MFANANO 24 - Bibilia Kui Mdedie fo Kimochi

¹ Kulalange wandu wawicho, Ma kulalange ikaa nawo kimu;

² Kipfa mahio hawo haikusaṟa mawicho, Na madumbu hawo haideda inyamaṟa.

³ Mba yekewiko na wuṟango, Na kui wulaanyi ikahoṟoka,

⁴ Na kui imanya shiṟiha shake shikaichuṟo Shindo shose sha wuhuru na shechihiṟa.

⁵ Mndu awode wuṟango nyi awode pfinya; Ee mndu o wulaanyi nekeengeṟa wuidimi;

⁶ Kipfa kui makusaṟo ha wuṟango nochiira shida, Na kui ifo lya wechila, kocha okiṟo.

⁷ Ko tondo kuwode wuṟangopfo, Ekeiria ṟu lyake kichuminyipfo.

⁸ Mndu mohiya iwuta mawicho, Wandu wemlaha ikahakaha;

⁹ Makusaṟo ha tondo nyi wunyamaṟi, Na ulya eketaluo nekesuiṟa wandu.

¹⁰ Kouma mkonu ya wukiwa, Pfinya tsapfo tsi njyangu.

¹¹ Kiṟa iwo wadao ihenda iwooho Na iwo waiwateseheṟe ishinjo nowakiṟe

¹² Kochihamba, so luweichi isho pfo, Ngesa icho mohesha mrima chio aichi? Na icho moringa mrima fopfo chio aweichi? Ngesa echitaa mndu king'ang'anyi na iṟunda lyake?

¹³ Manoko lya wuki, kipfa wui wucha, Na iwuwu lya wuki lilya liloda ili olisonja.

¹⁴ Kyasia nochimanya wuṟango ke wokeloda kui mrima fopfo; Kokoya omewuwona; nkyong'u wueri wochiosha; Manya kikusiryo kyapfo kechiilachikapfo.

¹⁵ Iyo mndu mbicho, kulalaaye ohendo lo ulya asumhanyi; Ma kulanyamaṟe handu hake hesia moo;

¹⁶ Kipfa mndu o wusumhanyi nechiomboka kamfungade kakurese Indi walai na wusumhanyi wekeimo nyi mawicho.

¹⁷ Kulachihiyo mkituwa opfo kaomboka; Ma mrima fopfo fulakese ilyi akapa tulia;

¹⁸ Mndumii nalache iliwona, nasuo; Naindutsie kuleshe nyashi yake

¹⁹ Kulasuo kipfa wewuta mawicho; Ma kulalange mawicho;

²⁰ Kipfa mndu mbicho alechiambia wueri; Taa ya mndu mbicho yechiruma.

²¹ Manoko, india Mndumii na Mangi; Ma kulakae na mndu ekeembeṟuka

²² Kipfa opfu lowo lochiwachea faṟa A nyiu aichi maaka yawo chando injinyamaṟe.

Madedo ha ngoseṟa

²³ Iha naho da nyi madedo ha wenyi wuṟango. Ikundia wandu kiidi kya mwanduye kui kuchapfo.

²⁴ Mowia mndu mbicho, iyo nyi owinga; Njoshari tsa wandu wechimsesa, isanga lyechimsuo.

²⁵ Kyaindi ko iwo wekededya sia yechikaa kowo; Na ona lochiwakaya.

²⁶ Mokomba momu mohaluo kya wulohi.

²⁷ Sungusia iṟunda lyapfo ipfo nja, Marisa iṟunda lyapfo demenyi, Komarisa, wika mba yapfo.

²⁸ Kulaṟingishie wamṟasa opfo kulawode kitewe, Ma kulalembe na dumbu lyapfo.

²⁹ Kulahambe Njechimbutia chando alenjiwutia inyi; Njechitaa mndu cho king'ang'anyi na iṟunda lyake.

³⁰ Njileida kufui na dema lya mdoko, Na dema lya msabibu lya mndu alawode wuṟango.

³¹ Ate, lyose lidoe msha; Teri yose injishikie nyi ohonjo; Omombo loke lo maho luwundukie.

³² Nlyondi njileambuya ngawekusaṟa mnu; Njilewona, ngawutaho kiloshio.

³³ Kutsihee ilaa kitutu, ihombia kitutu, Kutsihee ilema mawoko nolae mado!

³⁴ Koikyo wukiwa wopfo wochikuchea cha msoki, Na ituṟa lyapfo cha mndu awode shisha.