NEHEMIA 3 - Bibilia Kui Mdedie fo Kimochi

Omombo lo Yerusalemu lowiko ko wuhya

¹ Kyasia mongo Fulya fo Machondi fukowiko ko wuhya nyi Eliashibu, mkohanyi ang'anyi hamu na wana wa mae wawei wakohanyi. Wakafushimbuo na iwihiṟiapfo mongo iya yalo, wakawewika se mnaṟa Fulya fo Ihana limu (100) itane mnaṟa fo Hananeli.

² Wandu wa Yeriko wakawika ko wuhya kyenga kilya kileosha. Numa ya iwo kaosha Zakuri mana o Imri iwika omombo lulya.

³ Kishari kya Hasena kikawika mongo fulya fo Makunga, wakawikapfo maboriti hake, na ihoṟotsa mongo iya yake na menya tsake na sombo tsake.

⁴ Kyenga kileosha kikawiko nyi Meremothi, mana o Uria, mana o Hakosi. Kyenga kingi kikawiko ko wuhya nyi Meshilamu, mana o Berekia, mana o Meshezabeli. Kenga kileosha kikawiko ko wuhya na Zadoki, mana o Bana.

⁵ Kyenga kileosha kikawiko nyi wandu wawukie mṟinyi fo Tekoa. Kyasia wanene wa mṟi fulya wakaleha iṟunda lyose lya mawoko walewio waṟunde nyi walya wehoṟokia.

⁶ Mongo fulya fo kacha nyi fulewiko ko wuhya na yodaya, mana o Pasea handu na Meshulamu ai mana o Besodeya, iwa wakawikapfo maboriti halya hayo, mongo, hamu na sombo tsaho.

⁷ Wandu waleosha kya iṟunda lyi lyewika wuhya nyi Melatia, Mgibeoni, Yadoni, Mmeronothi hamu na wandu wa mṟi fo Gibeoni na Mispa, iwa nyi wawei wandu wa mnene o oruka ora lulya lo kyukanyi lo meda fo Efurate.

⁸ Kyenga kileosha nyi kilewiko ko wuhya nyi Uzieli mana o Harkaya, moela zahabu. Kyenga kileosha mṟasa omombo lulya lulandari nyi lulewiko ko wuhya nyi Hanania, ulya ekesungusia shindo shepfaama.

⁹ Kyenga kileosha kikawiko ko wuhya nyi Refaya, mana o Huri, ichu nyi awei mnene o kyenga kya oruka lo Yerusalemu.

¹⁰ Kyenga kileosha kiweambatsanyi na mba yake nyi kilewiko ko wuhya nyi Yedaya, mana o Haramafu. Kyenga kileosha nyi kilewiko ko wuhya nyi Hatushi, mana o Hashabneya.

¹¹ Kyenga kileosha hamu na mnaṟa fo Tanuru nyi shilewiko ko wuhya nyi Harimu hamu na Hashubu mana o Pahath - moabu.

¹² Kyenga kileosha nyi kilewiko nyi Shalumu, mana o Haloheshi, awei mnene o kyenga kya kawi kya oruka lo Yerusalemu. Ichu wana wake wa kika wakamwikanyia iṟundalyo.

¹³ Mongo fulya fo pichinyi fulewiko ko wuhya nyi Hanuni handu hamu na wandu wa mṟi fo Zanoa. Wakasungusia necha mongofo, wakawewikapfo cherenyee na sombo tsafo, wakawika ko wuhya omombo lulya ko wuleshe wo meta mahana haana (400) kudi mṟasa mongo fo Kyala.

¹⁴ Mongo fulya fo Kyala nyi fulewiko ko wuhya na Malkia, mana o Rehabu, mnene o kidembo kya Bethlehemu. Kawewika necha mongo fulya handu hafo kawesungusia cherenyee na sombo tsaho.

¹⁵ Shalumu, mana o Kolhoze, mnene o kidembo kya Mispa nyi alewika ko wuhya mongo fulya fo Soka Aska kaishikia kawewika mongo huye yake kawewikapfo cherenyee na sombo tsake. Nduwa iya ya Shela kasungusiapfo omombo kufui na bustani ya mangi mṟasa ngasi tsilya tsesoka tsiwuka mṟinyi fo Dawidi,

¹⁶ nduwa na mba tsilya tsa mbahanyi nyi tsilewiko nyi Nehemia ai mana o Azbuki, mnene o kyenga Kidembo kya Bethsuri.

Walewi walewika omombo

¹⁷ Iwo wamarisa Walewi wawo wakawoka iwika ko wuhya omombo wulya. Rehumu mana o Bani kawoka iwika ko wuhya, oo na Hashabia, mnene o kyenga kya Kidembo ya Keila, msa nalewika ko wuhya ora lulya luwesumhanyi na kidembo kyake.

¹⁸ Numa ya ichu alya hando kuleosha kukawiko ko wuhya na wana wa mayawo. Iya ileosha ikawiko nyi Bavai, ai mana o Henadadi, mnene o kyenga kya Kidembo ya Keila.

¹⁹ Ora luitumanyi nalo sumhana na mba ya shisha sha shida kufui na omombo Ezeri kaluwika ko wuhya ichu ai mana o Yeshua mnene o Mispa.

²⁰ Ora luleituma wokia mtstsionyi mṟasa mtsitsionyi mongonyi fo Eliashibu mkohanyi mnene kulewiko ko wuhya nyi Baruku, mana o Zabai.

²¹ Ora luleosha wokya mongonyi fo Eliashibu, mkohanyi ang'anyi mṟasa mtsitsionyi fo mba iya ilewiko se ko wuhya nyi Meremothi, mana o Uria, mana o Hakosi.

Wakohanyi walewika omombo

²² Wakohanyi walya wawekekaa ora lo rendewele wakawika ko wuhya ora lulya luleosha.

²³ Benyamini na Hashubu walewika ko wuhya ora lulya luweitimanyi na mba yawo.

²⁴ Kuwokia mba ya Azaria mṟasa mtsitsionyi lo omombo Binui mana Henadai nyi aleluwika ko wuhya.

²⁵ Ora lulya luleosha wokia mtsitsionyi kufui na omombo na mnaṟa fo mba ya Mangi wulewiko ko wuhya na Palali ai mana o Uzai. Pedaia mana o Paroshi.

²⁶ Wakatarama na waṟundi wa hekalunyi wawekekaa Ofeli, iwo nyi walewika ko wuhya ora lulya luweitumanyi na mongo fo mṟinga kya ora lo ngamenyi na mnaṟa mleshi.

Wandu wengi walewika omombo lulya

²⁷ Ora lungi luwewukie mnaṟa fulya mleshe itane omombo lo Ofeli nyi lulewiko ko wuhya nyi wandu wa mṟi fulya fo Tekoa.

²⁸ Alya mongonyi fo Frasi kuwei kufui na wakohanyi wafoi koikyo orio umu nyi alewika ora lulya luambuyanyi na mba yake.

²⁹ Sadoki, mana o Imeri nyi alewika ora lui sumhana na mba yake. Ora loituma ilo lukowiko ko wuhya nyi Shemaya, mana o Shekania, ichu awei mringi o mongo fo ora lo ngamenyi.

³⁰ Ora luleosha luwei ora lowo lo kawi nyi wulewiko ko wuhya na Hanania mana o Shelemia, kataramana na Hanuni, mana o kaṟandaṟu o Zalafu. Nao Meshulamu ai mana o Berekia, nyi alewiko ko wuhya ora lulya luwei sumhana na mba yake.

³¹ Ora luleosha wokia mba ya waṟundi wa hekalu lya wekapa mbucha wawei sumhana na mongo fo mba ya wapfungo hafui na kiṟiha kilya kya huye kufui na ndumba ya ora lo huye na lo ngamenyi nyi lulewiko wuhya na Malkia, ichu awekeela sahabu.

³² Ora lo lutsitsie kuwuka kiṟiha kya ndumbenyi mṟasa mongo fo Machondi nyi fulewiko ko wuhya na weela sahabu na walya wekekapa mbucha.