MFANANO 4 - Bibilia Kui Mdedie fo Kimochi

Kiira kya wulaanyi

¹ Wana wako, adanyienyi madedo ha wandeanu, Dehenyi madu muidime imanya

² Kipfa njikeri imuinenga shiloshyo shicha, mulade mawawaso hako.

³ Kipfa mbei mana ko wande oko, mhoo, mkunde kimumu ko wama oko

⁴ Nao kanjilosha, kanjiwia, mrima fopfo furinge madedo hako; Wada mawawaso hako nokie moo

⁵ Wada wuṟango, wada imanya; kulahadime; Manya kulalehe madedo ha dumbu lyako.

⁶ Kulamde, nao nechikukiṟa; Umkunde, nao nechikuringa.

⁷ Nanga wuṟango, nahong'u wada wuṟango; Ee, kiidi kya shilya oshiwona wada imanya.

⁸ Mwichike, nao nechikuichika; Nechikuṟumisha, komchunguṟia.

⁹ Nechikuinenga osaṟio luwe cha kitambaa kya mdonyi; Nawekuinenga oṟo iya ya wucha.

¹⁰ Manoko, adanyia, ambiliya madedo hako; Maaka ya moo fopfo yechifo.

¹¹ Njikuloshie kiidi kya njia tsa wuṟango; Ngawekuduo kiidi kya njohendo njihoṟotsu.

¹² Kundu ochihenda, ndifo tsapfo tsechilemeka pfo, Ma kowika mteeṟa ochikapa mtulia pfo

¹³ Wada mnu kisomio, ulamlekie nahende; Mmbade tapu, kipfa nyio okiṟo lopfo

¹⁴ Ulahende kambenyi lya wawicho, Ma kulachumie kiidi kya wewuta mawicho

¹⁵ Kuṟise mnu, ma kulaide hafui nasho, Halukia kuleshe, kuhendie.

¹⁶ Kipfa wechilaa walawuta wunyamaṟi pfo; Wekewuṟa mado, kokoya walaidima iolotsa mndu.

¹⁷ Kipfa wekelya mkate fo wuwicho, Na inyo mvinyo fo otoolo.

¹⁸ Indi njia ya wenyi wusumhanyi ii cha sa iwaa, Ikaweengeṟa iwaa mfiri puti.

¹⁹ Njia ya wawicho ikeri cha mema; Waichi nyi kindo kida kiwaima pfo.

²⁰ Manoko, adanyia madedo hako; Deha kudu kopfo, uadanyie madedo hako.

²¹ Halawuke mesonyi hapfo, Haṟike kiidi kya mrima fopfo.

²² Kipfa nyi moo ko walya wehawada, Nyi oru lo mbihu fowo fose.

²³ Ringa mrima fopfo kota shose okeringa, kipfa mpfo kuṟukie soka tsa moo.

²⁴ Dumbu lya wutimbiri ulekane nalyo, Na madumbu hededa wuporu ukae naho haleshe.

²⁵ Meso hapfo haambuye kusonguo, Na mbawa tsa meso tsiambuye necha kusonguo.

²⁶ Usungusie ohendo lo odende lopfo, Na njia tsapfo tsiwange;

²⁷ Kulahaluke ko kulyo ma ko kumoso, Wuta kudende kopfo mawichonyi.