MIKA 1 - Bibilia Kui Mdedie fo Kimochi

¹ Ili nlyo idedo lya Mndumii lilechea Mika, Mmoresheti, maheri ha Yotamu, na Ahazi, na Hezekia, wamangi wa Yuda; mbonyi aletsiloṟo tsa Samaria, na Yerusalemu.

Kilio kya Samaria na Yerusalemu

² Adanyienyi, nyo wandu wa njoshari tsose, adanyia, iyo oruka, na nyo mose muipfo; Mndumii-Ruwa naṟingishie kyanu, Mndumii-chu awukie hekalunyi lyake liele.

³ Ee da! Mndumii-Ruwa naicha awuka handu hake; nasoka na ichumia huya njoweri tsa wuyana.

⁴ Mafumvu hechisalaa wanda ya njayo tsake, cha kimia kufui na modo; mapichi heching'alauka, cha mṟinga handu hesoka wodicha.

⁵ Ishi shose shechihoya, kipfa kya madeko ha oshari lo Israeli. Ngesa, deko lya Yakobo lyawono hanga? Kiidi kya mṟi foke fung'anyi Samaria. Ngesa, deko lya Yuda lyawono hanga? Kiidi kya Yerusalemu kwenyi?

⁶ Ko ikyo Mndumii-Ruwa nahamba adi: “Mṟi fo Samaria fochiwa msame kundu ko nuka, dema lyo wandu wekewaya msabibu. Maho halewika mṟi fo njechihakumba pichinyi, na njotende tsafo njechitsidema dema.

⁷ Sanamu tsafo tsa wuhuru tsechifunjo funjo, orio kindo kikiinengie ko wameluki wa hekalu, kechirumatso na modo. Shisanamu shose njechishinyamaṟa. Shilewumbio kwi wueri wo wumeluki, nasho shechiṟunda-se itaya wumeluki.”

Mwikimbi aifihiṟa kya Yerusalemu na Yuda

⁸ Kipfa kya ikyo, inyi njechifihiṟa na ikapa kilio; njechichumia kitaṟe ndaṟee nguo ma shaadu, njechikapa kilio cha ipara, njechisokio nyi fowa na ifihiṟa cha nyaha.

⁹ Shifaṟe sha Samaria shachiapfo, nasho shawekoya Yuda, shashika kichumi kya Yerusalemu, handu wandu wako wekekaa.

¹⁰ Mlahambe mbonyi i ipfo Gati, manya ulatonyitse mchenyeṟe! Ipfo Beti-leafra kukumbenyi kilulinyi mochisokio fowa.

¹¹ Hendenyi nyo wandu wa Shafiri, mui kitaṟe na iwado nyi sonu. Wenyi wa Saanani mulawuke nja ya mṟi fonu, wandu wa Beti-ezeli waifihiṟa, ndarama yawo konu injiwute ho.

¹² Wandu wa Maroti waiwedia ndarama ko macha hang'anyi, indi orumatso locha luwokie ko Mndumii-Ruwa, hafui nakamu na kichumi kya Yerusalemu.

¹³ Lanye wandu wa Lakishi, lungenyi frasi na magari ha shida. Nyo mulesanga wunyamaṟi wo wandu wa Sioni, madeko ha Waisraeli hawei konu.

¹⁴ Ko ikyo kimuwaṟi mulekane na mṟi Moresheti-gati. Na mṟi fo Alezibu fochitarama wamangi wa Israeli ko kindo kyose-pfo.

¹⁵ Nanyo wandu wa Maresha, Ruwa nechimuendie se mkituwa echiwaduo wupfungo. Wanene na wasongoru wa Israeli, wechidichia mbakonyi ipfo Adulamu.

¹⁶ Nanyo wandu wa Yuda, odenyi ohaa, ifihiṟia wana wanu wakunde, landaṟenyi ohaa lonu lulandae cha lo owishi, kipfa wana wanu wadao wusingenyi kuleshe.