MIKA 3 - Bibilia Kui Mdedie fo Kimochi

Mika adedia wasongoru wa Israeli

¹ Wulalu adanyienyi nyo wanene wa oshari lo Yakobo! Adanyienyi nyo wa oshari lo Israeli! Nyi kimuwaṟi nyo imanya mbonyi tsa wusumhanyi.

² Indi nyo musuo wucha mukakunda wuwicho. Mokeowuo wandu wako njonyi tsawo, mukaowuo na nyama tsa mbihu yawo ipfo mafuonyi hawo.

³ Mkalya nyama tsa wandu wako, mkaowuo njonyi tsawo, mkafunja funja mafuo hawo, mkawawehaweha cha nyama tsekoṟa, cha nyama tsewika nungunyi.

⁴ Kuwode kiheri kechicha mfuhiye Mndumii-Ruwa, kyaindi echimhaluo-pfo. Nechiṟika kyamu kyake mandi-ho, kipfa muwutie mawuto mawicho.

⁵ Mndumii-Ruwa nahamba adi, kirianyi na waikimbi wadekesha wandu wako, waikimbi waonguo ofoṟo kokoya wainengo kindo, indi wakaowesha wandu ke kuwode shida kokooya walainengo kindo.

⁶ “Konu nyo waikimbi kochiwa meema kulawode mawonesio, kochiwa meema kulawode otambahaluo, konu nyo waikimbi kochiila, mfiri fochiwa meema konu.”

⁷ Iwa waichi ihamba mbonyi tsechicha wechisonu, walya waichi ihamba mbonyi wechisuka; wechipfumbuṟia madumbu hawo, kipfa Ruwa echiwahaluo idedo - pfo.

⁸ Kyaindi ko ora loko, njiichuo pfinya na mumuyo fo Mndumii-Ruwa, nanjitaramie imanya mbonyi tsa wulohi, ngawewada pfinya njiongoye, wa oshari lo Yakobo ideko lyawo, na oshari lo Israeli wunyamaṟi wowo.

⁹ Adanyienyi mbonyi i nyo wasongoru wa oshari lo Yakobo, adanyienyi nyo waitoṟi wa Israeli. Nyo musuo mbonyi tsa wulohi mukadetsa chile.

¹⁰ Nyo muwika mṟi fo Sioni ko samu, ee da! Mṟi fo Yerusalemu ko iwonyia wandu.

¹¹ Wachili wawo wekeṟunda ko itsutsumo, wakohanyi wakaṟunda kwi itao, waikimbi wakaṟunda wainengo fesa. Wakakushela ke wakusirie ko Mndumii-Ruwa wechihamba, “Mndumii-Ruwa chi ai naso, kuwode kechilupaya kiwicho pfo!”

¹² Kyasia! Kwi kipfa kya ikyo, Sioni yechidemo cha mdemi. Yerusalemu yechisamo na ifumvu, lya hekalu lyechiwa ngeṟa.