NEHEMIA 2 - Bibilia Kui Mdedie fo Kimochi

Nehemia ahenda Yerusalemu

¹ Kyasia meri fo Nisan, maka fo makumi hawi (20) fo wumangi wo Artshasta, kiherikyo mvinyo nyi fuwei oshangunyi loke, nalyo ngaiṟia mvinyo ngamdaya owokonyi loke. Kuwewode manya mkonu fumu njilemehenda oshangunyi loke njiwodo nyi fowa pfo.

² Nalyo mangi Artashasta kanjiwesa, “Nki ili mandi umsokie nyi fowa manyachandu ulaluo? Kyamba nyi kiloṟie ke nyi uwode fowa ing'anyi mrimenyi.”

³ Nalyo ngahaluo njechihamba, “Ee mangi, mangi nakae na moo mlungana. Nyi wuda njilechisokio nyi fowa mangi, kyamba, mṟi fo Yerusalemu handu wafee wako wawaṟike fukeri wulya na mongo yafo ilemaa irumatso ko modo?”

⁴ Nalyo mangi Artashasta kanjihaluo kanjiwesa, “A wulalu nyi kikiukundi iterewa?” Ngaterewa Mndumii-Ruwa, Ruwa o ipfo Ruwehu.

⁵ Nalyo ngawia mangi, “Hoi na hoi mangi kokoya iyo numchihie kyako, na kokoya njechiidima iwona kikundio oshangunyi lopfo, kyenjiduma mbo kulya Yerusalemu Yuda njihende iwika se ko wuhya handu wasahuye wako wawaṟike.”

⁶ Nao mangi kanjihaluo, “Nyi ochikaapfo mṟasa indii? Na iwuya lya nyu lyechiwa indii?” Nakyo kiterewo kyako kikaidikio, na inyi ngambia indii njechiwuya.

⁷ Ngamhaluo, “Hoi mangi kokoya nyi ochihio kyako, nyi njikuterewa unjiṟehie paruo njidayewanene wo wa oruka wa ora lo kyukanyi lo meda fo Efurate, kundu wanjiinenge momu njiide kiidi kyawo itane ngashika oruka lo Yuda.

⁸ Kingise njikuterewa nyi iki ke kuṟehiye paruo ko Asafu mringi omashidi ha mangi kundu nanjinenge mbau tsesungusia maboriti ha mongo iya ya hekalu, njombombo tsa mṟi fulya na mba yo yako njechikaa.” Nalyo mangi kaidikia kiterewo ki kyako kyamba Mndumii-Ruwa nyi awei kimu na inyi.

⁹ Kiheri njileida kiidi kya oruka lo ora lo kyukanyi lo meda fo Efrati, ngainengia wanene wa orukalo paruo tsilya tsiwewukie ko mangi. Nao mangi nyi aleduma wanene wa mbahanyi tsake na wedoya frasi handu hamu na inyi.

¹⁰ Kyaindi Sanbalati, Mhoroni, na Tobia, Mwamoni mṟundi oke, kiheri waleicho ke inyi nyingacha isaya mbonyi tsa Wayuda tsiwe njicha, walechihiyo manya le pfo.

¹¹ Kyasiang'u ngawekushikia mṟinyi fo Yerusalemu ngakaapfo handu ha mfiri iṟaṟu.

¹² Kii kidi ngakure kio handu hamu na wandu sa waangu njilewasambuṟa; manya njilawie mndu oose kya shindo Mndumii-Ruwa aweshiṟikie mrimenyi foko kya mṟi fulya fo Yerusalemu. Koikyo ngakure ili kio ngahenda na wandu waangu tupu. Manya njilahende njiladuo nzoi yose sile na iya njiwedoye inyi.

¹³ Kyasia ngakure ngaidia mongo fulya fo pichinyi na njia iya ihendiye ṟungunyi lilya lya Joka, na mongo fulya mbosha; ngaweambuya njomombo tsa mṟi fo Yerusalemu tsiwenjiwunduo hamu na mongo iya yake iwenjikoṟe na modo.

¹⁴ Numa ngawekuhendiyase mongo fulya fo soka alya hando nduwa ya mangi ikeri. Kyaindi nzoi iya njiwedoye ilaidime iida handu ha.

¹⁵ Kyasia kio kyo ngawekuidia se ipfo pichinyi njechiambuya njomombotso tsa mṟi. Nalyo ngawuya njechiidia mongo fulya fo pichinyi.

¹⁶ Wanene walya njiwerianyi nawo walemanya kundu njilehenda manya kindo njilewutapfo. Kyamba njiwemewie Wayuda, wakohanyi, wanene na wandu wengi walya wacha iṟunda iṟundalyo lewika ko wuhya mṟi fulya pfo.

¹⁷ Kyasiang'u ngawawia, “Ambuyenyi, nyo nyi muwonyi wufafa wodu, ke mṟi fu fo Yerusalemu nyi funyamaṟikie na mongo yafo nyi injikoṟe ko modo. Kipfa kya ikyo luwikese se ko wuhya mṟi fu fo Yerusalemu kundu fulaengeṟe uluendie sonu.”

¹⁸ Nahong'u ngawaongoya chandu Mndumii-Ruwa alenjiloṟa osaṟio lung'anyi huyako, ngaweongoya chandu mangi ulya alenjiwia. Wekiicho wado wakahamba, “Kendenying'u luwoke iṟunda lyi lyewika.” Nalyo wakakuteseheṟa ko iṟundalyo licha.

¹⁹ Kyasia Sanbalati, Mhoroni, Tobia, Mwamoni mṟundi oke na Geshemu, Mwarabu, kiheri waleicho wado wakaluseka na ilusalucha. Wakahamba, “Nyikindo kida ikyi mukeri iwuta? A ngesa nyi mukundi ikuletsana na mangi?”

²⁰ Na inyi ngawahaluo, “Ambuya Mndumii-Ruwa nyi echiluekia luidime iawutsia iṟunda lyi, so waṟundi wake lukeri iwoka iwika. Kyaindi nyo muwode kyoṟa, manya wusumhanyi, manya ngumbuo kiidi kya mṟi fu fo Yerusalemu pfo.”