NEHEMIA 13 - Bibilia Kui Mdedie fo Kimochi

Ikuletsana na wandu wa mkambo

¹ Kiheri kitapu kya Mose kilesomo kikamanyika ke Waamoni na Wamoabu wawode momu fo kulunga na wana wa Mndumii-Ruwa-pfo.

² Cha kipfa kiheri Waisraeli wawei kyaṟonyi kuwuka Misri wandu wa walewainenga mṟinga manya kyelyapfo, kindo walewawutia nyi ihuṟa Baalamu kundu nasese wana wa Israeli, kyaindi Mndumii-Ruwa kahalutsa oseso lulya lowo lukawa ona kodu.

³ Kiheri Waisraeli waleicho iwawaso wakakuletsana na wandu wa mkambo ingi.

Sungusihu ya Nehemia

⁴ Kyasia mkonu of mfuho fulamshika, nahong'u mkohanyi Eliashibu awei msongoru o shiṟiha shilya sha Mndumii-Ruwa odu, nao nyi aweidikianyi necha na Tobia,

⁵ ichu kainenga Tobia momu fokaa kiṟiha kilya king'anyi kiwekesuṟumo mwano ya ngano, ubani, shihia, shenga sha ikumi sha mdemenyi, mvinyo, na mafuda, shindoshi shose nyi shiwei mwano. Waisraeli walewawasio washiwute shiinengo Walewi, waimbi, waringi wa mongo na wakohanyi.

⁶ Kiheri shindoshi shose shiwewutika inyi njiwekeri Yerusalemu pfo, kyamba maka fulya fo makumi haṟaṟu na kawi (32) fo wumangi wo Artashasta o Babiloni, nyi njiweterewie momu, ngahenda ikuloṟa oshangunyi loke.

⁷ Kyasia kiheri njilewuya Yerusalemu, ngakoya mbonyi njiwicho tsa Eliashibu ichu aleinenga Tobia momu fokaa kiṟiha kiidi kya shiṟiha shilya sha Mndumii-Ruwa.

⁸ Iki kikanjisuiṟa mnu, koikyo ngawihitsa nzohoṟa tsa Tobia nja ya kiṟiha kyo,

⁹ nalyo ngawawasa wandu walehenda iheṟemtsa shindo shilya, kyasia ngawihiṟaise shindo shilya sha mba ya Mndumii hamu na shiano shilya sha mso na ubani.

¹⁰ Ngawewonase kindo kingi kya Walewi waleinengo shilya shiwewawaṟi iinengopfo, koikyo Walewi na Waimbi wawekeṟunda alya hekalunyi nyi waleda maṟunda hawo wakakuwuya na mademenyi hawo.

¹¹ “Kindoki kikanjiinenga njidedie wanene wa iwawaso, ‘Nkili mba ya Ruwa iledeo ido?’” Kyasia ngawuya iwasanyiase na iwawihiṟa se na maṟundenyi hawo.

¹² Kii kidi Waisraeli wakawokase iende shenga sha ikumi sha ndema tsawo, mso, mvinyo na mafuda na shikumbinyi sha mba ya Ruwa.

¹³ Kyasia ngasambuṟa wandu wa wawe waringi wa shikumbi; mkohanyi Shelemia, Sadoki ichu awei mṟehi, na Pedaia ichu nyi Mlewi, Hanani mana o Zakuri, mana o Matania ichu kawa mtarami owo. Iwa nyi wawei wandu wahendeli na iṟunda lyawo likawa ihawia wana wamayawo shilya wawehuṟi.

¹⁴ Kyekumbuowo hoi Mndumii-Ruwa oko, shindo shi shose njileshiwuta kipfa kya mba yapfo na wuindi woyo.

¹⁵ Kyasia kiherikyo ngawona Wayuda wawekama na isungusia mvinyo mkonu fo Sabato, na wengi wakadika nzoi tsawo ngano, mvinyo, ndunda tsamsabibu, na shindo shingi mkonu fo Sabato wakashiende na Yerusalemu, na inyi ngawadedia njechiwawia ke wawode momu fo kapa mbucha mkonu fo Sabato-pfo.

¹⁶ Ambuya nyi kuweipfo wandu wawukie Tiro wawekeri kulya mṟinyi fo Yerusalemu, nawo wakaende makunga na shindo sha mbaṟe tsifoi na kulya mṟinyi kundu washikumbie wandu wadu mkonu fo Sabato,

¹⁷ nalyo ngadedia wanene walya wa Yuda njechwiawia, “Ambuyenyi shindoshi shii shiwicho mukeri iwuta! Nyi mukeri ifanyitsa mkonu fo Sabato.

¹⁸ Nyi kyo kimaduma Mndumii-Ruwa alekapa waku walya wadu kiheri alerumatsa mṟi fu. Ambunyeni nyi mukeri iengeṟa iluendiye nyashi ya Mndumii-Ruwa ko Waisraeli. Kipfa kya ili mukeri ifanyitsa mkonu fo Sabato.”

¹⁹ Kyasia ngawawasa ke mongo iya ya mṟi fo Yerusalemu ishingo ili mandi mkonu fo Sabato fukeri iwoka kiukanyi ili mandi mema fooloka, na ikae injipfunge mṟasa Sabato iide. Ngawewawikapfo waringi weambuya mongonyi na iwawasa ke kulakae kindo kyechiitso na mṟinyi mkonu fo Sabato.

²⁰ Walya wekapa mbucha ya shindo sha mbaṟe tsifoi wakalaa dembo kawi wechikumba shindo kiheri kya kio nja ya mṟi,

²¹ manya kudo ngawadedia ngawawia, “Muwode momu fo laa alya nja ya mṟi kundu mkumbe shindopfo, kokoya mochiengeṟa iwuta mudo nyi njechimuwuta ko pfinya.” Wokia lyo walakiwuyese ikumba shindo mkonu fo Sabato.

²² Nalyo ngawia Walewi wakuilishe wo wawenyi, wahende iringa mongo iya kundu mkonu fo Sabato fuidime itano mwele. “Kyekumbuo wo hoi Mndumii-Ruwa oko kipfa kya iki, uwenjisaṟia kipfa kya ikunda lyapfo ling'anyi.”

²³ Kiheri kyo ngawona se kindo kingi nakyo nyi; Wasoṟo wa Yuda walealika waka wa Ashdodi, Amoni, na Moabu.

²⁴ Kyenga kya wana wawo nyi walededa mdedie fo Ashdodi, Amoni na mdedie ingi walakiidime ideda mdedie fodu.

²⁵ Kyasia ngawadedia, wasoṟowo na iwasesa, ngawewakapa na ikuruo njui tsawo, kyasia ngawawia wawike kyasa ko rina lya Mndumii-Ruwa ke wechikaa wawutese wudo-pfo, wo manya wana wawo wechikaa waalikane na wandu wa mkambo ingi njihenupfo.

²⁶ Ngahamba, “Ambuya nyi waka wahenu waletewa mangi Solomoni kadeko. Ambuya nyi awei mangi awode kiṟumi kota mangi tsose tsa mkambo ingi. Mndumii-Ruwa nyi awemkundi kamtana nawe mangi o Israeli, kyaindi kaoloka kiidi kya wunyamaṟi wu.

²⁷ Ngesa wulalu luwaoshe lochihenda idekio Mndumii-Ruwa lochialikana na wandu wa mkambo ingi njihenu?”

²⁸ Kyasia Yoyada mana o Eliashibu mkohanyi ang'anyi kaalika mana o Sanbalati kuwuka mṟi fo Beti-horoni, na inyi ngamfuna oshangunyi loko.

²⁹ Ee wo Mndumii-Ruwa kekumbuowo chandu wandu wa walefanyitsa ukohanyi na mma iya ya kikohanyi uwelie nawo hamu na Walewi.

³⁰ Kyasia ngaheṟemtsa wandu kuwuka orio kindo kyose kiwei kihenu. Ngawasungusia wusungusihu wo iṟunda lya wakohanyi na Walewi kundu orio mndu namanye iṟunda lyake lya orio mkonu.

³¹ Ngawesungusia se kya ngu tsekoṟa shidaso shemaya modonyi tsiidime iendo kiheri tsinjikunde, na wandu wawende shidaso shawo sha kuwoka sha mso na ndunda tsa kuwoka. Kyekumbuowo iki hoi Mndumii unjisaṟie.