MFANANO 27 - Bibilia Kui Mdedie fo Kimochi

¹ Ulakushele kipfa kya ngama; Kipfa kulaichi kechifeo na mkonu fumu.

² Leka ungi nakuṟumishe manya chi iyo kumonyi-pfo; mndu mhenu manya chi dumbu lyafo iyo-pfo.

³ Iho nyi lyekelemya, na mlelya fokelemia; Indi nyashi ya tondo injilemeri kota ishi shiwi shose.

⁴ Nyashi nyi njiwicho, na nduika nyi mfu; Indi nyiu echiidima ihoṟoka oshangunyi lo wunyenyi.

⁵ Itetekio lya lohi nyi nanga; Kota ikunda likuṟikye.

⁶ Shifaṟe umbike nyi mbuya nyi mkundana Indi ihekya momu lya mkituwa nyi lifoi mnu.

⁷ Mrima fuihutsu fokepeleko nyi iwuwu lya wuki; Indi mrima fuwodo nyi njaa fuwonyi oriyo kindo kewawa nyi kiloda.

⁸ Cha ndehe yehenda ipfo na ipfo kuleshe na mruma foke; Nyi wudo mndu mohenda ipfo na ipfo kuleshe na handu hake

⁹ Mafuda hepfaama hekechihiṟa mrima; Nyi wudo madedo mecha ha mbuya ya mrima hekewuka koke.

¹⁰ Kulade mbuya yapfo kumonyi, ma mbuya ya ndeo, Ma kulahende kanyi ko manomayo mkonu ui mpfiie. Nanga wamṟasa ai hafui kota manomayo ai haleshi.

¹¹ Manoko wada wuṟango uchihiṟe mrima foko; Kundu njiidime ihaluo ulya monjiwonyia.

¹² Mndu mlaanyi nekewona mawicho kaowa; Indi masembo hekehenda mbele hakahoyo nyi ndenga

¹³ Duo nguwo ya mokaṟa mhenu Winza woduo kindo kiikiwike wuhuru wo mkaṟa o mmeluki.

¹⁴ Mndu mowikia mboṟa manomaye na otuko kui ṟu ling'anyi, Kechisendo nyi oseso koke.

¹⁵ Matacha ha kitsitsi kiheri kya mvuo ing'anyi. Na mndu mka mlang'a nyi kimu;

¹⁶ Icho akundi imiima kimu na iima otanu. Na owoko loke lo kulyo lokooya mafuda

¹⁷ Menya yekenuo menya Nyi wudo mndu ekenuo kyamu kya mbuya yake.

¹⁸ Moringa mkuyu nechilya ndunda tsafo; Na ichu mopfuṟukanya mndumii oke nechimwiindiya.

¹⁹ Chandu kyamu kifananyi mṟingenyi Na wudo na mrima fo manomayo.

²⁰ Ko waṟumu na inyamaṟika shekeihuda-pfo; Manya meso ha wandu haihudapfo.

²¹ Isinga nyi lya fesa, na okaa lo modo ko sahapu; Mndu nekehesho kui kiṟumi kyake.

²² Ma kohuo tondo kyuuṟinyi na ngongo, hamu na Ngano wutondo woke wochikaa wumsiepfo

²³ Tambahana imanya mbonyi tsa po lyapfo; Na iambuya mnu mmbe tsapfo.

²⁴ Kipfa masaa hechiwa ha mlunganapfo; Na oṟo ya kiṟumi yakekaa marika na marika?

²⁵ Natsi yekedao na maṟa mawishi hakawoneka, Na mboha tsa mtsudu tsikasanyio.

²⁶ Machoondi hawaṟi kya mṟaaye;

²⁷ Kochiwoneka ho maruwa ha mburu, Hakushikye ko kelya kyapfo, Na kelya kya wandu wa kanyi kopfo, Na kilayo kya shisinga shapfo.