MFANANO 9 - Bibilia Kui Mdedie fo Kimochi

Wuṟango na wutondo

¹ Wuṟango nalewika mba yake, Amepacha ngo tsake mfungade;

² Ameshinja nyama tsake, kawedika mvinyo foke, Kaweteseheṟa handu hake helyiya.

³ Ameduma shisinga shake, kechifuha, Handu ha mṟinyi kukuirie mnu,

⁴ Orio ai isembo naide na kunu. Ngoseṟa nawia ulya ai oṟuṟe,

⁵ Njo nolye mkate foko, Uwenyo mvinyo mlongelonge.

⁶ Nyo masembo, denyi wusembo, mkae na moo, Mchumie kiidi kya wuṟango.

⁷ Modedia ichu mopiṟa, momina nyi echitaluka; Mokanga mndu mmbicho nyechihutsio sonu.

⁸ Kuladedie mminyi, nalashike ikusuo; Kanga mndu mṟango nao nechikukunda.

⁹ Losha mndu mṟango nao nechiengeṟa iṟanguo, Losha mndu o wusumhanyi, nao nechiengeṟa iloshika.

¹⁰ Iindia Mndumii nyi mawookionyi ha wuṟango, Na imanya ichu mwele nyi wulaanyi.

¹¹ Kipfa, kui ndarama yako mfiri yapfo yechiengeṟo; Na maaka ya moo fopfo yechiengeṟo.

¹² Kokooya nyi uwode wuṟango, nyi wuṟango wopfo kumonyi Na kokooya nyi umminyi nochiwuduo kumonyi.

¹³ Mndumka tondo nekefahia, Nyi isembo, aichi kindo pfo.

¹⁴ Nekekaa kichuminyi kya mba yake, Loṟikenyi handu hakuirie mṟinyi,

¹⁵ kundu naidime ilaha walya weida njia, Walya wakuhendia maṟundenyi hawo

¹⁶ Oriyo ai isembo naide na kunu. Ngoseṟa nawia ulya ai oṟuṟe,

¹⁷ Mṟinga foiwa fokeloda, Na mkate folya kiṟika fui mcha.

¹⁸ Kyaindi aichi ke ipfo kuichuo wapfu-pfo; Ngoseṟa wahenu wake wai wandu ko waṟumu.