MFANANO 2 - Bibilia Kui Mdedie fo Kimochi

Wueri wo wulaanyi

¹ Manoko, kokoya oidikya madedo hako, Na iwika kisa mawawaso hako;

² Kodeha kudu kopfo iicho wuṟango Koweṟeheṟa mrima fopfo kosumbo imanya;

³ Kiidima kolaha wulaanyi, Na iirya ṟu lyapfo nosumbo imanya

⁴ Koshiha cha fesa Na ishiha cha kisa kii kiṟike

⁵ Nlyondi ochimanya iindya Mndumii Na imanya Ruwa

⁶ Kipfa Mndumii nekeinenga wandu wuṟango; Dumbunyi lyake kuwode wulaanyi na imanya shose,

⁷ Nekewika kisa kya wuṟango walya wahoṟotsu mrimenyi Nyi ngawo ya walya wahendelyi kui mrima;

⁸ Kundu naringe njohendo tsa mwanduye, Naweringa njia tsa waele wake.

⁹ Nlyondi ochimanya wukilohi na mwanduye, Na wucha na orio njia njicha yose.

¹⁰ Kipfa wuṟango wochiida na ngoonyi yapfo, na wulaanyi wochichihiṟa mrima fopfo;

¹¹ Osaaṟe lopfo lochikuringa; Na imanya lyechikushikia.

¹² Kundu ukiṟo na njia tsa mawicho, Na wandu wededa halawaṟi;

¹³ Wandu wadeye njia njihoṟotsu, Wakukumba meemenyi,

¹⁴ Waiwachihiṟe nyi mawicho; Wakakesa kiidi kya odetso lo wawicho;

¹⁵ Waledetso njienyi yawo, Watimbiri njayonyi tsawo

¹⁶ Ukuṟise na wameluki Ee da, wameluki wekelembalemba na madedo hawo;

¹⁷ Adeye mbuya ya uwanake woke, Na ihadima mkundana fo Ruwa oke.

¹⁸ Kipfa mba yake iambuya opfunyi, Na njayo tsake tsihenda ko wapfu.

¹⁹ Woose wechimhendia kochiwuya manya umupfo, Manya ishikia njia tsa moo.

²⁰ Kundu uidime ihenda njienyi ya wandu wecha, Na iwada njayo tsa wenyi wulohi.

²¹ Kipfa wahoṟotsu wechikaa orukenyi Na walya wakuilishye wechikaapfo mlungana

²² Indi wewuta wuwicho wechiletsano na oruka Wenyi mtambo wose wechisamiṟo