MFANANO 6 - Bibilia Kui Mdedie fo Kimochi

Mawawaso haana

¹ Manoko, kokoya nyi ui mkaṟa o mbuya yapfo, Kokoya nyi ui mhenu mkawadana ang'asa,

² Kyasia nyi ui mdehe na madedo ha dumbu lyapfo Omewado na madedo ha dumbu lyapfo

³ Wulalu, manoko, wuta kudi kundu nokie, Kipfa omekuwika mawokonyi ha wamṟasa opfo; Henda umwolokie na ikunyiṟa ko wamṟasachu opfo.

⁴ Kulatsingiṟe na ilaa mado, Manya meso hapfo halarengere

⁵ Kuṟise cha sariha owokonyi lo molasa Cha kilehe owokonyi lo mdehi.

⁶ Iyo mdoko, henda sahya malondo, kusaṟe kyaho nowade wuṟango

⁷ Kipfa hawode mchili pfo, Ma mohoṟokia, ma mnene,

⁸ Indi hekewika kisa kiheri kya kwari; na isanyia shelya kiheri kya shilimu.

⁹ Iyo mdoko, nochilaa mṟasa indii? Nyi indi ochiwuka madonyi hapfo?

¹⁰ Kuwode ilaa kitutu, ihombia kitutu, kiheri kelema mawoko na ilaa kyamshika pfo!

¹¹ Koikyo iwuṟa lyapfo lyekuchea cha msoki, Na ilanga lyapfo cha mndu arie shisha.

¹² Mndu aleidima kindo, mndu o wuwicho, Nekyeida njienyi na dumbu lya odetso.

¹³ Nekyekapa na meso, kadeda na madende, Kakemya wandu na shimnyo shake

¹⁴ Nawode wudetsi mrimenyi, kasanyia wukika kiheri kyose, Nekyewaaya mbeu tsa maloyano.

¹⁵ Kyasia opfu lochimchea alakusirie; Nechifunjika oweṟe, alekaa nachie.

¹⁶ Kuwode shindo shiṟandaṟu shisuiṟiye Mndumii; Ee da! Shiipfo mfungade shii shiwicho koke.

¹⁷ Meso ha orikiki, olimi lo wongo, mawoko hepusuo samu ilawode mti.

¹⁸ Mrima fuwode makusaṟo mawicho; madende maangu idichia wunyamaṟi;

¹⁹ Mngochi o wongo ekehamba wongo; Na ichu mowaaya mbeu tsa wuṟiingi kiidi kya wandu.

Wuwawaso kiidi kya ngafu

²⁰ Manoko, wada mawawaso ha ndeyo, ma kulade iwawaso lya mayo.

²¹ Shipfunge isho mrimenyi fopfo kitsitsi; Ṟaa nzingonyi yapfo;

²² Kundu ochihenda shechikusongoya, kolaa shechikuringa; Na kokure, shechideda na iyo.

²³ Kipfa mawawasoho nyi taa na itutumo nyi sa, Na idedya lyelosha mndu nyi njia ya moo.

²⁴ Shikuringe na mndu mka mmbicho nalakuwade, Na ikuchiṟa na ilembalemba lya mhenu.

²⁵ Ulalange wucha woke mrimenyi fopfo, Ma kulaidikie nakuwade na mbawa tsa meso hake.

²⁶ Kipfa ko mmeluki mndu nekeinengo lango yelya kipeṟengu kya mkate; Na mmeluki kadeha mndu kundu nawade moo foke fui fo kiira.

²⁷ Mndu nechiidima ihekya modo o kipetehu kyake, Nguwo yake ilechihya?

²⁸ Ngesa mndu nechiidima ichuma makaa ha modo, Na njayo tsake tsilehya?

²⁹ Nyi udo ai ulya ekehenda ko mka o wamṟasa oke; mndu mokuwasha nao newada mti.

³⁰ Wandu wekemina miiwi pfo Kaiwa kundu naihude kokoya awodo nyi njaa;

³¹ Indi kawado, netaa ka mfungade; nechiwuta masaa hose ha mba yake.

³² Mndu kaṟuhuya na mndu mka awode oṟongopfo; Nawuta kindo kechimwarisia wanda moo foke.

³³ Nechiwona shifaṟe na idetsa kiṟumi; Na sonu yake yechisia pfo.

³⁴ Kipfa wunyenyi nyi nyashi mbicho ya mndu, Manya echisaṟia mkonu fo kiṟaachepfo.

³⁵ Echiidikya okiṟo lo mbaṟi yosepfo; ma echiidikya, ma katao shindo shiingikipfo.