MFANANO 31 - Bibilia Kui Mdedie fo Kimochi

Kilosho ko mangi

¹ Madedo ha mangi Lemueli, madedo alelosho na ipfundo nyi mae oke.

² Nkiki manoko? Nkiki mana o wusu woko? Nkiki mana o kyaasa kyako?

³ Kulainenge waka pfinya tsapfo Ma mrima fopfo kulainenge walya wekenyamaṟa wamangi.

⁴ Ho! Lemweli, inyo mvinyo fuwaṟi wamangi-pfo, kiwaṟi wamangi-pfo. Manya kiwaṟi wanene wawese, nku kuwode kindo kyenanza?

⁵ Walanyo kipfa wehadima wuwawaso, Na idetsa kilya kii-kicha keanduya mndu ai ngataṟenyi.

⁶ Inenga wunanzi ulya ai kufui na ideka; Inenga mvinyo ulya aiwawio mrima.

⁷ Nanyo nahadime wukiwa woke; Nalakikumbuo ngataṟa tsake.

⁸ Dambuo dumbu lyapfo kipfa kya ichu ai pipi; Nodede handu ha iwa waledeo wawenyi;

⁹ Dambuo dumbu lyapfo, noanduo kii lohi; Noinenge wakiwa na wahuṟi kilya kiwasumhanyi.

Mka asumhanyi, sa amcha

¹⁰ Mka mcha nyiu echiidima imbona? Kipfa wuhuru woke wuidiye mafuda mecha hepfaama.

¹¹ Mrima fo mii oke fumiidikie Manya echiwuṟa shilya akundi pfo.

¹² Nekembutya shicha chi shiwicho pfo Mkonu yose ya moo foke.

¹³ Nekeshiha mberi (mafufuta) na kitanyi, Nekeṟunda na mawoko hake na mrima fumu.

¹⁴ Nafananyi na merikebu tsa mbucha; Nekeende shelya wuka kuleshi.

¹⁵ Nekekure kilawo, kio kilamesia; Kaweinenga wandu wa kanyi koke kando Na shisinga shake mooko yawo.

¹⁶ Nekewona dema kalihuṟa; Kui kilya awode mawokonyi kawaaya msabibu.

¹⁷ Nekekuṟika pfinya cha kiṟota kitsinyi, kakarisha mawoko hake.

¹⁸ Nekeambuya mbucha yake kokoya na iwode kiira, Ekerumisha taa yake ilyi kio-pfo.

¹⁹ Nekeoka ndusu taṟaṟaa; Na mawoko hake hakawada.

²⁰ Nekeinenga wakiwa kilya waterewa; Kaweleshya mawoko walya wahuṟi.

²¹ Walya wa kanyi koke wekeowuo mbeo-pfo; Kipfa waṟee nguwo tsa kimande.

²² Nekeoka nguwo tseala wanda tsa kisa; Mṟae yake nyi kitanyi na tsa king'ari-ng'ari.

²³ Mii oke nekemanyika o kichuminyi; Ilyi adamya na wameeku wa oruka.

²⁴ Nekesaya nguwo tsa kitanyi katsikumba; Nekeinenga wekapa mbucha ngowa tsepfunga kitsinyi

²⁵ Pfinya na ikuchopa nsho mṟae yake Naseka kiheri kecha

²⁶ Nekedambuo dumbu lyake kui wulaanyi Wuwawaso wucha wui kiidi kya olimi loke.

²⁷ Nekeṟisa mnu ohendo lo wandu wa kanyi koke; Ma ekelya kelya kya wudoko pfo.

²⁸ Wana wake wekemlaha nanga; Mii oke nekemṟumisha kechihamba,

²⁹ Wana wa waka wa wandu wafoi wawutie shicha da! Indi iyo nowaidye wose.

³⁰ Ikundia lyekelemba, na wucha nyi mai. Indi mndu mka aowoye Mndumii, nyio echiṟumisho.

³¹ Mnenge shilya uwode mawokonyi hake; Na mawuto hake hamṟumisha kichuminyi.