NEHEMIA 11 - Bibilia Kui Mdedie fo Kimochi

Wandu walekaa Yerusalemu

¹ Wanene wose wa Waisraeli nyi walekaa kulya mṟinyi fo Yerusalemu wandu wengi wose wakawika kuṟu kuhya wakasambuṟa mndu umu ko orio shishari shilya ikumi kundu naidime ikaa kulya Yerusalemu, wandu wengi wose wakakaa kulya mṟinyi ingi.

² Wandu wakachihio kya walya walekuwuta wawenyi ikaa kulya mṟinyi mwele fo Yerusalemu.

³ Kyaindi kiidi kya mṟi na shihongo shilya shingi, wandu wa Israeli, wakohanyi, Walewi, waringi wa mongo, na wana wa waṟundi wa Solomoni, wo nyi walekaa shihongonyi shawo na mṟinyi yawo wawenyi.

⁴ Wandu maata ho wa kishari kya Yuda na kya Benyamini nyi walekaa mṟinyi fo Yerusalemu. Iwa nyiwo wa kishari kya Yuda walekaa mṟinyi fo Yerusalemu. Ataya, mana o Uzia, mana o Zekaria, mana o Amaria, mana o Shefatia, mana o Mahalaleli. Iwa wose nyi wa kishari kya Peresi.

⁵ Maseya, mana o Baruku, mana Kolhoze, mana o Hazaya, mana o Adaya, mana o Yoyaribu, mana o Zekaria, Mshilo.

⁶ Kishari kyose kya Peresi kilekaa mṟinyi fo Yerusalemu nyi wasoṟo wawei mbahanyi mahana haana na makumi haṟandaṟu na nyanya (468).

⁷ Wa kishari kya Benyamini walekaa mṟinyi fo Yerusalemu nyi Salu, mana o Meshulamu, mana o Yoedi, mana o Pedaya, mana o Kolaya, mana o Maaseya, mana o Itieli na mana o Yeshaya.

⁸ Kukawekaapfo Gabai na Salai. Wose nyi wawei wandu mahana kenda na makumi hawi na nyanya (928).

⁹ Yoeli, mana o Zikri nyio awei mnene owo; Yuda mana o Hasenua nyi awei mnene o kawi o mṟi.

¹⁰ Wakohanyi wawekeri mṟinyi fo Yerusalemu nyi; Yedaya, mana o Yoyaribu, Yakini,

¹¹ Seraya, mana o Hilkia, mana o Meshulamu, mana o Sadoki, mana o Merayoti, mana Ahitubu, ichu nyi awei mohoṟokia mba ya Ruwa;

¹² iwa hamu na waṟundi wa kulya hekalunyi nyi waweshikie wandu mahana haana na makumi hawi na wawi (422) kimu na iwa nyi kuweipfose Adaya, mana o Yerohamu, mana o Pelalia, mana o Amsi, mana o Zekaria, mana o Pashuri, mana o Malkiya;

¹³ kuwewodese wana wa wayawo wawei wanene wa shishari sha wandee wawo, wose handu hamu nyi waweshikie wandu mahana hawi na makumi haana na hawi (242). Kuweipfose na Amaasai, mana o Azareli, mana o Ahzai, mana o Meshilemoti, mana o Imeri,

¹⁴ handu hamu na wana wa wayawo; wose nyi waweshikie ihana na makumi hawi na nyanya (128), iwa nyi wawei mbahanyi. Mnene owo nyi Zabdieli mana o Hagedolimu.

¹⁵ Walewi walekaa kulya mṟinyi fo Yerusalemu nyi; Shemaya, mana o Hashubu, mana o Azrikamu, mana o Hashabia, na mana o Buni.

¹⁶ Shebethai na Yozabadi, wanene wa kishari kya Walewi, iwa nyi wawekehoṟokia maṟunda nja ya mba iya ya Ruwa.

¹⁷ Matania, mana o Mika, mana o Zabdi, o kishari kya Asafu, ichu nyi awei msongoru mosongoya kiheri kya shiterewo sheana Mndumii, Bakbukia nyi awei mtarami oke. Handu hamu nawo naweipfo Abda, mana o Shamua, mana o Galali o kishari kya Yedutuni.

¹⁸ Walewi wose wawei kulya mṟinyi mwele nyi waweshikie mahana hawi makumi nyanya na waana (284).

¹⁹ Walya weringa mongo walekaa kulya Yerusalemu nyi Akubu na Talmoni handu hamu na wana wa mayawo wawei waringi wa mongonyi waweshikie ihana limu na makumi mfungade na wawi (172).

²⁰ Waisraeli wengi hamu na wakohanyi na Walewi nyi walekaa mṟinyi ya Yuda iya ya kioṟa kyawo.

²¹ Waṟundi wa kulya hekalunyi wo nyi walekaa mṟinyi fo Yerusalem kihongo kya Ofeli wakahoṟokio nyi Ziha na Gishpa.

²² Mnene o Walewi alekaa mṟinyi fo Yerusalemu nyi Uzi mana o Bani, mana o Hashabia, mana o Matania, mana o Mika, awei o kishari kya Asafu, wawei waimbi, wanene wa maṟunda halya ha mba ya Ruwa.

²³ Mangi nyi awewawasie makamba hawo na maṟunda hawo ha orio mkonu.

²⁴ Na Petahia, mana o Meshezabeli, o kishari kya Zera o oshari lo Yuda, ichu nyio awekehoṟokia handu ha mangi ko mbonyi tsake tsa Wayuda.

Wandu wa mṟi na shihongo shingi

²⁵ Wandu wengi nyi walekaa kiidi kya mṟi iya iwei kufui na madema hawo. Wandu maata wa oshari lo Yuda nyi walekaa Kiriathi-arba. Diboni na Yekabzeeli na shihongo shilya shiwei hafui na mṟi yo.

²⁶ Wengi nyi walekaa mṟinyi ya Yeshua, Malada, Bethi-peleti,

²⁷ Hazarshuali na Beer-sheba na kiidi kya shihongo shilya shiwei hafui.

²⁸ Wengi nyi walekaa mṟinyi ya Ziklagi, Mekona na shihongo shilya shiwekeri kufui.

²⁹ Wengi nyi walekaa mṟinyi ya Enrimoni, Sora, Yarimuthi.

³⁰ Zanoa na Adulamu na shihongo shilya shiwei kufui. Lakishi, na madema haweṟingichie nyi Azeli na shihongo shalyo shiwefuṟingichie. Koikyo wana wa Yuda nyi walekaa oruka luwei kiidi kya Beer-sheba ora lo kiukanyi na pichi lya Hinomu liwei ora lo huye.

³¹ Wandu wa kishari kya Benyamini nyi walekaa Geba, Mikmashi, Ai, Beteli na shihongo shilya shiweiṟingichie.

³² Wengi nyi walekaa Anatothi, Nobu, Anania,

³³ Hazori, Rama, Gitaumu,

³⁴ Hadidi, Seboimu, Nebalati,

³⁵ Lodi na Ono. Ili liwei pichi lya waria,

³⁶ Walewi maata wa Yuda nyi walesangana na wandu wa Benyamini.