MFANANO 23 - Bibilia Kui Mdedie fo Kimochi

¹ Ili ochidamya ilya hamu na wanene wa mkambo-le, Ambuya mnu ulya ai kusonguo kopfo.

² Wika oshu o oṟoo kopfo, Kokoya nyi ui motandaluo ndeu.

³ Kulalange shelya shake sha wusuṟi; Kipfa nyi shelya sha mtambo.

⁴ Ulakuwinyishe kundu nowe msuṟi; Kulakusirye wuṟango wopfo kumonyi.

⁵ Ngesa nochituluya meso shilya shilai kindo? Kipfa kui kii lohi masaa hechiwada makungo, Cha owishi luirunduka nginehu.

⁶ Kulalye mkate fo mndu mnyenyi; Ma kulalange shelya shake sha wusuṟi

⁷ Kipfa chando awonyi ipfo mrimenyi foke nyi wudo ai. Nekuwia, ee, lya, nyo; Indi mrima foke fui hamu na iyo pfo.

⁸ Itonge lilya kulelimeṟa nochilidaika, Na madedo hapfo mecha hechikudekya.

⁹ Kuladede madunyi ha tondo; Kipfa nechimina wuṟango wo madedo hapfo.

¹⁰ Kulapaaye kichano kya mṟasa fo kacha; Ma kulaide kiidi kya dema lya ngoeda;

¹¹ Kipfa mkiṟa owo nawode pfinya; Nechiwakapanya huyapfo.

¹² Ṟungamisha mrima fopfo iadanyia kiloshyo; Deha kudu kopfo iadanyia madedo ha wuṟango.

¹³ Kulaime mana opfo ngapo; Kipfa komkapa na olio echipfapfo

¹⁴ Nochimkapa na olio, Na ikiṟa moo foke na ko Waṟumu.

¹⁵ Manoko, kokoya mrima fopfo fuwode wuṟango, Mrima foko fochichihiyo, ee da! Mrima foko;

¹⁶ Ee, mbihu foko fochichihio na walya walunganyi na inyi Ili dumbu lyapfo lyededa madedo mecha.

¹⁷ Mrima fopfo fulalange wanyamaṟi; Indi india Mndumii mfiri puti;

¹⁸ Kipfa kuwode ho wueri lang'u; Na kikusiryo kyapfo kechiilachikapfo.

¹⁹ Adanyia manoko uwade wuṟango Na iduo mrima fopfo kiidi kya ohendo lucha.

²⁰ Ulawe kiidi kya walya wenyo mvinyo; Kiidi kya walya welya nyama wohukya

²¹ Kipfa mnanzi na motandaluo ndeu wechiwa wakiwa Na ikuneneka lyeṟika mndu masaṟa

²² Adanyia ndeo ai mokufee, Ma kulamine mayo ili mandi akuo.

²³ Huṟa lohi, ma kulaikumbe; Ee da! Wuṟango na kiloshyo na wulaanyi.

²⁴ Ndee o Mndu asumhanyi nyechichihio; mofee mana awode wuṟango nechimkunda.

²⁵ Wachihiyo ndeo na mayo; Nachihiyo mokufee.

²⁶ Manoko, njinenga mrima fopfo; Meso hapfo hachihiṟo nyi njia tsako.

²⁷ Kipfa mmeluki nyi rina lileshe; Na momeluka nyi hamba cha osanja lusise.

²⁸ Ee, nekelaaya cha msoki, Nekeengeṟa wenyi mtambo kiidi kya wandu.

²⁹ Nyiu aikapa kilio? Nyiu aifihiṟa ochia? Nyiu airia ngapano? Nyiu akeri iitsuka? Nyiu awode shifaṟe shilai na mti? Nyiu awode meso hafanyi kimaande?

³⁰ Nyi walya wekekaa handu hai mvinyo, Wekehenda ishiha mvinyo mlongelonge.

³¹ Kulaambuye mvinyo chando fufanyi kimaande; Fukowika kirahu fana yafo, fukasoka kyomboho;

³² Ifurumia foimada cha njoka; Fotocha cha njoka membe

³³ Meso hapfo hechiwona mbonyi njihenu; Mrima fopfo fochiwuta halai na osaaṟe.

³⁴ Ee da! Nofanana na mndu alee kiidi kya ipalyipalyi Ang'u mndu aihombia alee huya ngo.

³⁵ Nochihamba, walenjikapa manya ndawawio; Walawenjikapa manya ndaicho kindo; Njechikure indii, njiengeṟe ifushiha.