MFANANO 3 - Bibilia Kui Mdedie fo Kimochi

Mapfundo ha warika

¹ Manoko, ulahadime wuwawaso woko, Indi mrima fopfo furinge mawawaso hako.

² Kipfa nochiengeṟyo mkonu ifoi, Na maaka ya moo na ofoṟo.

³ Osaṟyo na lohi shilalekane na iyo; Shipfunge nzingonyi yapfo; Shiṟehiye ihohu lya mrima fopfo.

⁴ Nlyondi ochiidikyo na oṟongo lucha Oshangunyi lo Ruwa na oshangunyi lo wandu.

⁵ Kusirie Mndumii na mrima fopfo fose, Ma kulakusirie wuṟango wopfo kumonyi

⁶ Kiidi kya ohendo lopfo mwidikie o, Nao nechihoṟotsa njayo tsapfo.

⁷ Ulawe meenyi wulaanyi mesonyi hapfo, Idikia Ruwa nodiche wuwicho.

⁸ Isho nyi shi shicha imanya, Nochiwa cha moongo mafuonyi hapfo.

⁹ India Mndumii na masaa hapfo, Na shilimu shapfo shose.

¹⁰ Nlyondi shikumbi shapfo shechiichuo pacha, Na nanda tsapfo tsechiletseka mvinyo mhya.

¹¹ Manoko, ulamine ilyi okapo nyi Mndumii, Manya kulawone nyi wukiwa ilyi echikuhoṟwo

¹² Kipfa ulya amkunde nyi Mndumii nekemkapa, Chandu ndee o mndu ulya amkundi.

¹³ Nanga mndu ulya ekewona wuṟango, Na mndu ulya ekeinengo imanya.

¹⁴ Kipfa mbucha yake injicha kota mbucha ya fesa, Na iṟimiṟa lyake nyi lyifoi kota sahabu njicha

¹⁵ O nyi awode wuhuru kota mafuda ha wuhuru wung'anyi, ma shilya ushilangie shiṟinganyi nao pfo.

¹⁶ Nyi awode mfoeṟa fo mkonu owokonyi loke lo kulyo Wusuṟi na wuindi owokonyi loke lo kumoso.

¹⁷ Ohendo loke sa luchihiṟiye mnu, Na njienyi tsake tsiwode ofoṟo.

¹⁸ Nyi ikidi lya moo ko walya wakuwode nao mnu Nawode nanga mndu ulya awadanyi nao.

¹⁹ Kui wuṟango Mndumii nalewika njotende tsa oruka. Kui wulaanyi kawewika ruwehu iwange;

²⁰ Kui mhio foke makidi hawi ha ipalyipalyi kulehawukana Mapuchi hakatonyitsa ṟauṟa.

²¹ Manoko, ishi shilawuke mesonyi hapfo, Wada wuṟango tapu na wulaanyi

²² Kyasia shechiwa moo mbihunyi kopfo, Na osaṟio nzingonyi kopfo

²³ Nlyondi ochikuhendya njienyi yapfo kipuo, Manya ochikapa odende lopfo mtulia pfo.

²⁴ Ochiowuo ili olaa pfo; Ee da, nochilaa na mado hapfo hechichia.

²⁵ Ulaowesho nyi kindo kya kitusu, Manya kiheri kya kiṟaache kya wawicho ili kechishika.

²⁶ Kipfa Mndumii nechiwa mkusirie fopfo, Nao nechiringa kudende kopfo kulawado.

²⁷ Kulaime wandu shilya shawo shiwaṟi shii shicha, kokoya shikeri mawakonyi hapfo iwuta kudo.

²⁸ Kulawie wamṟasa opfo, Henda nowuye se, na ngama njechikuinenga; Na iyo nowode kindo kilya hafui na iyo.

²⁹ Ambuya kulakusaṟe mawicho kya wamṟasa opfo, Icho ai hafui na iyo kawona nyi ngaya yake.

³⁰ Ulakuhode na mndu kulawode kitewe, kokoya alamekuwutie kiwicho kyose.

³¹ Kulalange mndu awode mtoolo, Ma kulasange ho ma njia yake imuho.

³² Kipfa mndu mtimbiri nyi asuiṟiye Mndumii, Indi shiṟike shake nyi kimu na wahoṟotsu.

³³ Oseso lo Mndumii lui kiidi kya mba ya wawicho, Indi nyekewikia ona mba ya wewuta shisumhanyi.

³⁴ Mndumii nekemina walya wemina, Nekeinenga wakunyiṟiye osaṟio.

³⁵ Wenyi wuṟango wechioṟa wuitoṟi Indi iichika matondo nyi mai na mai.