MFANANO 29 - Bibilia Kui Mdedie fo Kimochi

¹ Motutumo kafoi nao kaumiṟa mrima; Nechifunjika na limu, alechiwona mdi.

² Wasumhanyi wakawada wuwawaso, wandu wekechihiyo; Indi mndu mbicho kawada oruka wandu wekeluo.

³ Mokunda wuṟango nekechihiṟa ndee. Indi mokuwada na wameluki nekeola masaa.

⁴ Mangi nekewanza oruka kui mwanduye; Indi mokunda itsutsumo nyi echiifihisuo

⁵ Mokukundya ko wamṟasa oke. Nekeala ndusu tsii njioke maṟawushi kakudeha madende amonyi.

⁶ Kuwode mdeho kiidi kya deko lya mndu mbicho; Indi mndu o wusumhanyi nekeimba na ichihiyo.

⁷ Mndu o wusumhanyi nekeambuya kilya mkiwa aiwesa; Indi mndu mbicho ikyo kimbodie kita-pfo

⁸ Wandu wekepiṟa, wekekoṟa mṟi; Indi wenyi wuṟango wekeduo nyashi kuleshi

⁹ Mndu mṟango kahaluyana na tondo; Kasuo ang'u kaseka, kuwode-ho sia-pfo.

¹⁰ Wepusuo samu wasuo mndu o wusumhanyi, Indi wahendeli wekeringa moo foke.

¹¹ Tondo lyekeloṟa nyashi yalyo yose; Indi mndu mṟango nekeiima na ipfudia.

¹² Mochilya kaadanya wongo; Nahong'u wanjama wake wose wechiwa wawicho.

¹³ Mkiwa na mowuta kinyala, wekooyana handu hamu; Mndumii nekelimika meso hawo wose wawawi.

¹⁴ Mangi ekeanduya mkiwa kya wusumhanyi, Loṟika loke lochiwanga mlungana.

¹⁵ Olio lotutuma lokewika wuṟango; Indi mana mneneke nechisutsa mae.

¹⁶ Wawicho wakaengeṟeka, mawicho hecheengeṟeka; Indi wenyi wusumhanyi wechiambuya iomboka lyawo.

¹⁷ Ikimba mana opfo nao nechikusiṟa moo; Ee, nechichihiṟa mrima fopfo.

¹⁸ Kulawode shiwonesyo, wandu wekeda ikuotoya; Indi nyi ai nanga ulya mowada mawawaso.

¹⁹ Kishikye isinga liwawaso ko madedo-pfo; Kipfa ma likamanya lyeidikya-pfo.

²⁰ Kulemewona mndu morundukya madedo? Nanga ikusirya tondo kota o.

²¹ Mowada isinga kuwokia lii itutu, Ifurumia lyechiwa mana oke.

²² Mndu o nyashi nyekehaaya ngapano; Na mndu o nduika nyekenyamaṟa mnu.

²³ Orikiki lo mndu lochimsotsa Indi ulya awode mrima fokunyiiṟa nechiindyo.

²⁴ Mosanza na miiwi nasuo moo foke amonyi Nekeicho kiṟaache, ma awode idedo-pfo.

²⁵ Iowuo wandu liendie mdeho; Indi mokusirya Mndumii nyi echikaa kipuo.

²⁶ Wandu wafoi waishiha ikundika ko wanene; Indi mwanduye fo oriyo mndu fuwukie ko Mndumii

²⁷ Mndu o ngafu nyi asuiṟye wenyi wusumhanyi; Na iwa msalari nyi kisuiṟye wewuta mawicho.