MIKA 5 - Bibilia Kui Mdedie fo Kimochi

Msongoru mhya awuka Bethlehemu

¹ Mndumi Ruwa nahamba adi, “Na iyo Bethlehemu Ephrata ukeri o oruka lo Yuda, ukeri mtutu konyiia wumangi wo Yuda pfo, kipfa kopfo iyo nyi kochikaa kuwuke mwitoṟi molisiṟa wanduwako Israeli.”

² Ko ikyo Ruwa nechida wandu wake ko wakituwa, mṟasa mndu mka ulya ai mlemo nafee. Numa wanawamae iwo wechitsuhaa wawuye na isanza na Waisraeli wodoyawo.

³ Msongoru cho nechilisa wake kwi pfinya ya Mndumii-Ruwa, kwi kiṟumi kya Mndumii-Ruwa, Ruwa oke, wandu wake wekusaya olelenyi, kipfa nechikuwia mnene mṟasa mtsitsionyi fo oruka.

⁴ Nyio echiende ofoṟo. Waashuru kokoya wachea oruka lodu, na iida waringi wadu wowawinza, lochidika waringi wewatoṟomisha, ee da, lochidika wachili wadu wafoi.

Ikiṟa na ihoṟuo

⁵ Kwi shisha shawo wechiitoṟia oruka lo Ashuru, na ichilia oruka lo Nimrodi. Wechiluashuo mawokonyi ha Waashuru, ili wechishika mṟasenyi fo oruka lodu na iwoka iṟinjawia oruka lodu.

⁶ Wa oshari lo Yakobo wedeoho na moo, wadung'anyie kiidi kya mkambo ifoi, wechiwa cha mlewi fo Mndumii-Ruwa fokewihiṟia moo, cha ṟauṟa ikeolokia maṟa maumu ilakeendo nyi mndu ma ikusihia mndu.

⁷ Wa oshari lo Yakobo wedeo na moo, wadung'anyie kiidi kya mkambo fo wandu wafoi, wechiwada pfinya ing'anyi cha mwiso kiidi kya mando hai na moo ngeṟenyi, cha ilea lya mwiso kiidi kya po lya machondi, orio handu lyaida, lyikaharundikia na ihahaluo choonga yawo, kulawoneke mohakiṟa.

⁸ Waisraeli wechiwinza wakituwa wawo na iwarumatsa piu.

⁹ Mndumii-Ruwa nahamba, “Kiheri kyo njechiwuta-pfo frasi tsanu, na inyamaṟa magari hanu ha frasi.

¹⁰ Njechinyamaṟa mṟi ya oruka lonu na iwunduo omombo lo mfiṟiha yanu.

¹¹ Njechirumatsa mawuto hanu ha wusawi, nanyo mochiwada-se walasha-pfo.

¹² Njechinyamaṟa sanamu tsanu na ngo tsa wuindi wonu, nanyo nyi mochida iindia shindo mulesungusia muwenyi.

¹³ Njechikuṟuo sanamu tsa maruwa ha wongo hawuka konu, na irumatsa mṟi yanu.

¹⁴ Kwi nyashi na isukio lyako, njechitaa kiṟache mkambo yose ilanjiindia.”

¹⁵ Na kui nyashi yako ing'anyi njechitaa kiṟache ko mkambo iya yose ileleha injiindia.