MFANANO 19 - Bibilia Kui Mdedie fo Kimochi

¹ Nanga mkiwa ai msumhanyi, Kota mdetsi o dumbu ai tondo

² Manya kii kicha mrima fo mndu fuuṟe wuṟango pfo Na ichu mokambiṟa na madende nawuta wunyamaṟi

³ Wutondo wo mndu wodetsa njia yake; Na mrima foke foshimbiṟia Mndumii

⁴ Wusuṟi woengeṟa wambuya wafoi, Indi mkiwa naletsano na mbuya tsake.

⁵ Mṟingishi o wongo nechikapo; Ma mohamba wongo echikiapfo.

⁶ Wandu wafoi wechiterewa mnene nawasaṟye; Na orio umu nyi mbuya ya ichu mowuta “tunu” (kindo kya wuhuru wung'anyi cha manemane lang'u).

⁷ Wana wa mae wose wa mkiwa wekemsuo; Na wambuya wake wakaengeṟa ikushowa nao! Kawaosha kui madedo, indi nalakiwawone se.

⁸ Mowada wuṟango nakukundi amonyi; Mowada imanya nawada mecha.

⁹ Mohamba wongo cha mṟingishi nechikapo Na modeda wongo nechirumatso.

¹⁰ Moo fo useṟeṟi fuwaṟi tondo-pfo; Kimu na isinga lichilye wanene.

¹¹ Wuṟango wo mndu woketiṟisha nyashi yake, Nyi kiṟumi kyake ihooṟia ideko.

¹² Nyashi ya mangi nyi cha miso fuipoṟohoṟa; Indi ndarama yake cha mlewi fui huya maṟa.

¹³ Mana ai tondo nyi opfu lo ndee, Na ngapano na shiloyo sha mka cha msha orio mkonu

¹⁴ Mba na masaa nyi kyooṟa mndu ainengo nyi ndee, Indi mka mṟango, mndu nekeinengo nyi Mndumii.

¹⁵ Wudoko wokeinenga mndu mado malemeri; Ma moo foke fochiuṟa njaa pfo.

¹⁶ Ichu moindya wuwawaso naringa moo foke; Indi ichu alaambuya ohendo loke nechipfa.

¹⁷ Mosaṟia mkiwa naakuya Mndumii, Nao nechimtaa kui iṟunda lyake licha.

¹⁸ Wawasa mana kipfa kuwode kikusiriyo; Ma kulashimbiṟe kipfa kya ideka lyake.

¹⁹ Mndu o nyashi ing'anyi nechiambia ngapo yake, Kipfa ma komkiṟa nochiwuya-se.

²⁰ Adanyia chila, noambie kiloshyo, kundu noṟanguo oo mafurumienyi.

²¹ Kuwode mtambo mrimenyi fo mndu; Indi chila ya Mndumii yo yechihoṟoka.

²² Kilya mndu alangie nyi kiira kyake; Nanga mkiwa kota mowongo

²³ Ikunda Mndumii lyekehendia moo; Nechikaa ahutsu; echicheyo nyi mawicho pfo.

²⁴ Mndu mdoko nekewika owoko loke kitelenyi; Kyaindi ma akundi ma iluduo dumbunyi lyakepfo.

²⁵ Kapa mndu o sheṟe, na tondo lyechiwona wulaanyi; Kanga mndu mṟango, nao nechimanya wulaanyi.

²⁶ Mndu ekeolaola masaa ha ndeye na ifuna mae; Nyi mana ekesonu, na iende lawama.

²⁷ Mana oko, leka kulaadanyie mloshie, Kokoya nokundi itwaaṟa madedo ha wuṟango.

²⁸ Mngochi o wulya nekemina angu italuo mwanduye, Na madumbu ha wandu wamkika hekemeṟa wunyamaṟi.

²⁹ Mwanduye fumṟeheṟe ko wandu wa mkika; Na ngapo huya mhongo ya matondo.