MFANANO 25 - Bibilia Kui Mdedie fo Kimochi

Mfanano ya Solomoni ya wueṟa

¹ Ii nyi yo mfanano ya Solomonyi, iya wandu wa Hesekia, mangi ya Yuda, waletsitisiṟa.

² Nyi kiṟumi kya Ruwa iṟika kindo; Indi nyi kiṟumi kya mangi isoṟa kindo.

³ Ruwehu ihendiye huye mnu na oruka luhendiye wanda mnu, Indi mrima ya wamangi yechiwa isonjokoṟapfo.

⁴ Wuta mbosha kiidi kya fesa, Nahong'u ochiwona kihiya ko ulya moela;

⁵ Iraho ichu alai o wusumhanyi oshangunyi lo mangi Na loṟika lo wuitoṟi lochiwanzo nyi wukiilohi

⁶ Ulakudose oshangunyi lo mangi; Manya kulahoṟoke kiidi kya wanene;

⁷ Kipfa nyi kicha iwio, njo kunu kusonguo Kota iwiko nduma oshangunyi lo mnene. Halya kulehawona na meso,

⁸ Kulahende nja owinyi uhakapanyie; Ulache ilemo shilya shewuta ilyi numa, Manomayo ilyi echikusutsa.

⁹ Limbana na manomayo nyo muwawi tupu, Indi kulahambe kiṟike kya mndu ungi;

¹⁰ Ichu moicho nalakurume; Na sonu tsapfo tsilechisia.

¹¹ Idedo lyededo kiheri kiwaṟi. Lifananyi na machunga kiidi kya mkunja fo fesa.

¹² Ikuchopa lya sahapu kudunyi, na iṟaa sahapu yekuchopa njicha; Nyi wudo ulya amsumbo imanya shiṟike amṟango awode kudu koicho.

¹³ Cha mbeo ing'anyi mnu kiheri kya shilimu Nyi wudo ai ulya mdume ai mhendeli ko wamdumye; Kipfa nyi achihiṟye mrima ya wasoṟo walya.

¹⁴ Cha mapuchi na otanu kulawode mvuo. Nyi wudo ai mokushela na shisumbo kui wongo.

¹⁵ Kui ikutirisia ling'anyi mnene nyi echiidikisha. Na olimi lumamiri lochifunja fuo.

¹⁶ Kulewona wuki? Lya wulya wukushikye; Kulaihude numa nodaike.

¹⁷ Kudende kopfo kulahende mnu ko wamṟasa opfo shila na ikuotoya Nasuṟe macha na ikusuo.

¹⁸ Mndu mohamba sha wongo Nyi kiria, na oshu, na mfi mwohi.

¹⁹ Ikusirya mndu alai mhendeli kiheri kya kiwi Nyi cha iheho lifunjikie ang'u kudende kuridiye.

²⁰ Moimbia mndu msokie nyifowa shiimbo, Nyi cha mowuta nguo kiheri kya mbeo; cha mṟinga futarang'aa kiidi kya mbala

²¹ Mkituwa opfo kawado n njaa mneenge shelya; Ka angaa mrutse mṟinga;

²² Kipfa nochiwika okaa huya mdo foke fuakieho; Na Mndumii nechikuinenga kisumbo

²³ Otanu lo nuka lokeende mvuo; Kimu na mohaaya nekeende kyamu kya nyashi.

²⁴ Nyi nanga ikaa ndumbenyi ya kai; kota ikaa mbenyi ing'anyi hamu na mndu mka ekefahiya.

²⁵ Cha mṟinga mcha fuichelela ko mndu mangari, Nyi wudo kii ko ndumi njicha icheiye oruka lo kuleshi.

²⁶ Mndu o wusumhanyi kacheya mndu, mndu mbicho Nyi cha soka ifuṟungukie, Na iruwa li lichumechume.

²⁷ Kiwaṟi ilya mnu wuki-pfo Nawudo, mndu ishiha kiṟumi kyake chi kiṟumipfo.

²⁸ Mndu elechiidima ichilya mrima foke. Nyi afananyi na mṟi fuwundukye fulawode omombo.