwokia kiheri kyo kyenga kya waṟundi wako wakaṟundia omombo na kyenga kyawo kikaṟunda iṟunda lyeringa wechiwada mapfumu, ngao, wuda, maṟao heringa shipeeta. Wanene wose wakakaa ora lo mba ya Yuda.

¹⁷ Walya wawewika omombo. Walya wekudika shindo shewika mba iya wakaengeṟa iṟunda ko owoko lumu wakawada shindo shewika mba na ko owoko lungi wakawada shindo sha shida.

¹⁸ Orio mowika mba nawekupfungie oshu loke kitsinyi kyake na kunu nakeri iwika na mndu mokapa iranda kakaa kufui na inyi.

¹⁹ Nalyo ngawia wanene walya na wandu wose ke iṟunda li ling'anyi mnu naso nyi lukuṟaṟanjie huye ya omombo na orio mndu nyi akeri haleshe na odoe.

²⁰ Koikyo lukae handu hamu lose lukaicho iranda likapo nyi ochidichia iya handu lukeri. Mndumii-Ruwa odu nyi nyechilukapanyia.

²¹ Nyi wudo luleengeṟa iṟunda lyadu, kyenga kya wandu wakawada shisha sha shida wokia ngamenyi mṟasa kio nyenyeri tsambono ipfo ruwehu.

²² Kiheri kyo ikyo ngawewiase wandu, orio mndu msoṟo hamu na mṟundi oke nyi wechikaa kunu Yerusalemu kio kundu luringe kio na mfiri luwuye na iṟundenyi lyewika.

²³ Kyasiang'u inyi na wana wa wama wako, waṟundi wako na waringi walya waleoshana na inyi, lulekuonjuo nguwo tsadupfo, orio umu odu nyi alewada kisha kyake owokonyi.