MIKA 6 - Bibilia Kui Mdedie fo Kimochi

Madedo ha mwikimbi

¹ Adanyienyi kilya Mndumii-Ruwa aihamba; “Iyo mwikimbi, henda dedia mafumvu, na shifumvu shiicho ṟu lyapfo.”

² Adanyienyi mondu fo Mndumii-Ruwa nyo mafumvu, adanyienyi nyo otende lo wuyana! Mndumii-Ruwa nawode mondu na wandu wake. O nechihamba kilya akumba nakyo Waisraeli.

³ Mndumii-Ruwa nahamba adi, “Lanye wandu wako kiki njilemuwutia? Kiki ngamuwinyisha nakyo? Njihaluonyi!

⁴ Inyi njilemuwuta Misri, ngamukiṟa wusingenyi ngamwinenga Mose, Aroni na Miriamu wamusongoe.

⁵ Lanye wandu wako, kumbuonyi chandu Balaki mangi ya Moabu aleoka mtambo, na chandu Balaamu mana o Beori alemhaluo. Kumbuonyi shilya shilemuhoya njienyi kiidi kya Shitimu na Gilgali. Kumbuonyi mumanye mawuto hako hemukiṟa!”

Wandu wawesa

⁶ “Njihendie Mndumii-Ruwa na kiki, kundu njiindie Ruwa ai huyako? Ngesa, njimhendie na kiano kemaya modonyi, njimnenge ihache lya maka fumu?

⁷ Ngesa, Mndumii-Ruwa nechichihiṟo na maruwa ha machondi kiku, ang'u meda kiku (1,000) na kiku (1,000) ya mafuda ha msinefu. Ngesa, njimneenge mana oko o kuwoka mbee, kipfa kya ideko lyako, ee, mana oko o kuwoka kipfa kya wunyamaṟi woko?

Mwikimbi ahaluo

⁸ Iyo mndu, Ruwa amekuloṟa kilya kii kicha, kindo Mndumii-Ruwa akundi kikeri kiile; iwuta mbonyi tsa wulohi, ukunde isaṟia na ikunyiiṟa oshangunyi lo Ruwa opfo kiidi kya mchumie mcha.

⁹ Mndumii-Ruwa nalaha wenyi mṟi, na nyi kichihiṟie imwindia. Adanyienyi, nyo wandu wa Yuda, adanyienyi nyo mulekusanza mṟinyi.

¹⁰ “Ngesa, njechikarishia mawicho hamawumbie kanyi kowo, masaa halewoneka kwi wulembi, hakaṟunda kwi kihesha kya wulembi, kindo kikeri kiwicho?

¹¹ Ngesa, njechiidima ihamba ke wawode tewe pfo, wandu wekelemba ili wahesha shindo, wakaweira maho heheshia halashikie.

¹² Wasuṟi wa mṟi yawo waichuo wulembi, wenyi mṟi wawo wekededa wongo, orio kindo wadeda nyi wulembi.

¹³ Koikyo na inyi, ngawoka iwaombotsa wanda, na iwarumatsa kipfa kya njonyamaṟo tsawo.

¹⁴ Mochilya kyaindi mochiihuda-pfo, mochiengeṟa iliyo nyi njaa kiidi kyanu, mkawika kisa kechiringo-pfo, na kokooya moringa kindo njechikinyamaṟa na shida.

¹⁵ Mowaya mbeu, indi mochisambuo-pfo. Mochikama msinepfu, indi mochiṟunda na mafuda-hopfo. Mochikama msabibu, indi mochinyo mvinyo-fo pfo.

¹⁶ Nyi muosha ofano luwicho lo mangi Omri, na ofano luwicho lo kishari kya mangi Ahabu, na ofano luwicho lo kishari kya mana o Ahabu, mukaweosha makusaṟo hawo. Ko ikyo njimuendie orumatso, orio mndu nechimumina. Wandu wechiwapiṟa orio handu.”