MFANANO 26 - Bibilia Kui Mdedie fo Kimochi

¹ Cha mbeo ya mtsudu kiheri kya kwari, na mvuo kiheri kya shilimu Na wudo kiṟumi kiwaṟi tondo-pfo.

² Cha mbuna yekeṟahaṟa, Na shinapuru chandu shekerunduka; Nyi wudo na oseso lulawode kitewe lokooya mndu-pfo.

³ Ngowa tsekapa ko frasi, na menya ya dumbu ko nzoi, Na iliyo mhongo fo tondo.

⁴ Kulahaluo tondo sumhana na wutondo woke, Kulafanane nao.

⁵ Haluo tondo sumuhana na wutondo woke, Nalakuwone nawode wuṟango o amonyi

⁶ Modika ndumi owokonyi lo tondo Nakumanya kudende na ilya wukiwa

⁷ Madende ha ulya airiteka hekewuṟa pfinya; Na wudo mfanano dumbunyi lya tondo

⁸ Cha mkunja fo shindo sha wuhuru kiidi kya nungu ya maho; Na wudo ulya moindiya tondo.

⁹ Chandu msha fokekapa mndu mnanzi kuwoko; Na wudo mfanano dumbunyi lya tondo.

¹⁰ Mwaaria mcha nekeṟunda shindo shose Indi ulya moinenga tondo iṟunda nyi cha ili oinenga weida.

¹¹ Chandu kite kekewuuya odaiko lokyo, Na wudo tondo lyekewuta-se wutondo

¹² Ngesa uwonyi mndu mṟango mesonyi hake amonyi? Nanga ikusirya tondo kota o.

¹³ Mndu mdoko nekehamba, “Miso fui kiidi kya njia ing'anyi.”

¹⁴ Chandu mongo fokeṟunguka kiidi kya cherinyee; Na wudo mndu mdoko ipfo kitaṟenyi kyake.

¹⁵ Mndu mdoko nechiwika kuwoko koke itelenyi Kikamlemya ikiduo dumbunyi.

¹⁶ Mndu mdoko namṟango mesonyi hake, Kota wandu mfungade wechiidima ihamba kindo.

¹⁷ Mndu moida kakulisa wukiwa na ngapano ilai yake; Nyi cha mndu awada kite madu hakyo.

¹⁸ Cha mndu awodo nyi waṟumu ekekumba shimui, Na mfi, na opfu;

¹⁹ Nyi wudo ai molemba manomaye Na ihamba, chi njiletema mṟembu tupu,

²⁰ Modo fokeruma futuṟa ngu; Kulawode mohaaya kuwode wuṟiingi-pfo

²¹ Cha okaa huya okaa luiaka, Na ngu huya modo; Nyi wudo mndu mosohuo mondu na wukituwa

²² Madedo ha mohaaya hai cha kando. Hekesoka mṟasa ndeunyi.

²³ Dumbu lyekuloṟa-loṟa hamu na mrima mbicho Nyi kii cha kyoho kikifihisye mbosha tsa fesa.

²⁴ Asuo nekeṟika isuo na dumbu lyake; Nekewika kisa kya mtambo mrimenyi foke

²⁵ Kadeda madedo mecha kulamiidikye; Kipfa nawode isuo ka mfungade mrimenyi foke.

²⁶ Ma chando isuo lilishikye nyi mtambo, Wuwicho woke wochimanyika oshangunyi lo kisanzio

²⁷ Mosuma rina nyi echiolokiapfo amonyi; Na mopiṟimitsa iho lyechimbuuya.

²⁸ Olimi lokededa wongo lokesuṟa walya wawawike shifaṟe; Na dumbu lyekukundishya lyewuta manyamaṟo