NEHEMIA 1 - Bibilia Kui Mdedie fo Kimochi

Iṟunda lya Nehemia kiidi kya mṟi fo Yerusalemu

¹ Ambuya kiheri njiwekeri kulya mṟinyi mnene fo Susa, meri fo Kislvevu maka fo makumi hawi,

² Hanani awei mana o wama oko kanjichea handu hamu na wandu wengi wawukie orukenyi lo Yuda. Kii kidi ngawawesa mbonyi tsa Wayuda walya walekia waladao wusingenyi wo Babeli na mbonyi tsa mṟi fulya fo Yerusalemu.

³ Nawo wakanjihaluo wechihamba, “Wayuda walya waletsuhaa kulya orukenyi nyi wakeri kiidi kya wukiwa wung'anyi mnu na sonu tsing'anyi. Ambuya omombo lo mṟi fulya fo Yerusalemu nyi wulewunduyo na mongo iya yafo ikawekoṟo ko modo.”

⁴ Njekiicho njiido ngadamia wanda ngafihiṟa ngawado nyi makulili, ngawekaa kiidi kya kilio ko mfiri maata. Ngawekuotoya na iterewa Mndumii-Ruwa chu o ruwehu,

⁵ ngahamba, “Hoi Mndumii-Ruwa, Menyi Matorito, iyo nyi ui Ruwa ang'anyi uoweshie, okeringa mkundana fopfo na isaṟia lyapfo ko walya wakukundi na iosha mawawaso hapfo.

⁶ Inyi mṟundi opfo, njikeri ikuterewa kio na mfiri kya waṟundi wapfo wana wa Israeli. Kyeambuya wo inyi nyi ngakutochia wunyamaṟi wo Waisraeli luletsiwuta oshangunyi lopfo. Inyi na wandu wako wa Israeli nyi lulekudekio.

⁷ Ambuya nyi lulewuta mawicho oshangunyi lopfo, lulaoshe mawawaso hapfo manya lulaoshe wuwawaso wulya uleinengia mṟundi opfo Mose.

⁸ Kyekumbuowo hoi Mndumii-Ruwa Menyi Matorito, chandu ulewia mṟundi opfo Mose ke lukada lulaosha chandu uleluwawasa nyi ochiluṟanyitsia kiidi kya mkambo ya wandu.

⁹ Kyaindi kokoya lochiwuya, lukaweoshase wuwawaso wopfo manya chandu uwememuṟahanyitsia kuleshe ambuya nyi nochiluwihiṟase na alyando uwesambuṟie ke nyi hando hapfo ochiindiyo.

¹⁰ ‘Kyamba Waisraeli wa nyi waṟundi wapfo, wandu wapfo ulewakiṟa ko owoko lopfo luwode pfinya.

¹¹ Hoi Mndumii, keadanyiawo kiterewo ki kyako na kya waṟundi wapfo wekechihiyo ikuindia iyo. Kyamba nyi njikuterewa njihende iidikio na iwona osaṟio oshangunyi lo Mndumii oko. Kyasia inyi njiwei mheṟi o mvinyo o mangi.’”