MFANANO 30 - Bibilia Kui Mdedie fo Kimochi

Kilosho kya Aguri

¹ Madedo ha Aguri ai mana o Yake; mbonyi aleongoya mndu aleongoya Ithieli, Ee, Ithieli na Ukali.

² Nyi lohi njiwei cha indo lya ngeṟenyi ma chi mndu-pfo; Ma njiwode mahio cha mndu-pfo.

³ Ma njilekulosha wuṟango-pfo; Ma wuṟango womanya ichu ai mwele.

⁴ Nyiu adooye huye kasokya wanda? Nyiu alewada otanu na mawoko hake? Nyiu alepfungia mṟinga nguonyi tsake? Nyiu alewanza mambo tsose tsa oruka? Rina lyake nyiu, a rina lya mana oke kokoya na uichi?

⁵ Oriyo idedo lya Ruwa lilitume; O nyi ai ngawo ya iwo wamiidikye.

⁶ Kulaengeṟe idedo kiidi kya madedo hake; Alache kusuo, uwono nyi ui mowongo.

⁷ Shindo shi shiwi ngakuterewa Kulanjiime [shiṟaṟu] ndamepfa.

⁸ Njiwuta mbonyi tsa ngafu na wongo; Ulanjineenge wukiwa manya wusuṟi; Njineenga kando kahianyi na inyi.

⁹ Ndaihude njilekane na iyo, Njechihamba Mndumii nyiu? Ma njilawe mkiwa mnu njiiwe, Na isenda rina lya Ruwa oko kya maai.

¹⁰ Kulakumbe mṟundi ko menyi oke; Nalakusese, nokooyo na owingo.

¹¹ Kuwode kishari kya wandu wekesesa ndeawo; Walekewikia wamaawo ona.

¹² Kuwode kishari kya wandu wekutana wecha wo wawenyi; Walawasanje oko lowo.

¹³ Kuwode kishari kya wandu wawode meso helanga! Mbawa tsa meso tsiaṟami.

¹⁴ Kuwode kishari kya wandu wawode maheho maohi; Na shyasa shawo shifananyi na shoshu. Waidime ilya wakiwa wawuto orukenyi, Na wahuṟi kiidi kya wandu.

Mfanano ya ndambu

¹⁵ Kipfi kiwode wana wawi wa kika Wekefihiṟa, nnenga! Nnenga! Kuwode shindo shiṟaṟu shilakeihuda piu, Ee da! Shiina shilakehamba nahong'u!

¹⁶ Ko Waṟumu, wusu wulakefee; Oruka lula Ihuda mṟinga; na modo fulekehamba nahong'u!

¹⁷ Riso lyechitaluo ndee; Likawuya ipiṟa mae; Makuru ha pichinyi halikuṟuo, Na mbeṟo njikoho tsilimeṟe.

¹⁸ Kuwode shindo shiṟaṟu shi sha kiṟiha koko, Ee, da! Shiina ndashiichi.

¹⁹ Ohendo lo mbeṟo irunduka; Ohendo lo njoka huye ya iṟaṟa, Ohendo lo merikebu kiidi kya ipalyipalyi; Ohendo lo mndu hamu na mana o waka

²⁰ Ifo nyi fo mhendie fo mndu mka mṟuhui; Nekelya kaanguo dumbu lyake, Kahamba, ngamewuta kindo kiwichonyi.

²¹ Kipfa kya shindo shiṟaṟu wuyana wokededema, Ee, da! Kipfa kya shiina yeidima itirisya-pfo.

²² Isinga ilindi lyawa mangi; Tondo likaihuda kando;

²³ Mndu mka alawode oshangu lucha kaaliko; Kisinga kikeri mokyooṟa o mkeku oke.

²⁴ Kuwode shiumbe shiina wuyanenyi shii shitutu; Indi shiwode wuṟango wung'anyi mnu.

²⁵ Malondo nyi wandu walawode pfinya; Indi hekesanya kisa kiheri kya kwari.

²⁶ Shihuhuna nyi wandu wafafa Indi shekewika kiidi kya iṟaṟa.

²⁷ Nzihe tsiwode mangi-pfo Indi tsechehenda tsose handu hamu kui ipo kui ipo

²⁸ Isehesa lyekewada na mawoko halyo, Indi likeri mmbenyi ya mangi.

²⁹ Kuwode waṟaṟu wawode mhendye fuchihiṟye, Ee, Da! Waana wachihiṟye mnu.

³⁰ Miiso fuwode pfinya na ikarya kota mando hengi hose, Ma fokekuṟisa na kindo kyose-pfo

³¹ Olong'oi lohenda wo kushela; na kyooṟo; Na mangi oshangunyi lo wandu wake.

³² Kokoya nowuta wutondo kokuṟumisha; Ang'u kokoya nokusaṟa mawicho; Kyasia wika owoko lopfo huya dumbu lyapfo.

³³ Kipfa kosika maruwa nochiwonaho msika; Kokapa mbuo yechiwuta samu; Ikyo kirianyi na ihaaya nyashi yeende ngapano.