MFANANO 8 - Bibilia Kui Mdedie fo Kimochi

Ndaho ya wuṟango

¹ Alewo wuṟango afihiṟa? Wulaanyi wukeri iwuta ṟu lyake?

² Handu hakuiṟiye kufui na njia, Handu njia tsitsahanyi, hondo ahoṟoki.

³ Kufui na kichumi, handu heida na mṟinyi Handu heida na kichumi nyi akeri ifahyia.

⁴ Lanye wandu, nyi nyo njimulaha; Ṟu lyako nyi ko wandu.

⁵ Nyo masembo manyenyi kindo, Na nyo matondo, wadenyi mrima fomanya.

⁶ Adanyienyi, kipfa njechideda shii shicha, Ngatambaṟuo dumbu lyako kochiwada chile.

⁷ Dumbu lyako lyechideda lohi, Njisuo wuwicho dumbunyi lyako

⁸ Madedo hose ha dumbu lyako hawode wulohi Kuwode idedo ma limu lidekie ang'u lya wulemeshipfo.

⁹ Shose shekemanyikia ulya aichi, shose shekekooya ulya awode wuṟango.

¹⁰ Ambilya shiloshyo shako, chi fesa pfo, Na wulaanyi kota sahabu njicha.

¹¹ Kipfa wuṟango wui wucha kota; Ma shilya shi shilange shiṟinganyi nawo pfo.

¹² Inyi wuṟango njilehaluo wulaanyi kanyi koko; Njishiha imanya ngoseṟa.

¹³ Iindia Mndumii nyi isuo wuwicho, Orikiki na ikushela; na njia njiwicho; Na dumbu lya wulemeshi nalyo njilisuo.

¹⁴ Chile nyi yako, na wulaanyi wuhoṟotsu; Inyi nyi wuṟango, inyi njiwode pfinya.

¹⁵ Kui ndarama ya ko Wamangi wakaitoṟya, Na wanene wadumbuo kya wusumhanyi.

¹⁶ Kui ndarama yako wanene wakalisa wandu, Na walya wa kiṟumi, ee da, wachili wose wa wuyana

¹⁷ Njikundi walya wanjikundi, Na walya wechinjishiha mnu na mrima wechinjiwona

¹⁸ Wusuṟi na wuindi shi koko, Ee da, wusuri wokaa, na wusumuhanyi.

¹⁹ Ndunda tsako tsiidie sahabu, ee, sahabu njicha, Na kiira kyako kikaida fesa njisambuṟe.

²⁰ Njiida kiidi kya njia ya wusumhanyi, kiidi kya ohendo lo mwanduye.

²¹ Njiinenge masaa walya wanjikundi hawe kyooṟa kyawo, Njiidime iichuṟa kisa kyawo.

²² Mndumii nyi awei na inyi kuwokia mawokyonyi Mawuto hake ha mbooko halamshika iwa.

²³ Njiwei mng'anyishe wokia mlungana; wokia mbooko wuyana wulamewiko.

²⁴ Kulamekaa pfo kindo kyose njilefeo, Kulamekaepfo soka tsiichuo mṟinga.

²⁵ Mafumvu halamewada pfinya, kulamekaapfo shitoṟomoso njiwemefeo.

²⁶ Lilya mandi alawemeumbe wuyana, na nuka, ma kiluli kya oruka;

²⁷ Kechiwanza ruwehu njiweipfo; kechikapa mcharie kiidi kya ipalyipalyi;

²⁸ Awanza mapuchi hai huye; soka tsa ipalyipalyi tsiwada pfinya;

²⁹ Awika mṟasa fo ipalyipalyi, Ke mṟinga fulawone fochifunja iwawaso lyake; Awawasa njotende tsa oruka;

³⁰ Nlyo mbei nao, cha mwaaria o iṟunda, Ngawa sia yake orio mkonu; Njechichihiyo mfiri yose oshangunyi loke;

³¹ Ngachihiṟo nyi wuyana wokekao nyi wandu; sia yako iwekeri kimu na wandu.

³² Kyasia, wana wako, njiadanyienyi wulalu; kipfa nyi nanga ya walya wewada mawawaso hako.

³³ Adanyienyi kiloshyo, muwade wuṟango, ma mulalehe.

³⁴ Nawode nanga mndu ulya ekenjiadanyia, kechiweda mkonu yose kichuminyi kyako, katirima o mongonyi foko.

³⁵ Kipfa ulya monjiwona inyi nyi awona moo, Nao nyi echiidikyo nyi Mndumii.

³⁶ Kyaindi ulya monjiwuṟa nyi akunyamaṟa amonyi, Walya wanjisuo wakunda opfu.