MFANANO 20 - Bibilia Kui Mdedie fo Kimochi

¹ Mvinyo fukeri motaluo, mṟinga fonanza fukeri mofahya; orio mowuka-pfo echitengeluka akeri-se mṟangopfo.

² Iowesha lya mangi nyi cha ipoṟohoṟa lya mwiso; momsuiṟa nawutia mrima foke wunyamaṟi.

³ Mndu idicha kifahyo nyi kiṟumi kyake; Indi orio tondo likundi mondu.

⁴ Mndu mdoko akundi idema kiheri kya mbeo pfo; Koikyo kiheri kya shilimu nechieṟeṟa awode kindopfo.

⁵ Chila ya mrimenyi ikeri cha oṟoo lo nduwa; Indi orio mndu aichi nechidahya-ho mṟinga.

⁶ Wandu wekehamba orio mndu wuidimi woke amonyi, Indi mndu mhendeli, nyiu echiidima imbona?

⁷ Msa asumhanyi kachumia kiidi kya wuhoṟotsu woke-le, Wana wake wechiwikyo ona iya mafurumienyi hawo.

⁸ Mangi adamye kidinyi kya wuitoṟi, Nekeela mawicho hose na meso.

⁹ Nyiu echiidima ihamba, “Njisanjie mrima foko; Njii mwele na wunyamaṟi woko?”

¹⁰ Shiheo kyanya - kyanya, na mboṟiko kyanya - kyanya Shose shi-shiwi nyi wuwicho ko Mndumii.

¹¹ Wana wekekuhamba kui mawuto hawo; Ke iṟunda lyake lii licha, ke nyi wusumhanyi wyoo.

¹² Kudu kokeadanyia, na riso lyewona, Mndumii nyio alewika shose shishiwi.

¹³ Ulakunde mado ulachewa mkiwa; Tukuo na meso hapfo na iyo noihude kando.

¹⁴ Kewa-pfo kewa-pfo, nyi wudo mohuṟa ekehamba, Indi kamewukaho kakuṟumisha.

¹⁵ Sahapu iipfo, na shindo sha wuhuru da! Indi dumbu lya wulaanyi nyi kindo kya wuhuru ngoseṟa

¹⁶ Duo nguwo ya mkaṟa o mhenu; Msoke kilya kilewiko koke ichu ai mkaṟa o mhenu.

¹⁷ Kando ka wongo kikeloda ko mndu; Numa mṟinga foke fuichuo msanga.

¹⁸ Orio idedo lyechihoṟoka ili mandi mohaluyana; Na kui ihaluyana na wuṟango kuamtsa shida.

¹⁹ Mndu o mboru katsihamba nededa shiṟike; Ko-ikyo ulakae nao ichu echideda mbonyi tsake mnu.

²⁰ Mosesa ndee ang'u mae, Sa yake yechiruma kiidi kya mema riti.

²¹ Kyooṟa kilewoneka mawookyonyi owinyi, Iya mafurumiyonyi hake kochiwoneka ona-pfo.

²² Kulahambe inyi njechitaa mawicho; Weda Mndumii nao nechikukiṟa.

²³ Shiheo kyanya - kyanya nyi wuwicho ko Mndumii; Na kiheshyo kya mtambo ki kicha-pfo.

²⁴ Ohendo lo mndu luwukie ko Mndumii; Wulalu nyi uda mndu echiidima imanya njia yake?

²⁵ Nyi mdeho, mndu nahambe wodima-dima, kindo-ki kikiele, Kamewika-ho kyaasa nawese-wese mbonyi.

²⁶ Mangi njiṟango yekeela walai na wusumhanyi; Nekepiṟintsa iho lyesea huyawo.

²⁷ Mṟufu fo mndu o wandu nyi sa ya Mndumii; Yekeṟisa shose shi kidi kyake.

²⁸ Osaṟio na wuhendeli shekeringa mangi, Loṟika loke lo wuchili lowanzo kui wuhendeli.

²⁹ Kiṟumi kya wanake nyi pfinya tsawo; Wucha wo wameku nyi mndo iwode mhasa.

³⁰ Ngoru tsa ngapo tsekesanja deko, Na ngapo tsekehenda itane tsakoya moo fo mndu.