MFANANO 22 - Bibilia Kui Mdedie fo Kimochi

¹ Nanga isambuṟa rina licha kota masaa hafoi; Na osaṟio kota fesa na sahabu.

² Msuṟi na mkiwa wekekooyana kimu; Mndumii nyio alewaumba wose wawawi.

³ Ulya asumhanyi nekewona mawicho kaowa; Indi matondo wekehenda mbele wakaluo

⁴ Wueri wo wekunyiiṟa wui nyi iindia Mndumii Nyi wusuṟi, na kiṟumi, nawo nyi moo.

⁵ Msha na mdeho shii njienyi ya mkari; Ichu moringa moo foke nai haleshe nasho.

⁶ Toṟisha mana kiidi kya kilya ki mbaṟi, Nao echikihadimapfo manya kakuo

⁷ Msuṟi nechiikolonyia mkiwa, Na ichu moakuo nyi isinga lya ichu moakuya;

⁸ Mowaaya mawicho nechisambuo opfu, Na ndichi yake yehoṟwo yechitsitsa.

⁹ Awode riso lyeambia wandu lyechiwikyo ona, Kipfa nekeinenga wakiwa kelya kyake.

¹⁰ Kumba kulya nja ulya mopiṟa na mondu fochisama; Ee da! Wuṟiingi na isuka shechitsitsa.

¹¹ Ulya akundi wuilyi wo mrima, na isaṟia lya dumbu; Mangi nyechiwa mbuya yake.

¹² Meso ha Mndumii hekeringa ulya awode wuṟango; Indi hekefihisuo madedo ha mndu mbicho.

¹³ Mndu mdoko nekehamba, mwiso fui ipfo nja; Njechiwoohyo njienyi ing'anyi.

¹⁴ Dumbu lya mmeluki nyi rina lileshe; Ulya asuikie ko Mndumii nechiolokia-pfo.

¹⁵ Wutondo wui wupfunge kiidi kya mrima fo mkoku; Indi ilio lyelosha lyechiwufunyia haleshe.

¹⁶ Icho ekewonyia wakiwa kundu naengeṟe masaa hake, Na ichu moinengya msuṟi, nechilya wukiwa.

Madedo 30 ha wenyi wuṟango

¹⁷ Deha kudu noadanyie madedo ha wenyi wuṟango, na iolongya mrima fopfo kiidi kya wulaanyi woko;

¹⁸ kipfa kii kicha uharinge kiidi kyapfo, hechiwanga kiidi kya dumbu lyapfo.

¹⁹ Kundu kikusiryo kyapfo ukiwike ko Mndumii, inu ngakumanyishia iyo ishi, ee da! Iyo.

²⁰ Ngesa njilekuṟehya mbonyi njinene tsirianyi na chila na wuṟango;

²¹ kundu njikuwie na pata kya madedo ha lohi, uwihiṟye walya wakudumiye madedo ha lohi?

²² Kulasoke mkiwa, kipfa nyi ai mkiwa; Manya kuladuo kya mbari kya mndu mfafa kichuminyi;

²³ Kipfa Mndumii nechiwakapanyia; Nechiduo wapfungo walya walewaduo wapfungo.

²⁴ Ulawade wumbuya na mndu awode nyashi ya kitusu; Ma kulachumie na mndu aduikie;

²⁵ Kulakooye amekulosha ohendo loke; Na ikudeha kumonyi.

²⁶ Ulawe umu o walya wewadana ang'asa; Ang'u wai wakaṟa wa sile tsa wandu;

²⁷ Kokooya kulawode ketaa; Kitewe naduo kitaṟa kyapfo ilyi uleeho nki?

²⁸ Ambuya necha kulapaaye kichano kya mṟasa fo kacha, Kiikiwike nyi waku wapfo.

²⁹ Ngesa omewona mndu mpfuṟukanyi kiidi kya iṟunda lyake? Icho nechihoṟoka oshangunyi lo wamangi; Echihoṟoka kiidi kya wandu walaichiopfo.