NAHUMU 2 - Bibilia Kui Mdedie fo Kimochi

Ioloka lya Niniwe

¹ Ulya mofunja shiteno-teno nyi adoye huye; wada shisha, upfunge maṟuko, Karia nokuwanze necha, engeṟa pfinya tsapfo mnu.

² Kipfa Mndumii aiwihiṟa kiṟumi kya Yakobo, cha kiṟumi kya Israeli; kipfa wapfungo wa shida wawodo na imanya msabibu yawo.

³ Ambuya ngawo ya mbahanyi tsake yafana samu (kimande) wandu wai wakari shidenyi waṟee nguo tsa kimande, magari ha shida hakemakema kipfa kya wuili wo menya kiheri kilya kesungusia, mapfumu hawo hadihinyitso hai mbaṟi yeowesha mnu.

⁴ Magari ha shida hakapa mtiṟi ipfo njienyi, hakapeṟehetsana ipfo njienyi tsilandari; hakawono cha shimui, hekedicha cha mbawa.

⁵ Nakumbuo wandu wake wang'anyi; wakakapa tulia; wawika mteeṟa washike mtsitsionyi kilya kewashikya kikiteseheṟe.

⁶ Shichumi sha meda shiṟuhukie na mba ya mangi iichuo wuowu.

⁷ Husabu namdambuye, nadao, waṟundi wake wa kika wakapa kilio cha mbeta, wakapakapa shipeta shawo.

⁸ Indi Niniwe wokya kacha iwekeri cha nduwa ya mṟinga; indi wulalu waidicha; hoṟokenyi! Hoṟokenyi! Ote kuwode manya umu akeri iambuya numapfo.

⁹ Wadenyi fesa Wadenyi sahabu, Kipfa nyi kyooṟa kilechisia kiṟumi kya shindo shichihiṟye mnu

¹⁰ Nai kitaṟe, na fowa, na inyamaṟika; nawuko madima, ndi tsikapana, na kidedema king'anyi, shamu shawo shiichuo wuowu.

¹¹ Hanga miiso yekekaa hanga wana wa miiso wakaa Miiso njisoṟo na njika na wana na kuwode alewaoweshaṟ

¹² Miiso fuletafuo-tafuo mooko fo wana wake, fukatsindikia mayawo mooko, likaichuṟa opanga lolyo nyama na kichau kishikie.

¹³ Ambuya, inyi nyi Ruwa menyi matorito, njechirumatsa magari hapfo ha shida mtsunyi, na oshu lochilya wana wa miiso, njechikusoka shilya kulelasa iya orukenyi, na maṟu ha wadume wapfo hechiichio se-pfo.