MFANANO 28 - Bibilia Kui Mdedie fo Kimochi

¹ Wawicho wekedicha walaosho nyi wandu; Wenyi wusumhanyi nyi wai wakari cha miso.

² Kipfa kya wunyamaṟi wo oruka wanene wekewa wafoi, Indi ko wandu wawode wuṟango oruka lokekaa lui olele.

³ Mndu ahuṟi kawonyia mkiwa, Kimu na mvuo ya owira ilaketsuhaṟa kindo.

⁴ Iwo walehiye wuwawaso wekeṟumisha wawicho, Indi iwo wawuwode wekelimbana na wawicho.

⁵ Wandu wawicho waichi mwaanduye - pfo, Indi walya weshiha Mndumii waichi shose.

⁶ Nanga mkiwa ekehenda kiidi kya wulohi, Kota odetsonyi ma kokoya nyi msuṟi.

⁷ Ichu mowada wuwawaso nyi mana sa mṟango Indi mbuya ya wetandaluo ndeu nyi isutsa wandeawo

⁸ Ichu moengeṟia masaa hake mbucha na nawode nanga, Nekesanyia mndu ulya ekesaṟya wakiwa.

⁹ Ichu moindutsa kudu koke nalaadanyie wuwawaso, Ma kiterewo koke nyi kindo kiwicho,

¹⁰ orio mndu modetsa wandu kiidi kya njia njiwicho iwo wecha Nechioloka mdehonyi foke amonyi; Indi wahoṟotsu wechioṟa mecha.

¹¹ Msuṟi nawode wuṟango mesonyi hake amonyi, Indi mkiwa awode wulaanyi nekeṟisa mnu.

¹² Wenyi wulohi wakawinza, kuwode kiṟumi king'anyi; Indi wawicho wakakure, wandu wekeowa.

¹³ Moṟika wunyamaṟi woke echitaramo-pfo; Indi motsitocha na ida nechiwona osaṟio.

¹⁴ Mndu o wandu awode wusumhanyi nai nanga mkonu yose; Indi akuiwitiye mrima nechioloka ngataṟenyi

¹⁵ Cha miso fuipoṟohoṟa na ngaṟe iwodo nyi njaa; Nyi wudo mndu mbicho ai ilyi aiitoṟya mkiwa.

¹⁶ Mnene alawode wuṟango, nekewonyia wandu mnu; Indi ulya asuye ilanga nechiengeṟa mkonu yake.

¹⁷ Amlemiye samu ya wandu Nechidichia rina, kulawade momiima.

¹⁸ Mochumia na wuhoṟotsu nechikiṟo; Indi mlang'a o ohendo loke nechioloka faṟa.

¹⁹ Modema mdemi foke nechiichuṟo shelya pacha; Indi mwosha mbonyi tsa ngafu nechiwona wukiwa wumshikie

²⁰ Mndu msumhanyi nechiwada mboṟa pacha; Indi motambahana iwa msuṟi owinyi nyi echikapo.

²¹ Ikundya wandu chi kichapfo; Ma mndu itewo nyi kipeṟengu kya mkate kadeko

²² Mndu mnyenyi nekekambiṟa iwa msuṟi; Ma ekekusaṟa mkonu iicha nalange kindo-pfo.

²³ Modedia manomae womlosha nechiwona osu; Kota mndu mokukundishya kui olimi loke.

²⁴ Moiwa masaa ha ndee ang'u mae na ihamba chi deko-pfo; Mana-cho nyi mbuya ya wanyamaṟi.

²⁵ Menyi mrima folanga nyekehaaya wuṟiingi; Indi mokusirya Mndumii nechileleka.

²⁶ Mokusirya mrima foke nyi isembo; Indi ulya mohenda na wulaanyi nechikiṟo

²⁷ Mohawia wakiwa ahuṟi kindo-pfo; Indi moṟika meso hake nechiambia oseso lufoi.

²⁸ Walai na wusumhanyi wakakure, wandu wekeowa; Indi ilyimandi wasaramaya, wasumhanyi wekeengeṟeka.