MFANANO 5 - Bibilia Kui Mdedie fo Kimochi

Wuwawaso kiidi kya wumeluki na wulala

¹ Manoko, adanyia wuṟango woko; Deha kudu kopfo, uadanyie makusaṟo hako,

² Uringe wulaanyi, Na dumbu lyapfo liṟike imanya.

³ Kipfa dumbu lya wameluki lyeketonyitsa wuki, Olimi loke lulurendekeli kota mafuda;

⁴ Kyaindi ilyi lya ifurumia lowawa kota kiwasi; luohi cha oshu lo mmbeha kuwi.

⁵ Madende hake hesokia opfunyi; Ndifo tsake tsiwadanyi na ko waṟumu;

⁶ Ma alaidime iwona njia isumuhanyi ya moo; Ohendo loke loṟuha manya aichi pfo

⁷ Kyasia, wana wako, njiadanyienyi wulalu; Ma mulade madedo ha dumbu lyako.

⁸ Wika odende lopfo haleshe nao, Ma kulasembelie kichi kya mba yake.

⁹ Kulainengie wengi kiṟumi kyapfo; Na wenyi mtambo maka yapfo.

¹⁰ Wahenu walawone weihuda pfinya tsapfo; Maṟunda hapfo hakawa kiidi kya mba ya mhenu;

¹¹ Na iyo kosumukia maka yapfo ya ifurumia, Kiheri nyama yapfo na mbihu fopfo ilyi shechisaramaya

¹² Na iyo kohamba, chando mbesuuye iwawaso, Na mrima foko fukamina idedio

¹³ Ma njileadanyia ṟu lya walosha wako pfo, njiledeha kudu ko walya walenjilosha pfo!

¹⁴ Njiwei kufui na ioloka mawichonyi hose, kiidi kya chila na shisanzio.

¹⁵ Aṟawa nyo mṟinga fo nduwa yapfo kumonyi, Na mṟinga fuitsa msanjika fo ṟungu lyapfo lya mṟinga

¹⁶ Ngesa nohamba soka tsapfo tsipahuo pahuo tsihende haleshe, Na meda ya mṟinga ipfo mtandarenyi?

¹⁷ Kudeye fuwe fopfo kumonyi Ma chi wahenu hamu na iyo pfo

¹⁸ Soka yapfo iwikio ona; Na iyo ukunde ichihiyo kya mka o uwanake wopfo.

¹⁹ Nyi sariha ichihiṟiye na sumbuda injicha; maruwa hake hakushike mkonu yose; Na ikunda lyake likuendie msiha kiheri kyose.

²⁰ Manoko! Nkilyi uilalekia wameluki, Na ichunguṟia kipeeta kya mhenu?

²¹ Kipfa njia tsa mndu o wandu tsii oshangunyi lo meso ha Mndumii. Na njohendo tsake nyekekusaṟa kyatso.

²² Shiwicho shechihoya wewuta sha mkika, Nao nechiwado nyi shiwoho sha njonyamaṟo tsake

²³ Na icho nechipfa awuṟa iwawaso Nao nechideka kipfa kya mfoeṟa fo wutondo woke.