NEHEMIA 12 - Bibilia Kui Mdedie fo Kimochi

Wakohanyi na Walewi

¹ Iwa nyiwo wakohanyi na Walewi walewuya wusingenyi handu hamu na Zerubabeli, mana o Shealtieli, na Yeshua mkohanyi mnene. Wakohanyi Seraya, Yeremia, Ezra,

² Amaria, Waluku, Hatushi,

³ Shekamia, Rehumu, Meremoti,

⁴ Ido, Ginetoni, Abiya,

⁵ Miyamini, Maadia, Bilga

⁶ Shemaya, Yoyaribu, Yedaya,

⁷ Salu, Amoki, Hilkia na Yedaya, iwa nyi wawei wanene wa wakohanyi na wana wa mayawo kiheri kya Yeshua.

⁸ Walewi, Yeshua, Binui, Kadmieli, Sherebia, Yuda na Matania, ichu nyio awei msongoru o shiimbo sheana handu hamu na wana wa maye.

⁹ Barkukia na Uno na mbuya tsawo nyi walehoṟoka mba ya Ruwa sumhana na wo.

Wana wa mkohanyi ang'anyi Yeshua

¹⁰ Yeshua nyi alefee Yeyakimu, Yeyakimu kafee Eliashibu, Eliashibu kafee Yoyada.

¹¹ Yoyada kafee Yonatani na Yonatani kafee Yaduo.

Wanene wa shishari sha Wakohanyi

¹² Kiheri Yoyakimu awekeri kohanyi mnene iwa nyi mbe wanene wa shishari shawo; wa Seraya mkohanyi nyi Meraya, wa Yeremia, Hanania;

¹³ wa Ezra, Mehulamu, wa Amaria, Yehohanami;

¹⁴ wa Maluki, Yonatani; wa Shebania, Yosefu;

¹⁵ wa Harimu, Adna; wa Meraiati, Helkai; Helkia;

¹⁶ wa Ido, Zekaria; wa Giretoni, Meshulamu,

¹⁷ wa Abiya, Zikri; wa kishari kya Miniyamini wa Moadia; Piltai;

¹⁸ wa Bilga o Shamua; wa Shemaya; Yehonatani;

¹⁹ Yoaribu; Matenai; o Yedaya; Uzi;

²⁰ o Salai, Kalai; o Amoki; Eberi;

²¹ o Hilkia; Heshabia; na wa oshari lo Yedaya, Nataneli.

Wa oshari lo wakohanyi na Walewi

²² Kiheri kya Elishibu, Yodaya, Yohanani na Yadua wanene wa oshari lo Walewi, walya wawewaṟehie; na kiheri kya mangi Dario wanene wa oshari lo wakohanyi waṟehie.

²³ Wanene wa kishari wa wana wa Lewi waleṟehio kiidi kya kitapu kya ngumbuo mṟasa kiheri kya Yohanani mchuku o Eliashibu.

Makamba ha maṟunda kulya hekalunyi

²⁴ Wanene wa Walewi; Hashabia, Sherebia, Yeshua mana o Kadmieli nyi walehoṟoka sumuhana na wanene wamae; iwa nyi waleimba shiimbo sheṟumisha na sheana, kiwei chando Mangi Daudi mndu o Ruwa awewawasie.

²⁵ Waringi wa mongo nyi: Matania, Bakbukia, Obadia, Meshulamu, Talmoni na Akubu; iwa nyi wawei waringi wa shikumbi.

²⁶ Wandu wa nyi waweipfo kiheri kya Yoyakimu, mana o Yeshua, mana o Yosadaki na kiheri kya Nehemia ulya awei mnene o isanga na kiheri kya Ezra da awei mkohanyi na mṟehi.

Nehemia ashimbuo omombo lo mṟi

²⁷ Kyasia kiheri keshimbuo omombo lulya lo Yerusalemu kya meshika Walewi wose nyi walepfulo orio handu wawei kundu wache ikeseka na iṟumisha ko sia na shiimbo sheana wechiimba na matoasi, shiimbo na zeze.

²⁸ Wana wa waimbi wakakusanza wawuka shihongonyi sha mṟi fo Yerusalemu na shihongonyi sha Wanetofati,

²⁹ wengi wakawuka Beti-Gilgali, ora lo Gega na Azmaweti, kyamba waimbi nyi wawewikie mba tsawo shihongonyi kufui ya Yerusalemu.

³⁰ Kyasia wakohanyi na Walewi wakakushimbuo wo wawenyi na wandu na mongo iya na omombo lulya.

³¹ Kyasia ngasanza wanene wa Yuda huye ya omombo lulya, wahende isongoya mamingi fulya fo wandu, wakahawanyika makamba hawi, wakatengetia mṟi fulya wechiimba shiimbo sheṟumisha. Kamba lya kuwoka likaida ora lo kulyo lo omombo lulya itane mongo fulya fo mbosha.

³² Na Hoshaya kaosha numa ya waimbi walya arianyi na kyenga kya wanene walya wa Yuda.

³³ Handu hamu nao wakaosha Azaria, Ezra, Meshulamu,

³⁴ Yuda Benyamini, Shemaya na Yeremia.

³⁵ Wakohanyi waleoshana nawo warie taṟumbeta nyi; Zekaria mana o Yonatani, mana o Shemaya mana o Matania, mana o Mikaya, mana o Zakuri, mana o Asafu,

³⁶ na wana maye, Shemaya, Azareli, Milalai, Gilalai, Maai, Netanelii, Yuda na Hanani, wakaoshana nao warieshinanda cha shilya sha mangi Dawidi mndu o Ruwa; wechisongoyo nyi Ezra ulya awei mṟehi,

³⁷ wechiidiya mongo fulya fo soka, wakadoya ngasi tsila tsidoye mṟinyi fo Dawidi, wechiidiya mba ya mangi Dawidi, wakawuyase na omombo mongonyi fo soka kya ora lo ngamenyi lo mṟi fulya.

³⁸ Kamba lilya lingi liweimba shiimbo sheṟumisha nyi lileida ora lo kumoso lo omombo, na inyi ngaoshanana ka mba li hamu na kyenga kya wandu. Lukaaidiya mnaṟa fo Tanuu mṟasa omombo lulandari,

³⁹ lukaweidiya mongo fo Efraimu, mongo fo Yeshana na, mongo fo Makunga, mnaṟa fo Hananeli na mnaṟa fo Ihana mṟasa Mongo fo Machondi. Kyaṟo kyadu kikaawutsio mongonyi fo Hekalu.

⁴⁰ Kyasia makamba halya hahawi haweiimba shimbo sheṟumisha, hakahoṟoka kiidi kya mba ya Mndumii-Ruwa, handu hamu na inyi na kyenga kya waṟundi;

⁴¹ Wakohanyi wawekapa taṟumbeta nyi Eliakimu Maaseya; Miniamini, Mikaia, Elioenai, Zekaria na Hanania;

⁴² wengi walewaosha nyi Shemaia, Eleazari, Uzi, Yohohanani, Malkiya, Elamu na Ezeri.

⁴³ Kyasia wandu wakawuta shidaso shifoi wawachihie kyamba Mndumii-Ruwa, nyi alewachihiṟa mnu. Waka handu hamu na wana watutu wakachihio mnu koikyo kifahio na ngululu tsikaichio kulya mṟinyi na mṟasenyi.

Mwano ilewuto kulya hekalunyi

⁴⁴ Kyasia kiherikyo wakasambuṟo wandu weringa mbatso tsiwewode mwano iya ilewuto ya hekalunyi; kilimu kya kuwoka kya ndema, kyenga kya ikumi kilesanyio kuwuka mdemihu kulya shihongonyi. Ishi nyi shilesanyio shelela wakohanyi na Walewi chando wuwawaso wawehambie. Kyasia wandu wose wakachihio kipfa kya iṟunda lya Walewi na wakohanyi,

⁴⁵ kyamba nyi walesongoya wuindi wo mba ya Ruwa na maṟunda hose Ruwa alewawia. Walya weimba na waringi wa hekalu wakaṟunda necha chando Mangi Dawidi na Solomoni mana oke walewawasa.

⁴⁶ Kuwokia kiheri kya mangi Dawidi na Asafu ulya mnene o waimbi, waimbi nyi waleimba shiimbo sheṟumisha na iana Mndumii-Ruwa.

⁴⁷ Ambuya wokia kiheri kya Zerubabeli na Nehemia Waisraeli nyi walewuta mwano yawo yelela waimbi na waringi wa mongo; ngoseṟa ya shose wakawewuta shiinengo shelela Walewi, nawo Walewi wakawewuta kyenga keṟundia Wakohanyi.