MFANANO 7 - Bibilia Kui Mdedie fo Kimochi

¹ Manoko, wada madedo hako, Na iwika mawawaso hako kisa kyapfo.

² Wada mawawaso hako nokae na moo, Na itutuma lyako cha njeche ya riso lyapfo.

³ Hapfunge shimnyonyi shapfo; Ṟehia kiidi kya iho lya mrima fopfo.

⁴ Wia wuṟango, iyo nyi mshiki oko; Laha imanya nyi mndu mka ai kishari kyako.

⁵ Kundu shikuringe na wameluki, Na mhenu mokulembalemba kui madedo hake.

⁶ Kipfa kiidi kya mba yako njiwode itiṟisha, Ngawona njiitsa meso handu hawode mwaanya.

⁷ Ngawona kiidi kya masembo, Ngamanya umu o wanake, manake umu alawode mahio,

⁸ Kechiida njienyi ii kufui na mlemeko, Kechitikiria kichumi kya kanyi koke,

⁹ Kiheri kya kiukanyi, kuwode kimbulimbuli, Kio kikashinga, mahelehele meemenyi.

¹⁰ Ambuya, mndu mka umu kamkoya, Naṟee nguwo tsa wumeluki, namṟango maama mrimenyi

¹¹ Nawode kifahio na wulemeshi; Madende hake hechiidima ikaa kanyi pfo.

¹² Nyi ochimkooya ipfo mtandarenyi, lingi ipfo patenyi, Kawelaa laa ipfo mbai ya njia.

¹³ Tapu, kambada, kamhekia momu, kambia kui kyamu kilawode sonu,

¹⁴ Koko kuwode shiinengo sha ofoṟo; Nyi inu kudi ngainutsia kyaasa na isamba;

¹⁵ Nkyo kyatewa njiche ikuambia, Njishihe kyamu kyapfo mnu, na inyi ngakuwona

¹⁶ Njialiye kitaṟa kyako na makondoṟo mecha, Ngaweala nguwo tsiwode mchariye tsa Kimisri,

¹⁷ Njiletsie kitaṟa kyako mafuda ha opfaamo lucha,

¹⁸ Wulalu nnde luhende ichihiyo mṟasa ngamenyi, Luchihiṟe mbihu yadu na lango tsa wumeluki.

¹⁹ Kyamba ma mii oko akeri kanyipfo, Nyahendye kyaṟo kya kuleshe

²⁰ Umanye nyi kuleshe, naleduo mkunja fo fesa owokonyi Nawuye kunu na meeri okombe.

²¹ Kui madedo hake hafoi mawiriwiri kamlemba Kui ilembalemba na dumbu kamwidima.

²² Kudi, faṟa, kakure kaoshana nao, Na cha mmbe idao kishinjyonyi; Ang'u tondo lipfungo na shiwoho;

²³ Mṟasa mfi fulase dima; Cha kilehe kidichya mdehonyi ma kiichi nyi osiiyonyi lo moo fokyo pfo.

²⁴ Kyasiang'u wana wako, njiadanyienyi wulalu, Muambuye madedo ha dumbu lyako.

²⁵ Mrima fopfo fulaoshe njia tsake, Ulawone kochidetso ipfo ohendonyi loke.

²⁶ Kipfa nyi wafoi waiwaolotse wai na shifaṟe, walya wai wawaahe nyio nyi kilula kya wandu.

²⁷ Mmba yake nyi kichumi kehenda ko waṟumu Kyekesoka itane mba ya opfu.