MFANANO 21 - Bibilia Kui Mdedie fo Kimochi

¹ Mrima fo mangi fukeri owokonyi lo Mndumii; cha mfongo ya mṟinga fokehaluo kose ukundi.

² Orio njia ya mndu ii njicha mesonyi hake amonyi Indi Mndumii nekehesha ngoo.

³ Iwuta sumhana na iwawaso Shichihiṟiye Mndumii kota shiano

⁴ Meso ha orikiki, na mrima fokudosa, Manya idema lya wawicho, nyi wunyamaṟi

⁵ Makusaṟo ha walya weketambahana wechishikya wusuṟi tupu Kyaindi ulya ekeorana nechifurumia iwuṟa.

⁶ Iwada kisa kya masaa kui olimi lo wongo Nyi mtsu fukeri iwiwito, nyi ishiha opfu.

⁷ Wutandawushi lo wawicho lochiwaduo kuleshi, Kipfa walehie iwuta kilya kisumhanyi.

⁸ Njia ya ulya amrohie wunyamaṟi idekekie mnu. Indi mndu amhendeli, iṟunda lyake nyi lihoṟoki.

⁹ Nanga ikaa mbarinyi ya kai; Kota mba imu ing'anyi na mndu mka ekeloyana.

¹⁰ Moo fo mndu mbicho fulangie mawicho; Wamṟasa oke ekewona isaṟia mesonyi hake-pfo.

¹¹ Walya wetaluo wakakapo, matondo hekeṟanguo, Na ulya mṟango kalosho, nekeambia kiloshyo.

¹² Mndu o wusumhanyi nyekekusaṟa mba ya mndu mbicho Chando wawicho wekeolotso wakarumara.

¹³ Mopfinyika madu hake nalaadanyie kilio kya mkiwa, O nyi echifihiṟa, kuwode momicho pfo.

¹⁴ Kisumbo kya kiṟika kekehooṟa nyashi, Na itsutsuma kitsinyi lyehooṟa ngapo ing'anyi.

¹⁵ Nyi sia ko wewuta mecha iṟundia mwanduye; Indi nyi inyamaṟika ko walya wewuta mawicho.

¹⁶ Mndu kawuṟa ohendo lo walaanyi Nyi echikaa chilenyi ya walya wapfiie.

¹⁷ Mndu akundi useṟeṟi nyi echiwa mkiwa, Ulya akundi mvinyo na mafuda echiwa msuṟi-pfo

¹⁸ Mndu alai o sumhana nyi aichuṟia wenyi sumhana Na ulya mowuta mtambo nyi ai handu ha wasumhanyi

¹⁹ Nanga ikaa kundu ko nuka Kota mndu mka o shiloyo na itukura mondu.

²⁰ Kuwode kisa kya wuhuru na mafuda kanyi ko mndu o wusumhanyi Indi mndu tondo nekehameṟa.

²¹ Moosha wulohi na isaṟia, Nechiwona moo na lohi na kiṟumi.

²² Mndu mṟango nekedooya mṟi fo walya waapfinya; Na iombotsa pfinya tsa mkusirye fowo.

²³ Mndu moringa dumbu lyake na olimi loke, Nechikuringa moo foke na wukiwa.

²⁴ Mndu awode orikiki na ikushela, rina lyake nyi mminyi, Nekewuta shindo kiidi kya ikushela lya orikiki loke.

²⁵ Mbonyi tsilya mndu mdoko akundi tsembaha, Kipfa mawoko hake halehye iṟunda.

²⁶ Kuwode msa alangye kui wuumu mfiri puti; Indi mndu mhoṟotsu nekelekia ma ekeimapfo.

²⁷ Kyaano kya walai wecha nyi kiwichuṟiye Kii kiwicho-wicho ili mandi alasumhanyi aende.

²⁸ Mṟingishi o wongo nechideka; Indi mndu ekeicho nechideda madedo hechikaa.

²⁹ Alai na wusumhanyi neumiṟa kyamu kyake Indi mndu mhoṟotsu nekekusaṟa kya njia tsake

³⁰ Kuwode wuṟango ma imanya-pfo, Ma makusaṟo kya Mndumii.

³¹ Frasi tsekeṟeheṟo kipfa kya shida, Indi Mndumii nyio ekeende okiṟo.