NAHUMU 3 - Bibilia Kui Mdedie fo Kimochi

¹ Ochia lo mṟi fo samu! Fuichuo mbonyi tsa wongo, isoka wandu shindo shawo na iduo wandu wapfungo shilechisia.

² Kifahio kya shiṟeta na mṟuṟumo ya magari ha shida na frasi tserunduka!

³ Wekapana wai frasihu na njoshu tseaka-aka na mapfumu maohi; kilula kya walya wawawahe wakawa cha nungu ing'anyi ya mnying'a; itane wandu wakapa mtulia mnying'enyi yawo

⁴ Kipfa kya wumeluki wopfo, kipfa kya mmeluki ulya awode oshangu lucha, mka ulya o mbonyi tsa wusawi, ekekumba wandu wa isanga kui wumeluki woke, na kishari kya wandu kui wusawi woke.

⁵ Ambuya inyi njii huyapfo, Mndumii menyi matorito ahamba. Ambuya njechikushukuo ukae kitaṟe; njiloṟe wandu wa mkambo kitaṟe kyapfo na wamangi wusutsu wopfo.

⁶ Njechikuolya ngafu tsifanyi huyapfo; kundu nofane, njechikuhaluo kindo kemino.

⁷ Woose wechikuwona wadiche, wehamba, Niniwe onyamaṟika; nyiu echikusaṟya Njeendeku mokuwihiṟya mooṟ

⁸ Ngesa iyo nyi uwode wusumhanyi kota No-amoni fui kiidi kya meda, fuimṟingichie mṟinga koose; fuwehaluye ipalyipalyi omombo lofo na ipalyipalyi likawa mawanda hafo.

⁹ Kushi na Misiri wawewode pfinya tsawo tsiwewode mtsitsionyi pfo; Putu na Walibia wawei watarami wake.

¹⁰ Manya kudo nyaledao kuleshe, walehenda wusingenyi wakoku wawo wakaseo mahawikonyi ha njia; wandu wawode kiṟumi wakawiko kuṟu kuhya, na wanene wawo wakapfungo na mshe.

¹¹ Ngoseṟa nochinango, nochiowisho; nochishiha omombo kipfa kya wakituwa.

¹² Njomombo tsapfo tsoose tsechiwa cha mkuyu fuleṟaa na iwooka iwiṟa; tsikaumbuṟuka tsikaoloka dumbunyi lya molya.

¹³ Ambuya wandu wapfo uwode nyi waka; shichumi sha oruka lopfo shii pang'a oshangunyi lo wakituwa wapfo; modo fuṟumatsye shipfungo shapfo.

¹⁴ Ṟeheṟa mṟinga fukutarame kiheri kya kiwi kyapfo; wika pfinya omombo lopfo; Ida terinyi, chuma odoko, atsa modo fokoṟa matofali.

¹⁵ Ipfo modo fokurumatsa; Oshu lochikulya; Lochikumeṟa cha nzihe; Kuṟeheṟe mufo cha msoṟa! Kuṟeheṟe mufo cha nzihe!

¹⁶ Nyi uleengeṟa wekapa mbucha wafoi kota nyenyeri tsa ruwehu; msoṟa fokenyamaṟa; fukakure na ihenda.

¹⁷ Wandu wapfo waleṟaa oṟo wai cha nzihe, wandu mbahanyi wafoi cha mamiingi fo ndatari, tsekekaa huya kitaṟa kya maṟishe kiheri kya mbeo, indi mnengeṟi fukado tsikarunduka tsikadekya, kulamanye handu tsii.

¹⁸ Walisi wapfo walaa mado; iyo mangi ya Ashuru; wandu wapfo wawode kiṟumi wasie moo; wandu wapfo warahanyikye mafumvuhu kuwode mowasanyia-pfo.

¹⁹ Ichenje lyapfo likeri inyiapfo, ichenje lyapfo lilemeri; woose wekeicho mbonyi tsapfo wekekapa mawoko; nyiu alalewona mawicho hapfo hechiida huyake maheri hoose.