NAHUMU 1 - Bibilia Kui Mdedie fo Kimochi

¹ Otambahaluo lo Niniwe. Kitapu kya mawonesyo ha Nahumu, Mwelkoshi.

Nyashi ya Ruwa huya Niniwe

² Mndumii-Ruwa nyi ai moṟisaṟisa, nyi eketaa kiṟache; Mndumii nyi menyi kiṟache, nyi aichuo nyashi; nyi eketaa kiṟache ko wakituwa wake, nyi ekewika kisa kya nyashi yake ko wakituwa wake.

³ Mndumii ekeduika nyashipfo, nawode pfinya ing'anyi, manya echihamba mndu mnyamaṟi awode wunyamaṟipfo. Mndumii nawode otende loke kiidi kya otanu lung'anyi, mapuchi nyi kiluli kya madende hake.

⁴ Nekededya ipalyipalyi likahaduka, na ihadutsa meda yose; Bashanyi ikaloloma, na Karimeli; kiwaṟo kya Lebanonyi kikanaa.

⁵ Mafumvu hekededema oshangunyi loke na shitoṟomoso shikasalaa; oruka lokeiro oshangunyi loke, ee, hamu na woose waipfo.

⁶ Nyiu echiidima ihoṟoka oshangunyi lokye ili awode nyashi, nyiu ehiidima ikaa owawonyi lo nyashi yakye? Nyashi yakye injiwawo cha modo fopaṟapaṟa maho maumu.

⁷ Mndumii nai mcha, nyi oṟiho kiheri kya kiwi; naichi walya wemdichia.

⁸ Kyaindi nechitoromisha wakituwa wake na mfu fung'anyi na iwafunyia meemenyi.

⁹ Nkiki muikusaṟa kya Mndumii? Nechitoṟomisha piu; matuuro hechiidima icha lya kawipfo.

¹⁰ Kipfa kokoya wawa cha msha iwadanyi, na irutsa cha ili wainyo wechikombetso cha makaanjo maumu.

¹¹ Kokure umu kiidi kyapfo kakusaṟa mawicho ha Mndumii, kadeda chila ilawaṟi.

¹² Mndumii nahamba, Manya chandu wafoi na iwada pfinya tsa mbihu wechiarisika, o nechiida na ihenda. Chando njilekulisa wukiwa ochiwulya se-pfo.

¹³ Wulalu njechifunja ngada yake, na itusuo shipfunga shapfo.

¹⁴ Mndumii nawutye iwawaso kyapfo, manya kulawono mndu oose awode rina lyapfo; ipfo mmbenyi ya maruwa ha wongo njechikumba kuleshe sanamu tseṟeha, na sanamu tsesalaṟa; njechiteseheṟa kipfu kyapfo; kipfa nyi ui mmbicho.

¹⁵ Ambuya madende ha moende mbonyi njicha tsa sia hakeri icha shitoṟomosohu, na ihamba ofoṟo. Wada mkonu yapfo nnene, iyo Yuda, inutsya kyasa kyapfo, kipfa ulya mokulisa wukiwa echichase-pfo alememariso ikumbo haleshe.