MIKA 7 - Bibilia Kui Mdedie fo Kimochi

Wunyamaṟi wo Waisraeli

¹ Ochia loko! Chandu kii wulalu, kifanani cha ili wandu wamaa isambuo; kuwode ndunda tsakuwoka njitsilangie pfo. Nyi cha kiheri kyehaa zabibu, kuwode ma kidingo kimu kya zabibu kelyapfo!

² Kuwode msa aowoye Ruwa aledeo orukenyi-pfo; kuwode mndu mhoṟotsu kiidi kya wandupfo. Orio umu nalaaya ipusuo samu, manya kuwode umu mhoṟotsu kiidi kya wandupfo.

³ Wose nyi wewuta mawicho tupu; wanene na wenyi menge wakundi itsutsumo, walya wang'anyi waloṟie na pata wuwicho wowo, na iwuta kui wulembi kulawode wuowo.

⁴ Ulya mcha kota wo nekelisa wandu wukiwa cha mbeche. Kokoya kwipfo asumhanyi nyi cha oṟiho lo msha. Mkonu fowo fohoṟuo fuweiwedio foshika. Wulalu nyi wai iṟewe.

⁵ Ulaidikie mbuya yapfo ma ulamkusirie. Ringa mnu kilya odeda na dumbu lyapfo, ma mka opfo iyo kumonyi.

⁶ Kipfa, mana o kisoṟo namina ndeye, na mana o kika kahoṟotsana na mae. Mali o mana kawehodana na mamii oke. Wakituwa wa mndu nyi wandu wa kanyi koke.

⁷ Kyaindi inyi njikusiria Mndumii-Ruwa, njiwedia Ruwa ai monjikiṟa; Ruwa oko nechinjiadanyia.

Kikusirio na kiterewo kya wandu

⁸ Ulachihiyo kiheri kya kiwi kyako iyo mkituwa oko. Ngaomboka njechiidima ikurese; Ngakaa memenyi, Mndumii-Ruwa nyi ngela yako.

⁹ Kipfa ngadekio Mndumii-Ruwa, kinjiwaṟi ikarishia nyashi yake, mṟasa nadede kyako kisumhanyi njiwone kilya kii kyako. Nechiluende na nja kuwode ngeela, na inyi njechiwona keidikiana na wulohi.

¹⁰ Mkituwa oko nlyondi echiwona isho na iṟeenze; kipfa nalenjiwia, “Okung'u Mndumii-Ruwa, Ruwa opfo?” Inyi njimonyi njechiwona mkituwa kechiomboka; nechichumochumo cha odoko lo njienyi.

¹¹ Mkonu fukeri icha njomombo tsa mṟi fonu fuwiko wuhya. Mkonu fo mṟasa ya oruka lonu yechilandaṟo.

¹² Mkonu fo wana wa mayanu wechimuwuya, wuka Ashuru na shihongo sha Misri, wuka oruka lo Misri na njora tsa Eufrate; wuka ora lo mṟinga na njora tsa mafumvu.

¹³ Kyaindi oruka lungi lose lochiwa nuka ya msanga, kipfa kya wuwicho wo wenyi wawo.

Shiterewo

¹⁴ Ruwa, ringa wandu wapfo na olio lopfo, ringa iwo wa po lyapfo kumonyi iwo wai wawenyi, kundu ko ngeṟa wai waṟingichie nyi teri iwode sari. Uwalise na iwaringa chandu ulewuta ili mboko, kiidi kya Bashani na Gileadi.

¹⁵ Chandu uleluwuta Misri mandi halya, keluloṟe-se maṟiho hapfo.

¹⁶ Kundu wandu wa mkambo ili wechiwona, isho waichuo sonu ma kokoya wawode pfinya. Wawe mkahai wawuṟe kededa, wawe cha wapfu madu.

¹⁷ Wechikukuruo wanda cha njoka; ee da, cha shii na moo shekekukuruo. Wechiwuka otiṟiwenyi kowo, wechidedema na iichuo wuowu. Wechikuhalukia iyo Ruwa odu ko wuowu, wechiowuo kipfa kyapfo.

¹⁸ Hoi Ruwa, nyiu ai cha iyo? Iyo nohoṟia wunyamaṟi wo wandu wapfo waletsuhaa, manya ochiambuya se madeko hawo pfo. Nyashi yapfo yekeaka mlungana pfo, kyaindi nokundi mnu iluloṟa woloru wopfo.

¹⁹ Nochiluhoṟia se, hoi Mndumii-Ruwa; nochiarisia kuleshe wunyamaṟi wodu, nochikumba wunyamaṟi wodu wose kiidi kya ipalipalyi.

²⁰ Nochiloṟa wuhendeli wopfo na isaṟia lyapfo, ko kishari kya Abrahamu na kya Yakobo, chandu kulewikia waku wadu kyasa wokia kacha.